CAB. XIV

1Ayns y nah vleïn jeh Joash, mac Jehoahaz ree Israel, ren Amaziah, mac Joash ree Yudah, reill. 2V’eh queig bleeaney as feed dy eash tra ghow eh toshiaght dy reill, as reill eh nuy bleeaney as feed ayns Jerusalem: ennym e voir va Jehoaddan jeh Jerusalem. 3As ren eh shen ny va cairagh ayns shilley’n Chiarn, ny-yeih, cha nee myr David e ayr: deiyr eh ayns dy chooilley nhee er cliaghtaghyn Joash e ayr. 4Ny-yeih, cha row ny ard-ynnydyn treigit: ren y pobble foast chebbal oural as lostey incense er ny ynnydyn ardey.

5As haink eh gy-kione, cha leah’s v’eh er ny hickyraghey ayns y reeriaght, dy dug eh gy-baase e vooinjer v’er varroo’n ree e ayr. 6Agh cloan ny dunveryn cha dug eh gy-baase: cordail rish shen ny ta scruit ayns lioar leigh Voses, ayn hug y Chiarn sarey, gra, Cha bee ny ayraghyn er nyn goyrt gy-baase son y chloan, ny’n chloan er nyn goyrt gy-baase son ny ayraghyn; agh bee dy chooilley ghooinney er ny choyrt gy-baase son e loght hene. 7Varr eh jeh Edom jeih thousaneyn, ayns y ghlione-sollan, as ghow eh Selah ayns caggey, as ren eh genmys eh Joktheel, gys y laa t’ayn jiu.

8Eisht hug Amaziah chaghteryn gys Jehoash, mac Jehoahaz, mac Jehu ree Israel, gra, Tar, lhig dooin jeeaghyn y cheilley ’syn eddin. 9As hug Jehoash ree Israel fys gys Amaziah ree Yudah, gra, Hug yn onnane v’ayns Lebanon chaghteraght gys y cedar v’ayns Lebanon, gra, Cur dty inneen da my vac son ben: as hie baagh oaldey v’ayns Lebanon shaghey, as stamp eh fo-chosh yn onnane. 10T’ou uss dy jarroo er woalley Edom, as ta dty chree er dty hroggal seose; jean boggyssagh son shoh, as fuirree ec y thie; son cre’n-fa yinnagh oo roie ayns dangere, oo-hene dy huittym ayns caggey, as Judah mayrt? 11Agh cha n’eaishtagh Amaziah: Shen-y-fa hie Jehoash ree Israel seose; as hug eshyn as Amaziah ree Yudah eddin yn derrey yeh da’n jeh elley ec Beth-shemesh, va bentyn da Judah. 12As hooar Judah yn chooid smessey veih Israel; as ren dy chooilley ghooinney chea gys e chabbane. 13As ghow Jehoash ree Israel Amaziah ree Yudah, mac Jehoash, mac Ahaziah, ec Beth-shemesh, as haink eh gys Jerusalem, as vrish eh sheese jeh voalley Yerusalem, veih giat Ephraim gys y yiat corneilagh, kiare cheead cubit er lhiurid. 14As gow eh ooilley’n airh, as yn argid, as ooilley ny siyn v’er ny gheddyn ayns thie’n Chiarn, as ayns tashtaghyn thie’n ree, as raanteenyn, as hyndaa eh reesht gys Samaria.

15Nish y chooid elley jeh obbraghyn Jehoash, as e niart, as kys ren eh caggey rish Amaziah ree Yudah, nagh vel ad scruit ayns lioar recortyssyn reeaghyn Israel? 16As chaddil Jehoash marish e ayraghyn, as v’eh oanluckit ayns Samaria marish reeaghyn Israel; as ren Jeroboam e vac reill ny ynnyd.

17As va Amaziah, mac Joash ree Yudah, bio lurg baase Jehoash, mac Jehoahaz ree Israel, queig bleeaney jeig. 18As y chooid elley jeh obbraghyn Amaziah, nagh vel ad scruit ayns lioar recortyssyn reeaghyn Yudah? 19Nish dirree ad magh n’oï ayns Jerusalem: as chossyn eh roish gys Lachish; agh hie ad er e eiyrt’s gys Lachish, as varr ad eh ayns shen. 20As hug ad lhieu eh lesh cabbil; as v’eh oanluckit ec Jerusalem marish e ayraghyn, ayns ard-valley Ghavid.

21As ghow ooilley pobble Yudah Azariah, (va shey bleeaney jeig dy eash,) as ren ad eh yn ree ayns ynnyd e ayr Amaziah. 22Hrog eh Elath, as hug eh eh reesht da Judah: lurg shen chaddil eh marish e ayraghyn.

23Ayns y wheiggoo vleïn jeig jeh Amaziah, mac Joash ree Yudah, ghow Jeroboam, mac Joash ree Israel, toshiaght dy reill ayns Samaria, as ren eh reill un vleïn as da-eed. 24As ren eh shen ny va olk ayns shilley’n Chiarn; cha ren eh treigeil ooilley peccaghyn Yeroboam mac Nebat, hayrn Israel gys peccah. 25Ren eh seose ardjyn Israel veih cagliagh Hamath gys keayn y strah, cordail rish raa’n Chiarn Jee Israel, loayr eh liorish shirveish e harvaant Jonah, mac Amittai, yn phadeyr, va jeh Gath-hepher. 26Son honnick y Chiarn seaghyn Israel, dy row ad feer dewil: son cha row couyr erbee faagit sthie ny mooie, ny cooneyder son Israel. 27Agh cha dooyrt y Chiarn dy jinnagh eh dolley ass ennym Israel veih fo niau: agh haue eh ad liorish laue Yeroboam mac Yoash.

28Nish y chooid elley jeh obbraghyn Yeroboam, as ooilley ny ren eh, as e niart, kys ren eh caggey, as kys chossyn eh reesht da Israel Damascus, as Hamath, ta bentyn da Judah, nagh vel ad scruit ayns lioar recortyssyn reeaghyn Israel? 29As chaddil Jeroboam marish e ayraghyn, eer marish reeaghyn Israel: as ren Zechariah e vac reill ’syn ynnyd echey.