CAB. XV

1Ayns y chiaghtoo vleïn as feed jeh Jeroboam ree Israel, ghow Azariah, mac Amaziah ree Yudah toshiaght dy reill. 2Shey bleeaney jeig dy eash v’eh tra ghow eh toshiaght dy reill, as ren eh reill daa vleïn jeig as da-eed ayns Jerusalem: as va ennym e voir Jecholiah jeh Jerusalem. 3As ren eh shen ny va cairagh ayns shilley’n Chiarn, cordail rish ooilley ny va Amaziah e ayr er n’yannoo; 4Agh ny-yeih cha row ny ynnydyn ardey er nyn scughey: ren y pobble chebbal oural as lostey incense kinjagh ayns ny ynnydyn ardey.

5As lhie’n Chiarn e laue er y ree, dy row eh ny lourane gys laa e vaaish, as chum eh ayns thie er-lheh. As va Jotham mac y ree harrish y reeriaght, briwnys pobble ny cheerey. 6As y chooid elley jeh obbraghyn Ahaziah, as ooilley ny ren eh, nagh vel ad scruit ayns lioar recortyssyn reeaghyn Yudah? 7Myr shen chaddil Azariah marish e ayraghyn; as doanluck ad eh marish e ayraghyn ayns ard-valley Ghavid: as ren Jotham e vac reill ayns e ynnyd.

8Ayns yn hoghtoo vleïn jeig as feed jeh Azariah ree Yudah, ren Zachariah mac Yeroboam reill harrish Israel ayns Samaria shey meeaghyn. 9As ren eh shen ny va olk ayns shilley’n Chiarn, myr va e ayraghyn er n’yannoo: cha hreig eh peccaghyn Yeroboam mac Nebat, chleayn Israel gys peccah. 10As ren Shallum mac Jabesh girree magh n’oï, as woaill eh, as varr eh eh fenish y pobble, as ren eh reill syn ynnyd echey. 11As y chooid elley jeh obbraghyn Zachariah, cur-my-ner, t’ad scruit ayns lioar recortyssyn reeaghyn Israel. 12She shoh va goo’n Chiarn loayr eh rish Jehu, gra, Nee dty vec soie er stoyl-reeoil Israel gys y chiarroo heeloghe. As shen myr haink eh gy-kione.

13Ghow Shallum mac Jabesh toshiaght dy reill ayns y nuyoo vleïn jeig as feed jeh Uzziah ree Yudah, as ren eh reill slane mee ayns Samaria. 14Son hie Menahem mac Ghadi seose veih Tirzah, as haink eh gys Samaria, as woaill eh Shallum mac Jabesh ayns Samaria, as varr eh eh, as ren eh reill ’syn ynnyd echey. 15As y chooid elley jeh obbraghyn Shallum, as yn irree-magh ren eh, cur-my-ner t’ad scruit ayns lioar recortyssyn reeaghyn Israel.

16Eisht woaill Menahem Tiphsah, as ooilley ny va ayn, as ny ardjyn echey veih Tirzah: er-yn-oyr nagh doshil ad ny giattyn da, shen-y-fa woaill eh eh; as ooilley ny mraane torragh v’ayn ren eh giarey seose. 17Ayns y nuyoo vleïn as feed jeh Azariah ree Yudah, ghow Menahem mac Ghadi toshiaght dy reill harrish Israel, as ren eh reill jeih bleeaney ayns Samaria. 18As ren eh shen ny va olk ayns shilley yn Chiarn: rish ooilley e hraa cha ren eh scarrey rish peccaghyn Yeroboam mac Nebat, ren Israel y chleayney gys peccah. 19As haink Pul ree Assyria noi yn cheer: as hug Menahem da Pul thousane talent dy argid, son e laue dy ve lesh, dy niartaghey eh ayns e reeriaght. 20As hrog Menahem yn argid jeh Israel, eer jeh ooilley ny ard-verchee, jeh dagh dooinney jeih shekelyn as da-eed dy argid, dy choyrt da ree Assyria: myr shen hie ree Assyria roish, as cha duirree eh ayns y cheer.

21As y chooid elley jeh obbraghyn Menahem, as ooilley ny ren eh, nagh vel ad scruit ayns lioar recortyssyn reeaghyn Israel? 22As chaddil Menahem marish e ayraghyn: as ren Pekahiah e vac reill ’syn ynnyd echey.

23Ayns y jeihoo vleïn as da-eed jeh Azariah ree Yudah, ghow Pekahiah, mac Menahem, toshiaght dy reill harrish Israel ayns Samaria, as ren eh reill daa vleïn. 24As ren eh shen ny va olk ayns shilley’n Chiarn; cha hreig eh peccaghyn Yeroboam mac Nebat, chleayn Israel gys peccah. 25Agh ren Pekah mac Remaliah, va ny chaptan fo, girree-magh n’oï, as woaill eh eh ayns Samaria, marish Argob, as Arieh, ayns toor phlaase yn ree: as 15:25 Pekah. mârishyn va jeih deiney as da-eed jeh ny Gileaditeyn: as varr eh eh, as ren eh reill ’syn ynnyd echey. 26As y chooid elley jeh obbraghyn Pekahiah, as ooilley ny ren eh, cur-my-ner t’ad scruit ayns lioar recortyssyn reeaghyn Israel.

27Ayns y nah vleïn jeig as da-eed jeh Azariah ree Yudah, ghow Pekah mac Remaliah toshiaght dy reill harrish Israel ayns Samaria, as ren eh reill feed bleïn. 28As ren eh shen ny va olk ayns shilley yn Chiarn; cha hreig eh peccaghyn Yeroboam mac Nebat, chleayn Israel gys peccah. 29Ayns laghyn Pekah ree Israel, haink Tiglath-pileser ree Assyria, as ghow eh Ijon, as Abelbeth-maachah, as Janoah, as Kedesh, as Hazor, as Gilead, as Galilee, ooilley cheer Naphtali, as hug eh lesh ad nyn gappee gys Assyria. 30As ren Hoshea mac Elath girree-magh noi Pekah mac Remaliah, as woaill eh, as varr eh eh, as ren eh reill ’syn ynnyd echey, ayns y feedoo vleïn jeh Jotham mac Uzziah. 31As y chooid elley jeh obbraghyn Pekah, as ooilley ny ren eh, cur-my-ner t’ad scruit ayns lioar recortyssyn reeaghyn Israel. 32Ayns y nah vleïn jeh Pekah mac Remaliah ree Israel, ghow Jotham mac Uzziah ree Yudah toshiaght dy reill. 33Queig bleeaney as feed dy eash v’eh tra ghow eh toshiaght dy reill, as reill eh shey bleeaney jeig ayns Jerusalem: as ennym e voir va Jerusha, inneen Zadok. 34As ren eh shen ny va mie ayns shilley yn Chiarn: ren eh cordail rish ooilley ny va e ayr Uzziah er n’yannoo.

35Ny-yeih, cha row ny ynnydyn ardey er nyn scughey: ren y pobble kinjagh chebbal oural as lostey incense ayns ny ynnydyn ardey. Hrog eh yn giat b’yrjey jeh thie yn Chiarn.

36Nish y chooid elley jeh obbraghyn Jotham, as ooilley ny ren eh, nagh vel ad scruit ayns lioar recortyssyn reeaghyn Yudah? 37(Ayns ny laghyn shen ve aigney’n Chiarn dy choyrt noi Judah, Rezin ree Syria, as Pekah mac Remaliah.) 38As chaddil Jotham marish e ayraghyn; as doanluck ad eh marish e ayraghyn ayns ard-valley Ghavid: as ren Ahaz e vac reill ayns e ynnyd.