CAB. XVII

1Ayns y nah vleïn jeig jeh Ahaz ree Yudah, ghow Hoshea mac Elah toshiaght dy reill harrish Israel ayns Samaria nuy bleeaney. 2As ren eh shen ny va olk ayns shilley yn Chiarn, agh cha nee ooilley-magh myr reeaghyn Israel va roish

3Haink Shalmaneser ree Assyria seose n’oï; as haink Hoshea dy ve fo e viallys, as deeck eh keesh da. 4As dennee ree Assyria dy row Hoshea mysh brishey conaant rish; son v’eh er choyrt chaghteryn gys So ree Egypt, chamoo v’eh er eeck y cheesh bleeaney da ree Assyria: shen-y-fa ren ree Assyria jeigh eh seose ny phryssoonagh ayns geulaghyn.

5Eisht haink ree Assyria seose trooid ooilley yn cheer, as hie eh seose gys Samaria, as ren eh caggey n’oï son three bleeaney.

6Ayns y nuyoo vleïn jeh Hoshea, ghow ree Assyria Samaria, as hug eh lesh Israel ersooyl gys Assyria, as ad y hoiaghey ayns Halah, as ayns Habor liorish awin Gozan, as ayns ard-valjyn ny Medeyn. 7Son myr shen ve, dy row cloan Israel er n’yannoo peccah noi yn Chiarn y Jee oc, hug lesh ad seose ass cheer Egypt, veih fo laue Pharaoh ree Egypt, as er hirveish jeeghyn joarree, 8As er n’ymmyrkey ad-hene lurg cliaghtaghyn ny ashoonee, (va’n Chiarn er n’eebyrt roish eddin cloan Israel,) as ny oardaghyn peccoil va reeaghyn Israel er n’yannoo. 9As ren cloan Israel dy follit shen nagh row jeeragh noi’n Chiarn y Jee oc, as hrog ad ard-ynnydyn ayns ooilley nyn maljyn, veih toor yn arreyder, gys yn ard-valley fencit. 10As hoie ad seose jallooyn as keylljyn ayns dy chooilley chronk ard, as fo dy chooilley villey glass: 11As losht ad incense ayns ooilley ny ard-ynnydyn, myr ren ny ashoonee va’n Chiarn er n’eiyrt magh rhymboo; as hug ad rish dy chooilley vee-chraueeaght dy vrasnaghey yn Chiarn gys corree: 12Son hirveish ad jallooyn, my-nyn-gione va’n Chiarn er ghra, Cha jean shiu shoh y yannoo. 13Foast dymmyrk y Chiarn feanish noi Israel, as noi Judah, liorish ooilley ny phadeyryn, as ooilley ny fakyderyn, gra, Chyndaa-jee veih nyn ghrogh raaidyn, as freill-jee my annaghyn as my lattyssyn, cordail rish y slane leigh ren mee y harey da nyn ayraghyn, as shen doardee mee diuish liorish my harvaantyn ny phadeyryn. 14Ny-yeih, cha n’eaishtagh ad, agh v’ad creoi-wannallagh, myr va nyn ayraghyn, nagh ren credjal ayns y Chiarn y Jee oc. 15As vrish ad e lattyssyn, as e chonaant ren eh rish nyn ayraghyn, as e recortyssyn lioroo v’eh er n’ymmyrkey feanish nyn ’oï; as deiyr ad er fardalys as ommijys, as hie ad geiyrt er aghtyn ny ashoonee va mygeayrt-y-moo, mychione oc va’n Chiarn er harey ad, nagh jinnagh ad y lheid. 16As hreig ad ooilley annaghyn y Chiarn y Jee oc, as ren ad daue hene jallooyn grainnit, eer daa lheiy, as hoie ad keyll, as hug ad ooashley da ooilley rollageyn yn aer, as hirveish ad Baal. 17As hug ad er ny mec as ny inneenyn oc dy gholl trooid yn aile, as hug ad rish faishnys as obbeeys, as chreck ad ad-hene dy yannoo olk ayns shilley yn Chiarn, dy vrasnaghey eh gys corree. 18Shen-y-fa va’n Chiarn feer chorree rish Israel, as scugh eh ad ass e hilley: cha row faagit agh tribe Yudah ny-lomarcan. 19Chamoo dreill Judah annaghyn y Chiarn y Jee oc, agh jimmee ad ayns ny slattyssyn va Israel er n’yannoo. 20As ren y Chiarn tilgey jeh sluight Israel, as hug eh seaghyn nyn raad, as livrey eh ad gys laueyn ny spooilleyderyn, derrey v’eh dy bollagh er scughey ad ass e hilley. 21Son yiare eh Israel jeh veih thie Ghavid; ad ren ad Jeroboam mac Nebat ny ree: as deiyr Jeroboam Israel veih shirveish y Chiarn, as hug eh orroo peccah trome y yannoo. 22Son huill cloan Israel ayns ooilley peccaghyn Yeroboam, as deiyr ad orroo; 23Derrey scugh y Chiarn Israel ass e hilley, myr v’eh er ghra rish ooilley e harvaantyn ny phadeyryn. Myr shen va Israel er nyn goyrt lhieu ersooyl ass y cheer oc hene gys Assyria gys y laa t’ayn jiu.

24Agh hug Assyria lesh deiney veih Babylon, as veih Cuthah, as veih Ava, as veih Hamath, as veih Sepharvaim, ren eh y hoiaghey ayns ard-valjyn Samaria, ayns ynnyd cloan Israel; as ren ad cummal ayns Samaria, as ayns e ard-valjyn. 25As myr shen ve, ee toshiaght yn chummal oc ayns shen, nagh ghow ad aggle roish y Chiarn; shen-y-fa hug y Chiarn lionyn nyn vud oc, varr paart jeu. 26Shen-y-fa hug ad fys gys ree Assyria, gra, Ta ny ashoonyn, t’ou er scughey, as er hoiaghey ayns ard-valjyn Samaria, mee-hushtagh jeh shirveish Jee ny cheerey: shen-y-fa, t’eh er chur lionyn nyn vud oc dy stroie ad, er-yn-oyr nagh vel toiggal oc jeh Jee ny cheerey. 27Eisht hug ree Assyria sarey, gra, Cur-jee huc fer jeh ny saggyrtyn hug shiu lhieu veih shen, as lhig da goll as cummal ayn, as ad y ynsaghey ayns tushtey cooie jeh Jee ny cheerey. 28Eisht haink fer jeh ny saggyrtyn v’ad er choyrt lhieu veih Samaria, as chum eh ayns Beth-el, as dynsee eh ad ayns aggle y Chiarn. 29Ny-yeih, ren dagh ashoon jeeghyn daue hene, as ad y hoiaghey seose ayns thieyn ny ard-ynnydyn va ny Samaritanee er hroggal, dagh ashoon ayns ard-valjyn nyn gummallyn. 30As ren deiney Vabylon goaill Succoth-benoth son y jee oc, as deiney Cuth, Nergal, as deiney Hamath, Ashima, 31As ren ny Aviteyn Nibhaz as Tartak, as losht ny Sepharviteyn nyn gloan ayns yn aile gys Adrammelech as Anammelech jeeghyn Sepharvaim. 32Myr shen ghow ad aggle roish y Chiarn, as ren ad jeh’n vooinjer b’inshley jeu saggyrtyn ny ard-ynnydyn, ren oural y hebbal er nyn son ayns thieyn ny ard-ynnydyn. 33Hug ad ammys da’n Chiarn, as [ec y traa cheddin] hirveish ad ny jeeghyn oc hene, lurg cliaghtey ny ashoonyn hug ad lhieu veih shen. 34Gys y laa t’ayn jiu t’ad geiyrt er nyn shenn chliaghtaghyn: cha vel ad goaill 17:34 Myr lhisagh ad. aggle roish y Chiarn, chamoo t’ad jannoo cordail rish ny slattyssyn ny ny oardaghyn, ny cordail rish y leigh as yn anney ren y Chiarn sarey da cloan Yacob, v’eh er n’enmys Israel; 35Roosyn va’n Chiarn er n’yannoo conaant, as er harey ad, gra, Cha der shiu ooashley da jeeghyn elley, ny shiu-hene y chroymmey sheese huc, ny ad y hirveish, ny oural y hebbal daue: 36Agh y Chiarn, hug lesh shiu magh ass cheer Egypt lesh ard phooar as roih sheeynt magh, roishyn gowee shiu aggle, eshyn nee shiu ooashlaghey, as huggeysyn nee shiu ouralley. 37As ny slattyssyn, as ny oardaghyn, as y leigh, as yn anney, scrieu eh er nyn son, bee shiuish kiaralagh dy chooilleeney son dy bragh; as cha jean shiu aggle y ghoaill roish jeeghyn elley 38As y conaant ta mee er n’yannoo riu, cha jean shiu eh ’yarrood, chamoo ver shiu ooashley da jeeghyn elley. 39Agh nee shiu aggle y ghoaill roish y Chiarn y Jee eu, as nee eshyn shiu y livrey veih laue ooilley nyn noidyn. 40Ny-yeih cha dug ad geill da, agh ren ad lurg nyn shenn chliaghtaghyn. 41Shoh myr ren ny ashoonee shirveish y Chiarn, as myrgeddin ny jallooyn grainnit oc hene, chammah nyn gloan as cloan nyn glienney: myr ren ny ayraghyn oc, myr shen t’ad jannoo gys y laa t’ayn jiu.