CAB. XVIII

1Nish haink eh gy-kione, ’sy trass vleïn jeh Hoshea mac Elah ree Israel, dy ghow Hezekiah mac Ahaz ree Yudah toshiaght dy reill. 2Queig bleeaney as feed dy eash v’eh tra ghow eh toshiaght dy reill, as ren eh reill nuy bleeaney as feed ayns Jerusalem: va ennym e voir Abi, inneen Zachariah. 3As ren eh shen na va jeeragh ayns shilley yn Chiarn, cordail rish ooilley ny ren David e ayr.

4Hug eh sheese ny ynnydyn ardey, as vrish eh ny jallooyn, as yiare eh sheese ny keylljyn, as vrish eh ayns peeshyn yn ard-nieu prashey va Moses er n’yannoo: son ayns ny laghyn shen va cloan Israel lostey incense huggey: as denmys eh eh 18:4 Peesh dy phrash, ny, red prashey. Nehushtan. 5Hreisht eh ayns y Chiarn Jee Israel; myr shen ny lurg cha row fer erbee goll-rish mastey ooilley reeaghyn Yudah, ny veg jeusyn va roish. 6Son ren eh lhiantyn gys y Chiarn, as cha hreig eh e raaidyn, agh dreill eh ny annaghyn va’n Chiarn er harey liorish Moses. 7As va’n Chiarn mârish; as cre-erbee ghow eh ayns laue haink eh lesh: as dirree eh magh noi ree Assyria, as dob eh dy eeck keesh da. 8Woaill eh ny Philistinee, eer gys Gaza, as ny ardjyn echey, veih toor yn arreyder gys yn ard-valley fencit.

9As haink eh gy-kione, ayns y chiarroo vleïn jeh ree Hezekiah, (va’n chiaghtoo vleïn jeh Hoshea mac Elah ree Israel,) dy daink Shalmaneser ree Assyria seose gys Samaria, as ren eh caggey n’oï. 10As ghow ad eh ec kione three bleeaney; eer ayns y cheyoo vleïn jeh Hezekiah, (ta shen yn nuyoo vleïn jeh Hoshea ree Israel,) va Samaria er ny ghoaill. 11As hug ree Assyria lesh Israel ersooyl gys Assyria, as hug eh ad ayns Halah as ayns Habor liorish awin Gozan, as ayns ard-valjyn ny Medeyn. 12Er-yn-oyr nagh dug ad biallys da coraa yn Chiarn y Jee oc, agh vrish ad e chonaant, as ooilley ny va Moses sharvaant y Chiarn er harey, cha n’eaishtagh ad roo, ny jannoo ad.

13Nish ayns y chiarroo vleïn jeig jeh ree Hezekiah, haink Sennacherib ree Assyria seose noi ooilley ard-valjyn fencit Yudah, as ghow eh ad. 14As hug Hezekiah ree Yudah chaghteraght gys ree Assyria gys Lachish, gra, Ta mee er n’yannoo dy aggairagh; chyndaa voym: shen ver oo orrym neem’s y chooilleeney. As doardee ree Assyria da Hezekiah ree Yudah, dy eeck 18:14 £350,000.three cheead talent dy argid as jeih talentyn as feed dy airh. 15As hug Hezekiah da ooilley yn argid va ry-gheddyn ayns thie yn Chiarn, as ayns tashtaghyn thie yn ree. 16Ec y traa shen, ren Hezekiah giarey jeh yn airh veih dorryssyn chiamble y Chiarn, as veih ny pillaryn va Hezekiah ree Yudah er lail harrish, as hug eh eh da ree Assyria.

17As hug ree Assyria Tartan, as Rabsaris, as Rab-shakeh, veih Lachish gys ree Hezekiah, lesh sheshaght-caggee mooar noi Jerusalem: as hie ad seose, as haink ad gys Jerusalem. As tra v’ad er jeet seose, haink ad as hass ad liorish coorse-ushtey yn loghan syrjey, ta er y raad-vooar liorish magher y ghialleyder. 18As tra v’ad er n’eamagh gys y ree, haink magh huc Eliakim mac Hilkiah, va harrish y lught-thie, as Shebna yn scrudeyr, as Joah mac Asaph yn recorder. 19As dooyrt Rab-shakeh roo, Loayr-jee nish rish Hezekiah, Myr shoh ta’n ree mooar, eer ree Assyria, dy ghra, Cre’n shickyrys shoh t’ou coyrt dty varrant er? 20T’ou gra, (agh goan fardalagh ad,) Ta coyrle as niart aym son y chaggey. Nish quoi er t’ou coyrt dty varrant, dy vel oo girree-magh m’oï? 21Nish, cur-my-ner, t’ou cur dty varrant er lorg yn chuirtlagh vroojit shoh, eer er Egypt, er my ver dooinney barrant, nee eh roie ayns e laue, as lhottey eh: myr shen ta Pharaoh ree Egypt da dagh unnane ta coyrt barrant ersyn. 22Agh my jir shiu rhym’s, Ta shin treishteil ayns y Chiarn y Jee ain: nagh nee shen eshyn, ny ynnydyn ard as ny altaryn echey ta Hezekiah er ghoaill ersooyl, as er ghra rish Judah as Jerusalem, Nee shiu ooashley ’choyrt kiongoyrt rish yn altar shoh ayns Jerusalem? 23Nish er-y-fa shen, ta mee guee ort, cur raanteenyn da my hiarn ree Assyria, as livrey-yms dhyt’s daa housane cabbyl, my oddys uss er dty phaart markee y choyrt orroo. 24Kys eisht nee uss cur eddin da’n chaptan sloo jeh sharvaantyn my vainshtyr, as dty varrant y choyrt er Egypt son fainee as son markee? 25Vel mee nish er jeet seose fegooish y Chiarn noi’n ynnyd shoh dy stroie eh? Dooyrt y Chiarn rhym’s. Seose lhiat noi’n cheer shoh, as stroie eh. 26Eisht dooyrt Eliakim mac Hilkiah, as Shebna, as Joah, rish Rab-shakeh, Loayr, ta mee guee ort, rish dty harvaantyn ayns glare ny Syrianee, (son ta shin dy hoiggal eh,) as ny jean taggloo rooin ayns glare ny Hewnyn, ayns clashtyn y pobble t’er y voalley. 27Agh dooyrt Rab-shakeh roo, Vel my vainshtyr er choyrt mish gys dty vainshtyr, as hood’s, dy loayrt ny goan shoh? nagh vel eh er my choyrt gys ny deiney ta nyn soie er y voalley, dy bee ad êginit dy ee yn eoylley oc hene, as dy iu yn ushtey oc hene mêriu? 28Eisht hass Rab-shakeh, as deïe eh lesh ard choraa ayns glare ny Hewnyn, as loayr eh, gra, Clasht-jee rish goan y ree mooar, ree Assyria: 29Myr shoh ta’n ree dy ghra, Ny lhig da Hezekiah shiu y volley; son cha vod eh shiuish y livrey ass my laue: 30Chamoo lhig da Hezekiah coyrt erriu treishteil ayns y Chiarn gra, Nee yn Chiarn son shickyrys shinyn y livrey, as cha bee yn ard-valley shoh er ny livrey gys laue ree Assyria. 31Ny eaisht-jee rish Hezekiah: son myr shoh ta ree Assyria gra, Jean-jee coardail rhym’s lesh gioot, as tar-jee magh hym’s, as eisht ee-jee dy chooilley ghooinney jeh e villey-feeyney hene, as dy chooilley unnane jeh e villey-figgagh hene, as iu-jee dy chooilley unnane jeh ushtaghyn yn chibbyr echey hene; 32Derrey hig-yms as shiuish y ghoaill ersooyl gys cheer goll-rish y cheer eu hene, cheer dy arroo as dy feeyn, cheer dy arran as dy gharaghyn-feeyney, cheer dy ooil-olive as dy vill, dy vod shiu ve bio as gyn baase y gheddyn: as ny cur-jee geill da Hezekiah, tra t’eh cur erriu credjal, gra, Nee’n Chiarn shin y livrey. 33Vel veg jeh jeeghyn ny ashoonyn er livrey er aght erbee yn cheer echey ass laue ree Assyria? 34Cre’n erree t’er jeet er jeeghyn Hamath, as Arpad? cre vel jeeghyn Sepharvaim, Hena, as Ivah? vel adsyn er livrey Samaria ass my laue? 35Quoi ad mastey ooilley jeeghyn ny cheeraghyn t’er livrey yn cheer oc ass my laue’s, dy jinnagh y Chiarn Jerusalem y livrey ass my laue? 36Agh va’n pobble nyn dhost, as cha dug ad fockle dy ansoor: son va sarey yn ree, gra, Ny cur-jee ansoor da. 37Eisht haink Eliakim mac Hilkiah, va harrish y lught-thie, as Shebna yn scrudeyr, as Joah mac Asaph yn recorder, gys Hezekiah, lesh ny coamraghyn oc raipit, as dinsh ad da goan Rab-shakeh.