CAB. II

1As haink eh gy-kione, tra baillish y Chiarn Elijah y ghoaill seose gys niau lesh geay-chassee, dy jagh Elijah marish Elisha veih Gilgal. 2As dooyrt Elijah rish Elisha, Fuirree ayns shoh, ta mee guee ort; son ta’n Chiarn er m’y choyrt er chaghteraght gys Beth-el. As dooyrt Elisha rish, Myr ta’n Chiarn bio, as myr ta dty annym bio, cha vaag-ym oo. Myr shen hie ad ny-neesht sheese gys Beth-el. 3As haink mec ny phadeyryn, v’ec Beth-el, magh gys Elisha, as dooyrt ad rish, Vel fys ayd dy jean y Chiarn troggal seose dty vainshtyr veih dty chione er y laa shoh? As dooyrt eh, S’feer ta fys aym er; bee-jee shiuish nyn dhost. 4As dooyrt Elijah rish, Elisha, fuirree ayns shoh, ta mee guee ort; son ta’n Chiarn er my choyrt gys Jericho. As dooyrt eh, Myr ta’n Chiarn bio, as myr ta dt’annym bio, cha vaag-ym oo. Myr shen haink ad gys Jericho. 5As haink mec ny phadeyryn, v’ec Jericho, magh gys Elisha, as dooyrt ad rish, Vel fys ayd dy jean y Chiarn troggal seose dty vainshtyr veih dty chione er y laa shoh? As dreggyr eh, Dy jarroo ta fys aym er; bee-jee shiuish nyn dhost. 6As dooyrt Elijah rish, Fuirree, ta mee guee ort, ayns shoh; son ta’n Chiarn er my choyrt gys Jordan. As dooyrt eh, Myr ta’n Chiarn bio, as myr ta dt’annym bio, cha vaag-ym oo. As hie ad ny-neesht er nyn doshiaght. 7As hie jeih deiney as da-eed jeh mec ny phadeyryn, as hass ad dy ghoaill baght foddey jeh: as hass ad ny-neesht liorish Jordan. 8As ghow Elijah e chloagey, as ren eh filley eh dy cheilley, as woaill eh ny ushtaghyn, as v’ad er nyn scarrey veih-my-cheilley; myr shen dy jagh ad ny-neesht harrish er thalloo chirrym.

9As haink eh gy-kione, tra v’ad er gholl harrish, dy dooyrt Elijah rish Elisha, Shir cre nee’m er dty hon, roish my bee’m goit ersooyl voïd. As dooyrt Elisha, Ta mee guee ort, lhig da ayrn dooble jeh dty spyrryd ve orrym. 10As dooyrt eh, T’ou er hirrey red doillee: ny-yeih, my nee oo m’y akin tra bee’m er my ghoaill voïd, bee eh myr shen dhyt; agh mannagh vaik oo mee, cha bee eh myr shen. 11As haink eh gy-kione, myr v’ad goll er nyn doshiaght, as taggloo ry-cheilley, Cur-my-ner, honnick ad fainagh ailagh, as cabbil ailagh, ren ad ny-neesht y scarrey veih-my-cheilley; as hie Elijah seose lesh geay-chassee gys niau.

12As honnick Elisha eh, as deïe eh, My ayr, my ayr! fainagh Israel, as ny markee echey. As cha vaik eh arragh eh: as ghow eh greme er e choamrey, as raip eh eh ayns daa pheesh. 13As myrgeddin hrog eh cloagey Elijah ren tuittym veih, as hie eh back, as hass eh liorish broogh Yordan; 14As ghow eh cloagey Elijah v’er duittym veih, as woaill eh ny ushtaghyn, as dooyrt eh, Cre vel Chiarn Jee Elijah? As erreish dasyn myrgeddin v’er woalley ny ushtaghyn, rheynn ad veih-my-cheilley: as hie Elisha harrish. 15As tra honnick mec ny phadeyryn eh, adsyn hie dy ghoaill baght ec Jericho, dooyrt ad, Ta spyrryd Elijah tannaghtyn er Elisha. As hie ad ny whail, as ren ad croymmey ad-hene gys y thalloo kiongoyrt rish:

16As dooyrt ad rish, Cur-my-ner nish, ta nish marish dty harvaantyn jeih as da-eed dy gheiney trean; lhig daue goll, ta shin guee ort, as shirrey son dty vainshtyr; hoiggal dy vel Spyrryd y Chiarn er hroggal seose eh, as er cheau eh er slieau ny ayns coan ennagh. As dooyrt eh, Cha lhiass daue goll. 17As tra ren ad chionney er, derrey nagh goghe ad obbal, dooyrt eh, Lhig daue goll. Hug ad magh, er-y-fa shen, ny jeih deiney as da-eed; as hir ad er e hon three laa, agh cha dooar ad eh. 18As tra haink ad reesht huggey, (son duirree eh ec Jericho,) dooyrt eh roo, Nagh dooyrt mee riu, Ny gow-jee?

19As dooyrt deiney’n ard-valley rish Elisha, Cur-my-ner, ta shin guee ort, ta’n ard-valley shoh soit er boayl aalin, myr ta my hiarn fakin: agh ta’n ushtey neu-follan, as ta’n thalloo neu-ghooie. 20As dooyrt eh, Cur-jee lhieu hym’s cruishtin noa, as cur-jee sollan ayn. As hug ad lhieu eh huggey. 21As hie eh magh gys moir ny ushtaghyn, as hilg eh yn sollan ayns shen, as dooyrt eh, Myr shoh ta’n Chiarn dy ghra, Ta mee er lheihys ny ushtaghyn shoh; cha bee ad veih shoh magh neu-follan, ny’n thalloo gennish. 22Myr shen va ny ushtaghyn er nyn lheihys gys y laa shoh, cordail rish y raa loayr Elisha.

23As hie eh seose veih shen, gys Beth-el: as myr v’eh goll seose er y raad, haink scollagyn aegey magh ass yn ard-valley, as ren ad craid jeh, as dooyrt ad rish, Seose lhiat, chione veayl; seose lhiat, chione veayl. 24As hyndaa eh mygeayrt, as yeeagh eh orroo, as ghwee eh daue ayns ennym y Chiarn. As haink daa vuc-awin woirryn ass y cheyll, ren raipey jees as da-eed jeu. 25As hie eh veih shen gys slieau Carmel; as veih shen hyndaa eh gys Samaria.