CAB. XX

1Ayns ny laghyn shen va Hezekiah ching, as ayns raad y vaaish. As haink Isaiah mac Amoz huggey, as dooyrt eh rish, Myr shoh ta’n Chiarn dy ghra, Jean dty hymney; son yiow baase, cha jean oo coural. 2Eisht hyndaa eh e eddin gys y voall, as ghow eh padjer gys y Chiarn, gra, 3Cooinee nish, ta mee guee ort, O Hiarn, kys ta mee er n’immeeaght kiongoyrt rhyt ayns ynrickys, as lesh cree firrinagh, as er n’yannoo shen ny ta mie ayns dty hilley. As cheayn Hezekiah dy sharroo. 4As haink eh gy-kione roish my va Isaiah er n’gholl magh trooid y choyrt meanagh, dy daink goo’n Chiarn huggey, gra, 5Chyndaa reesht, as insh da Hezekiah, captan my phobble, Myr shoh ta’n Chiarn Jee Ghavid dty ayr gra, Ta mee er chlashtyn dty phadjer, ta mee er vakin dty yeïr: Cur-my-ner, neem’s uss y lheihys; as er y trass laa hed oo seose gys thie yn Chiarn. 6As ver-yms gys dty laghyn queig bleeaney jeig; as livrey-ym uss, as yn ard-valley shoh, ass laue ree Assyria; as neem’s yn ard-valley y choadey er my ghraih hene, as er graih Ghavid my harvaant. 7As dooyrt Isaiah, Gow lane doarn dy figgyn. As ghow ad as hug ad eh er yn askaid, as ren eh coural.

8Son va Hezekiah er ghra rish Isaiah, Cre vees yn cowrey dy jean y Chiarn m’y lheihys, as dy jem seose gys thie yn Chiarn yn trass laa? 9As dooyrt Isaiah, Yiow yn cowrey shoh veih yn Chiarn, dy jean y Chiarn yn red shoh t’eh er loayrt: Jed yn scadoo er e hoshiaght jeih ayrnyn, ny goll back jeih ayrnyn? 10As dreggyr Hezekiah, Cha vel eh agh red aashagh da’n scadoo dy gholl sheese jeih ayrnyn, agh lhig da’n scadoo goll back jeih ayrnyn. 11As deïe Isaiah yn phadeyr gys y Chiarn; as hug eh lesh yn scadoo back jeih ayrnyn, orroo ve er gholl sheese er dial Ahaz.

12Ec y traa shen hug Berodach-baladan, mac Valadan ree Vabylon, screeunyn lesh cowrey gys Hezekiah: son v’eh er chlashtyn dy row Hezekiah er ve ching. 13As ren Hezekiah mooar jeu, as yeeagh eh daue ooilley cooid verchagh e hie, yn argid, as yn airh, as ny spiceyn, as yn ooil costal, as ooilley thie e eilley-caggee, as ooilley ny v’eh er ny gheddyn ayns ny tashtaghyn echey: cha row nhee erbee ayns y thie, ny ayns ooilley y reeriaght echey, nagh yeeagh Hezekiah daue.

14Eisht haink Isaiah yn phadeyr gys Hezekiah, as dooyrt eh rish, Cre dooyrt ny deiney shoh? as cre vaih haink ad hood’s? As dooyrt Hezekiah, T’ad er jeet veih cheer foddey, eer veih Babylon. 15As dooyrt eh Cre t’ad er vakin ayns dty hie? As dreggyr Hezekiah, T’ad er vakin dy chooilley nhee t’ayns my hie: cha vel nhee erbee nastey my hashtaghyn nagh vel mee er yeeaghyn daue. 16As dooyrt Isaiah rish Hezekiah, Clasht rish goo yn Chiarn. 17Cur-my-ner, hig ny laghyn, dy bee ooilley ny ta ayns dty hie, as ooilley tashtaghyn dty henn-ayryn gys y laa t’ayn jiu, er nyn goyrt lhieu gys Babylon: cha bee nhee erbee faagit, ta’n Chiarn dy ghra. 18AS jeh dty vec hig jeed’s, nee oo y gheddyn, nee ad ’ghoaill ersooyl; as bee ad shirveishee ayns plaase ree Vabylon. 19Eisht dooyrt Hezekiah rish Isaiah, S’mie ta goo yn Chiarn, t’ou uss er loayrt. As Dooyrt eh [ny sodjey], S’mie te, my vees shee as ynrickys rish my lhing’s.

20As y chooid elley jeh obbraghyn Hezekiah, as ooilley e niart, as kys ren eh loghan, as coorse-ushtey dy hirveish yn ard-valley lesh ushtey, nagh vel ad scruit ayns lioar recortyssyn reeaghyn Yudah? 21As ren Hezekiah cadley marish e ayraghyn: as ren Manasseh e vac reill ayns e ynnyd.