CAB. XXI

1Va Manasseh daa vleïn jeig dy eash tra ghow eh toshiaght dy reill, as ren eh reill queig bleeaney jeig as da-eed ayns Jerusalem. As ennym e voir va Hephzibah. 2As ren eh shen ny va olk ayns shilley yn Chiarn, lurg peccaghyn eajee ny ashoonee, va’n Chiarn er n’astyrt magh roish cloan Israel. 3Son hrog eh seose reesht ny ynnydyn ardey va Hezekiah e ayr er stroie; as hrog eh seose altaryn son Baal, as biljyn mygeayrt-y-moo, myr ren Ahab ree Israel; as hug eh ooashley da ooilley pooaraghyn yn aer, as hirveish eh ad. 4As hrog eh altaryn ayns thie yn Chiarn, my-e-chione dooyrt y Chiarn, Ver-yms my ennym ayns Jerusalem. 5As hrog eh altaryn son ooilley pooaraghyn yn aer ayns daa chooyrt thie yn Chiarn. 6As hug eh er e vac dy gholl trooid yn aile, as deiyr eh er guessyn, as hug eh rish buitcheraght, as ghell eh rish spyrrydyn faishnee as fir-obbee: as dobbree eh mooarane olk ayns shilley yn Chiarn, dy vrasnaghey eh gys corree. 7As hoie eh seose jalloo grainnit y cheyll ayns y thie, my-e-chione va’n Chiarn er ghra rish David, as rish Solomon e vac, Ayns y thie shoh, as ayns Jerusalem, ta mee er reih ass ooilley tribeyn Israel, neem’s my ennym y hoiaghey son dy bragh: 8Chamoo neem’s cassyn Israel y scughey arragh ass y cheer hig mee da ny ayraghyn oc; my nee ad agh goaill kiarail dy yannoo cordail rish ny ta mee er n’oardaghey daue, as cordail rish ooilley yn leigh, ren my harvaant Moses y harey. 9Agh cha dug ad geill: as chleaynee Manasseh ad dy ve ny smessey na ny ashoonee va’n Chiarn er stroie rish cloan Israel.

10As loayr y Chiarn liorish e harvaantyn ny phadeyryn, gra, 11Er-yn-oyr dy vel Manasseh ree Yudah er n’yannoo ny peccaghyn eajee shoh, as er n’yannoo ny smessey na ooilley ny ren ny Amoriteyn va roish, as er hayrn Judah myrgeddin gys peccah lesh e yallooyn; 12Shen-y-fa myr shoh ta’n Chiarn Jee Israel gra, Cur-my-ner, ver-ym lhiam lheid yn olk er Jerusalem as Judah, quoi-erbee chlinnys jeh nee e chleayshyn feiyral. 13As sheeyn-yms magh harrish Jerusalem line towshan Samaria, as pontreil thie Ahab: as neem’s glenney Jerusalem myr ta claare er ny ghlenney, rubbey eh, as chyndaa e veeal fo. 14As treig-ym fooilliagh my eiraght, as livrey-ym ad gys laue nyn noidyn; as hig ad dy ve son cragh as spooilley da ooilley nyn noidyn; 15Er-yn-oyr da vel ad er n’yannoo shen ny va olk ayns my hilley, as er m’y vrasnaghey gys corree, er-dyn laa haink nyn ayraghyn magh ass Egypt, eer gys y laa t’ayn jiu. 16Ren Manasseh myrgeddin deayrtey mooarane fuill neu-chyndagh, derrey v’eh er lhieeney Jerusalem veih kione gy-kione; marish e pheccah hene huggey v’eh er hayrn Judah, ayns jannoo shen ny va olk ayns shilley yn Chiarn.

17Nish yn chooid elley jeh drogh obbraghyn Vanasseh, as ooilley ny ren eh, as y peccah v’eh er n’yannoo, nagh vel ad scruit ayns lioar recortyssyn reeaghyn Yudah? 18As chaddil Manasseh marish e ayraghyn; as v’eh oanluckit ayns garey yn thie echey hene, ayns garey Uzza: as ren Amon e vac reill ny ynnyd.

19Va Amon daa vleïn as feed dy eash tra ghow eh toshiaght dy reill, ass reill eh daa vleïn ayns Jerusalem. As ennym e voir va Meshullemeth, inneen Haruz jeh Jotbah. 20As ren eh olk ayns shilley yn Chiarn, myr va e ayr Manasseh er n’yannoo. 21As deiyr eh er ooilley raaidyn e ayr, as hirveish eh ny jallooyn va e ayr er hirveish, as hug eh ooashley daue: 22As hreig eh yn Chiarn, Jee e ayraghyn, as cha huill eh ayns raad y Chiarn.

23As ren sharvaantyn Amon girree-magh n’oï, as varr ad y ree ayns e hie hene. 24As pobble y cheerey stroie adsyn ooilley va er n’irree-magh noi ree Amon; as ren ad Josiah e vac ny ree ny ynnyd. 25Nish yn chooid elley jeh obbraghyn Amon, nagh vel ad scruit ayns lioar recortyssyn reeaghyn Yudah? 26As v’eh oanluckit ayns e oaie hene ayns garey Uzza: as ren Josiah e vac reill ayns e ynnyd.