CAB. XXII

1Va Josiah hoght bleeaney dy eash tra ghow eh toshiaght dy reill, as ren eh reill un vleïn jeig as feed ayns Jerusalem, As ennym e voir va Jedidah, inneen Adaiah jeh Boscath. 2As ren eh shen ny va cairagh ayns shilley yn Chiarn, as jimmee eh ayns slane raad Ghavid e ayr, as cha hyndaa eh dy lhiattee gys y laue yesh ny gys y laue chiare.

3As haink eh gy-kione, ayns y hoghtoo vleïn jeig jeh ree Josiah, dy dug y ree Shaphan mac Azaliah, mac Meshullam yn scrudeyr, gys thie yn Chiarn, gra, 4Gow seose gys Hilkiah yn ard-saggyrt, as lhig da coontey yn argid t’ayns thie yn Chiarn, ta porteryn ny giattyn er hroggal jeh’n pobble: 5As lhig daue shen y livrey gys laue oaseiryn yn obbyr, ta currym thie yn Chiarn orroo; as lhig dauesyn geeck eh da ny obbreeyn t’er thie yn Chiarn, dy cherraghey brishaghyn y thie. 6Da ny seyir, as da ny mainshtyryn-obbree, as masoonee, dy chionnaghey fuygh as claghyn cummit, dy yannoo seose yn thie. 7Ny-yeih, cha row coontey jeant roo jeh’n argid v’er ny livrey gys y laue oc, son dy ghell ad dy ynrick.

8As dooyrt Hilkiah yn ard-saggyrt rish Shaphan yn scrudeyr, Ta mee er gheddyn lioar y leigh ayns thie yn Chiarn. As hug Hilkiah yn lioar da Shaphan, as lhaih eh ayn. 9As haink Shaphan yn scrudeyr gys y ree, as dinsh eh da’n ree, as dooyrt eh, Ta dty harvaantyn er haglym yn argid v’er ny gheddyn ayns y thie, as t’ad er livrey eh gys laueyn ny obbreeyn ta currym thie yn Chiarn orroo. 10As hoilshee Shaphan yn scrudeyr da’n ree, gra, Ta Hilkiah yn saggyrt er livrey lioar dooys. As ren Shaphan lhaih eh fenish y ree. 11As haink eh gy-kione, tra va’n ree er chlashtyn goan lioar y leigh, dy raip eh e choamraghyn. 12As doardee yn ree da Hilkiah yn saggyrt, as Ahikam mac Shaphan, as Achbor mac Michaiah, as Shaphan yn scrudeyr, as Asahiah sharvaant y ree, gra, 13Immee-jee, as brie-jee jeh’n Chiarn er my hon’s, as son y pobble, as son ooilley Judah, mychione y lioar shoh t’er ny gheddyn: son s’mooar ta jymmoose y Chiarn t’er vrishey magh nyn ’oï, er-yn-oyr nagh vel ny ayraghyn ain er n’eaishtagh rish goan y lioar shoh, dy yannoo cordail rish ooilley ny ta scruit mychione ain. 14Myr shen hie Hilkiah yn saggyrt, as Ahikam, as Achbor, as Shaphan, as Asahiah, gys Huldah yn phadeyr, ben Shallum mac Tikvah, mac Harhas, va harrish ny coamraghyn casherick; (nish v’ee cummal ayns Jerusalem ayns schoill ny phadeyryn;) as ghow ad coyrle j’ee.

15As dooyrt ee roo, Shoh myr ta’n Chiarn Jee Israel gra, Insh-jee da’n dooinney hug shiu er y chaghteraght shoh hym’s, 16Myr shoh ta’n Chiarn gra, Cur-my-ner, ver-yms lhiam olk er yn ynnyd shoh, as er e chummaltee, eer ooilley goan y lioar ta ree Yudah er lhaih: 17Er-yn-oyr dy vel ad er m’y hreigeil, as er lostey incense gys jeeghyn joarree, dy m’y vrasnaghey gys corree lesh ooilley obbraghyn nyn laueyn; shen-y-fa bee my yymmoose er ny ghreesagh noi yn ynnyd shoh, as cha bee eh er ny vooghey. 18Agh rish ree Yudah, hug shiu dy vriaght jeh’n Chiarn, nee shiu gra, Myr shoh ta’n Chiarn Jee Israel gra, Mychione ny goan t’ou er chlashtyn; 19Er-yn-oyr dy row dty chree meiygh, as dy vel oo er injillaghey oo-hene kiongoyrt rish y Chiarn, tra cheayll oo shen ny loayr mee noi yn ynnyd shoh, as noi ny cummaltee echey, dy darragh ad dy ve nyn draartys as mollaght, as dy raip oo dty choamrey, as dy cheayn oo kiongoyrt rhym; ta mee myrgeddin er chlashtyn oo, ta’n Chiarn dy ghra. 20Cur-my-ner, er-y-fa shen, neem’s uss y haglym gys dty ayraghyn, as hed oo gys dty oaie ayns shee; as cha vaik dty hooillyn ooilley yn olk ver-yms lhiam er yn ynnyd shoh. As hoilshee ad shoh da’n ree.