CAB. XXIII

1As hug y ree sarey dy haglym cooidjagh huggey ooilley shanstyr Yudah as Yerusalem. 2As hie yn ree seose gys thie yn Chiarn, as ooilley deiney Yudah, as ooilley cummaltee Yerusalem mârish, as ny saggyrtyn, as ny phadeyryn, as ooilley yn pobble, chammah beg as mooar: as lhaih eh ayns nyn glashtyn ooilley goan lioar y chonaant, v’er ny gheddyn ayns thie yn Chiarn.

3As hass y ree liorish pillar, as ren eh conaant kiongoyrt rish y Chiarn, dy n’eiyragh ad er y Chiarn, as dy reayll e annaghyn as e recortyssyn as e lattyssyn, lesh ooilley nyn gree as ooilley nyn annym, dy chooilleeney goan y chonaant shoh va scruit ayns y lioar shoh: as hass ooilley yn pobble gys y chonaant. 4As doardee yn ree da Hilkiah yn ard-saggyrt, as da saggyrtyn yn nah choorse, as arreyderyn ny giattyn, dy chur lhieu magh ass chiamble y Chiarn ooilley ny siyn va jeant son Baal, as jalloo yn cheyll, as son ooilley rollageyn yn aer; as ren eh ad y lostey cheu-mooie jeh Jerusalem, ayns magheryn Kidron, as hug eh lesh yn leoie oc gys Beth-el. 5As hug eh sheese saggyrtyn ny jallooyn, va reeaghyn Yudah er phointeil dy lostey incense ayns ny ard-ynnydyn ayns ard-valjyn Yudah, as ayns ny ynnydyn mygeayrt Jerusalem; adsyn myrgeddin ren lostey incense da Baal, da’n ghrian, as da’n eayst, as da ny planetyn, as da ooilley pooaraghyn yn aer. 6As hug eh lesh magh jalloo ny keylley veih thie yn Chiarn, cheu-mooie jeh Jerusalem, gys strooan Kidron, as losht eh eh ec strooan Kidron, as vroo eh eh cha meein as joan, as spreih eh yn joan er oaiaghyn cloan y phobble. 7As vrish eh sheese thieyn ny Sodomiteyn, va liorish thie yn Chiarn, raad va ny mraane fee curtanyn son jalloo ny keylley. 8As deiyr eh magh ooilley ny saggyrtyn ass ard-valjyn Yudah, as ren eh caitnys jeh ny ard-ynnydyn raad va ny saggyrtyn er lostey incense, veih Geba gys Beer-sheba, as vrish eh sheese ynnydyn ardey ny giattyn, va liorish giat Yoshua, kiannoort yn ard-valley. 9Ny-yeih, cha row saggyrtyn ny ard-ynnydyn lowit dy heet seose gys altar y Chiarn ayns Jerusalem, agh va beaghey er-lheh oc mastey nyn mraaraghyn. 10As ren eh torran jeh Topheth, ta ayns coan cloan Hinnom, nagh jinnagh dooinney erbee er e vac ny e inneen dy gholl trooid yn aile gys Molech. 11As ghow eh ersooyl ny cabbil va reeaghyn Yudah er chasherickey gys y ghrian, ec giat thie yn Chiarn, liorish shamyr Nathan-melech yn shamyrder, cheu-mooie jeh’n ard-valley, as ren eh lostey fainee yn ghrian lesh aile. 12As ny altaryn va erskyn shamyr syrjey Ahaz, va reeaghyn Yudah er n’yannoo as ny altaryn va Manasseh er hroggal ayns daa chooyrt thie yn Chiarn, ren y ree y lhieggal, as brishey sheese veih shen, as cheau eh yn joan oc ayns strooan Kidron. 13As ny ard-ynnydyn va roïe ayns Jerusalem, va er laue yesh slieau ny oliveyn, va Solomon ree Israel er hroggal son Ashtoreth jalloo ny Zidonianee, as son Chemosh jalloo ny Moabiteyn, as son Milcom jalloo cloan Ammon, ren y ree an-chasherick. 14As vrish eh ayns peeshyn ny jallooyn, as yiare eh sheese ny biljyn, as lhieen eh ny ynnydyn oc lesh craueyn deiney.

15Vrish eh sheese myrgeddin yn altar va ayns Beth-el, as yn ard-ynnyd ren Jeroboam mac Nebat, hayrn Israel fo peccah; vrish eh sheese yn altar as yn ard-ynnyd, as hug eh aile er yn ard-ynnyd, as vroo eh eh cha meein as joan, as losht eh yn cheyll. 16As myr va Josiah cur shilley mygeayrt, honnick eh ny oaiaghyn ayns y chronk, as doardee eh ny craueyn dy ve goit ass ny oaiaghyn, as dy ve losht er yn altar, as dy an-chasherickey eh, cordail rish goo yn Chiarn, loayr yn dooinney dy Yee, ren fockley ny goan shoh. 17Eisht dooyrt eh, Cre’n screeu shen ta mee dy akin? As dinsh deiney yn ard-valley da, Shoh lhiaght yn dooinney dy Yee haink veih Judah, ren fockley magh shen ny t’ou uss er n’yannoo noi altar Veth-el. 18As dooyrt eh, Faag-jee eh; ny lhig da dooinney erbee scughey ny craueyn echey: myr shen daag ad e chraueyn, marish craueyn yn phadeyr haink ass Samaria. 19As ren Josiah myrgeddin lhieggal ooilley thieyn ny ard-ynnydyn v’ayns ard-valjyn Samaria, va reeaghyn Israel er n’yannoo dy vrasnaghey yn Chiarn gys corree, as ren eh roosyn cordail rish ooilley ny v’eh er n’yannoo ayns Beth-el. 20As hug eh gy-baase ooilley saggyrtyn ny ard-ynnydyn shen er ny altaryn, as losht eh craueyn deiney orroo, as hyndaa eh reesht gys Jerusalem.

21As doardee yn ree da ooilley yn pobble, gra, Freill-jee feailley ny caisht gys y Chiarn yn Jee eu, myr te scruit ayns lioar y chonaant shoh. 22Shickyr cha row lheid y chaisht er ny reayll er-dy laghyn ny briwnyn ren Israel y vriwnys, ny rish lhing reeaghyn Israel, ny reeaghyn Yudah; 23Agh ayns yn hoghtoo vleïn jeig jeh ree Josiah, ayn va’n chaisht shoh er ny reayll gys y Chiarn ayns Jerusalem. 24Myrgeddin ny faishnee, as ny fir-obbee, as ny caslyssyn, as ny jallooyn, as ooilley ny cliaghtaghyn eajee va ry-akin ayns cheer Yudah, as ayns Jerusalem, hug Josiah ersooyl, dy voddagh eh cooilleeney goan y leigh va scruit ayns y lioar hooar Hilkiah yn saggyrt ayns thie yn Chiarn. 25As roishyn cha row ree erbee goll-rish, hyndaa gys y Chiarn lesh ooilley e chree, as lesh ooilley e annym, as lesh ooilley e niart, cordail rish ooilley leigh Voses; chamoo hrog fer erbee ny lurg casley rishyn.

26Ny-yeih, cha hyndaa yn Chiarn veih chiass e chorree vooar, lesh va e yymmoose er ny vrasnaghey noi Judah, kyndagh rish ooilley ny peccaghyn va Manasseh er n’yannoo dy vrasnaghey eh lhieu. 27As dooyrt y Chiarn, Neem’s Judah myrgeddin y scughey ass my hilley myr ta mee er scughey Israel, as jiooldey voym yn ard-valley shoh Jerusalem ren mee y reih, as y thie my-e-chione dooyrt mee, Bee my ennym ayns shen. 28Nish yn chooid elley jeh obbraghyn Josiah, as ooilley ny ren eh, nagh vel ad scruit ayns lioar recortyssyn reeaghyn Yudah?

29Rish y lhing echeysyn hie Pharaoh-nechoh ree Egypt seose gys caggey noi ree Assyria gys awin Euphrates: as hie ree Josiah magh n’oï; as ren eh y varroo ec Megiddo, cha leah as haink ad dy cheilley. 30As hug e harvaantyn lhieu eh ayns fainagh veih Megiddo marroo gys Jerusalem, as doanluck ad eh ayns e oaie hene. As ghow pobble ny cheerey Jehoahaz mac Josiah, as dooilee ad eh, as ren ad eh ny ree ayns ynnyd e ayr.

31Va Jehoahaz three bleeaney as feed dy eash tra ghow eh toshiaght dy reill; as ren eh reill three meeaghyn ayns Jerusalem. As ennym e voir va Hamutal, inneen Jeremiah jeh Libnah. 32As ren eh shen ny va olk ayns shilley yn Chiarn, cordail rish ooilley ny va e ayraghyn er n’yannoo. 33As hug Pharaoh-nechoh eh ayns geulaghyn ec Riblah, ayns cheer Hamath, nagh jinnagh eh reill ayns Jerusalem; as hug eh yn cheer fo keesh keead talent dy argid, as talent dy airh. 34As ren Pharaoh-nechoh Eliamim mac Josiah ny ree, ayns ynnyd Josiah e ayr, as chaghlaa eh yn ennym echey gys Jehoiakim, as ghow eh Jehoahaz ersooyl: as haink eh gys Egypt, as hooar eh baase ayns shen. 35As hug Jehoiakim yn argid as yn airh da Pharaoh; agh hug eh yn cheer fo keesh dy yannoo magh yn argid cordail rish oardagh Pharaoh: hrog eh yn argid as yn airh jeh pobble ny cheerey, jeh dagh dooinney rere e cheesh, dy choyrt eh da Pharaoh-nechoh.

36Va Jehoiakim queig bleeaney as feed dy eash tra ghow eh toshiaght dy reill; as va e reill un vleïn jeig ayns Jerusalem: as ennym e voir va Zebudah, inneen Pedaiah jeh Rumah. 37As ren eh shen ny va olk ayns shilley yn Chiarn, cordail rish ooilley ny va e ayraghyn er n’yannoo.