CAB. XXV

1As haink eh gy-kione, ayns y nuyoo vleïn jeh’n reill echey, ayns y jeihoo vee, er y jeihoo laa jeh’n vee, dy daink Nebuchadnezzar ree Vabylon, eh-hene as ooilley’n cheshaght-chaggee echey, noi Jerusalem, as ren ad campal n’oï, as hrog ad tooryn n’oï cruin mygeayrt. 2As va’n ard-valley er ny hionney stiagh derrey’n un vleïn jeig jeih reill Zedekiah. 3As er y nuyoo laa jeh’n chiarroo vee ghow’n gortey niart ayns yn ard-valley, as cha row beaghey son ny cummaltee.

4As va’n ard-valley er ny vrishey seose, as ren ooilley ny deiney-caggee cosney ersooyl ’syn oie, rish raad ny giattey, eddyr y daa voalley, ta liorish garey’n ree: (nish va ny Caldeeyn er chruinnaghey yn ard-valley mygeayrt:) as ghow yn ree raad y cheer-rea. 5As hie sheshaght-caggee ny Caldeeyn er-eiyrt’s y ree, as verr ad er ayns thalloo-rea Yericho: as va ooilley yn cheshaght-chaggee er ny skeayley voish. 6Myr shen ghow ad y ree, as hug ad lhieu eh seose gys ree Vabylon, gys Riblah; as hug ad briwnys er. 7As varr ad mec Zedekiah roish e hooillyn, as hug ad ny sooillyn ass Zedekiah, as chiangle ad eh lesh geulaghyn prashey, as hug ad lhieu eh gys Babylon.

8As ayns y wheiggoo vee, er y chiaghtoo laa jeh’n vee, (ta shen yn nuyoo vleïn jeig jeh ree Nebuchadnezzar ree Vabylon,) haink Nebuzaradan, captan y ghard, sharvaant ree Vabylon, gys Jerusalem: 9As losht eh thie yn Chiarn, as thie yn ree, as ooilley thieyn Yerusalem, as losht eh thieyn ny ard-gheiney lesh aile. 10As ren ooilley sheshaght-caggee ny Caldeeyn, va marish captan y ghard, brishey sheese voallaghyn Yerusalem ooilley mygeayrt. 11Nish yn chooid elley jeh’n pobble va faagit ayns yn ard-valley, as adsyn hie harrish gys ree Vabylon, marish ymmodee elley, hug Nebuzaradan captan y ghard lesh ersooyl. 12Agh daag captan y ghard paart jeh boghtyn y cheerey, dy ve mysh ny garaghyn-feeyney, as son eirinnee. 13As ny pillaryn prashey va ayns thie yn Chiarn, as ny binkyn, as y 25:13 Saagh yindyssagh mooar.faarkey prashey ayns thie yn Chiarn, vrish ny Caldeeyn ayns peeshyn, as hug ad lhieu yn phrash gys Babylon. 14As ny pooiyt, as ny sleaystyn, as ny smalyderyn, as ny spainyn, as ooilley ny siyn prashey va son shirveish y chiamble, ghow ad ersooyl. 15As ny pannyn aile, as ny claareeyn, as stoo airh, ayns airh, as stoo argid, ayns argid, hug captan y ghard lesh ersooyl. 16As y daa phillar, un aarkey, as ny binkyn, ren Solomon son thie yn Chiarn; va prash ooilley ny siyn shoh erskyn dy chooilley howse. 17Va yrjid un phillar hoght cubityn jeig, as va’n kione mullee echey prash: as va yrjid y chione three cubityn; as yn obbyr-cassee, as ny pomegranateyn er y kione runt mygeayrt, ooilley dy phrash: as va’n nah phillar casley roo shoh ayns obbyr-cassee.

18As ghow captan y ghard Seraiah yn ard-saggyrt, as Zephaniah yn nah haggyrt, as three arreyderyn ny giattyn: 19As ghow eh ard-chaptan yn ard-valley va soit harrish ny deiney-caggee, as queig deiney jeh fir-choyrlee yn ree, v’er ny gheddyn ’syn ard-valley, as ard-scrudeyr yn cheshaght-chaggee, ren musteral pobble ny cheerey, as three-feed dooinney jeh ny cummaltee v’er ny gheddyn ayns yn ard-valley. 20As ghow Nebuzaradan, captan y ghard, ad shoh, as hug eh lesh ad gys ree Vabylon gys Riblah. 21As woaill ree Vabylon ad, as varr eh ad ec Riblah, ayns cheer Hamath. Shoh myr va Judah er nyn goyrt lhieu ass y cheer oc hene.

22Agh son y pobble v’er-mayrn ayns cheer Yudah, va Nebuchadnezzar ree Vabylon er n’aagail ayn, eer harrystoo shoh ren eh Gedaliah mac Ahikam, mac Shaphan, ny chiannoort. 23As tra va ooilley captanyn ny sheshaghtyn-caggee, as ny deiney oc er chlashtyn dy row ree Vabylon er n’yannoo Gedaliah yn kiannoort, haink Ishmael mac Nethaniah, Johanan mac Chareah, as Seraiah mac Tanhumeth yn Netophathite, as Jaazaniah mac Maachathite, adsyn as ny deiney oc, gys Gedaliah ec Mizpah. 24As dauesyn, as da ny deiney va mâroo, ren Gedaliah breearrey, as dooyrt eh roo, Ny bee aggle erriu dy ve fo ny Caldeeyn: cum-jee ayns y cheer, as shirveish-jee ree Vabylon, as nee shiu farrail dy mie. 25As haink eh gy-kione ayns y chiaghtoo vee, dy daink Ishmael mac Nethaniah, mac Elishama, jeh’n sluight reeoil, as jeih deiney mârish, as woaill ad Gedaliah dy dooar eh baase, as ny Hewnyn as ny Caldeeyn va mârish ec Mizpah. 26As dirree ooilley yn pobble, chammah beg as mooar, as captanyn ny sheshaghtyn-caggee, as haink ad gys Egypt, son v’ad ayns aggle roish ny Caldeeyn.

27Haink eh gy-kione ayns y chiaghtoo vleïn jeig as feed jeh cappeeys Jehoiachin ree Yudah, ayns y nah vee yeig, er y chiaghtoo laa as feed jeh’n vee, dy ren Evil-merodach, ree Vabylon, ayns y chied vleïn jeh e reill, kione Jehoiachin ree Yudah y hroggal seose ass pryssoon; 28As loayr eh dy dooie rish, as hoie eh yn stoyl-reeoil echey erskyn stuill-reeoil ny reeaghyn va mârish ayns Babylon; 29As ren eh caghlaa e gharmadyn pryssoon: as d’ee eh arran dy kinjagh marish hene ooilley laghyn e vea. 30As va lowanse kinjagh er ny choyrt da liorish y ree, wheesh shen gour y laa, choud as v’eh bio.