CAB. IV

1Nish deïe ben dy row jeh mraane mec ny phadeyryn gys Elisha, gra, Ta dty harvaant my heshey marroo; as ta fys ayd’s dy row dty harvaant ayns aggle y Chiarn: as ta’n eeaseyder er jeet dy ghoaill da hene my ghaa vac dy ve e harvaantyn bondee. 2As dooyrt Elisha r’ee, Cre nee’m er dty hon? insh dou: cre t’ayd ’sy thie? as dooyrt ee, Cha vel nhee erbee ec dty harvaant ’sy thie agh saagh dy ooil. 3Eisht dooyrt eh, Immee as eeasee dhyt siyn veih ooilley dty naboonyn mygeayrt, eer siyn follym; eeasee whilleen as oddys oo. 4As tra hig oo stiagh, nee oo yn dorrys y yeigh ort hene as er dty vec, as nee oo theaymey magh ayns ooilley ny siyn shen, as ver oo dy lhiattee shen ny vees lane. 5Myr shen hie ee rhymbee, as yeigh ee yn dorrys urree hene, as er e mec, hug lhieu ny siyn, as ren ee deayrtey magh. 6As haink eh gy-kione, tra va ny siyn lane, dy dooyrt ee rish e mec, Cur-jee lhieu foast hym saagh elley. As dooyrt ad r’ee, Cha vel saagh arragh ayn. As scuirr yn ooil dy vishaghey. 7Eisht haink ee, as dinsh ee da’n dooinney dy Yee: as dooyrt eh, Gow, as creck yn ooil, as eeck dty lhiastyn, as jean uss as dty chloan beaghey er y fooilliagh.

8As haghyr eh er laa dy row, dy jagh Elisha gys Shunem, raad va ben ooasle; as ren ee cuirrey eh dy ghoaill beaghey. As myr shen ve, cha mennick as hie eh shaghey, dy hyndaa eh stiagh dy ghoaill beaghey. 9As dooyrt ee rish e sheshey, cur-my-ner nish, ta mee cur tastey dy nee dooinney casherick dy Yee eh shoh, ta cha mennick goll shaghey. 10Lhig dooin, ta mee guee ort, shamyr veg y yannoo er y voalley, as soiaghey seose ayns shen er e hon lhiabbee, as boayrd, stoyl, as kainlere; tra hig eh nyn raad, dy vod eh goaill aaght ayns shen. 11As haghyr eh er laa dy row, dy daink eh gys shen, as hie eh stiagh ’sy chiamyr, as ghow eh aaght ayn. 12As dooyrt eh rish Gehazi e harvaant, Eïe er y Shunammite shoh. As tra v’eh er n’eamagh urree, hass ee kiongoyrt rish. 13As dooyrt eh rish, Abbyr nish r’ee, Cur-my-ner, fakin dy vel oo er ghoaill ooilley’n chiarail shoh er nyn son; cre ta dy ve jeant er dty hon? nailt’s shin dy loayrt er dty hon rish y ree, ny rish ard-chaptan y cheshaght-chaggee? As dreggyr ee, Ta mee cummal mastey my phobble hene. 14As dooyrt eh, Cre ta eisht dy ve jeant er e son? As dreggyr Gehazi, Cur-my-ner, cha vel lhiannoo eck, as ta’n sheshey eck shenn. 15As dooyrt eh, Eïe urree; as tra v’eh er n’eamagh urree, hass ee ec y dorrys. 16As dooyrt eh, Veih’n imbagh shoh ayns y traa cooie, nee uss mac y ymmyrkey. As dooyrt ee, Guee-ym ort, my hiarn, uss ghooinney dy Yee, ny jean craidey mysh dty harvaant. 17As ren y ven giennaghtyn, as dymmyrk ee mac ec yn imbagh shen, cordail rish y traa va Elisha er n’insh jee jeh.

18As tra va’n lhiannoo er n’aase, haghyr eh er laa, dy jagh eh magh gys e ayr, ec ny beayneeyn. 19As dooyrt eh rish e ayr, My chione, my chione! As dooyrt eh rish scollag, Cur lhiat eh gys e voir. 20As erreish da v’er ghoaill eh, as er chur lesh eh gys e voir, hoie eh er e glioonyn derrey’n vun-laa, as eisht phaart eh. 21As hie ee seose, as hug ee eh nyn lhie er lhiabbee’n dooinney dy Yee, as yeigh ee yn dorrys er, as hie ec magh. 22As deïe ee gys e sheshey, as dooyrt ee, Cur hym, ta mee guee ort, fer jeh ny deiney aegey, as unnane jeh ny assylyn, dy voddym roie gys y dooinney dy Yee, as cheet reesht. 23As dooyrt eh, Cre’n-oyr t’ayd er gholl huggey jiu? cha nee eayst-noa t’ayn, ny doonaght. As dooyrt ee, Bee ooilley dy mie. 24As yeelt ee assyl, as dooyrt ee rish e sharvaant, Eiyr, as cur er dty hoshiaght; ny lhaggee dty imman er my hon’s, mannagh jir-ym rhyt. 25Myr shen hie ee, as haink ee gys y dooinney dy Yee gys cronk Carmel. As shen myr ve, tra honnick yn dooinney dy Yee ee foddey jeh, dy dooyrt eh rish Gehazi e harvaant, Cur-my-ner, she yn Shunammite: 26Roie nish, ta mee guee ort, ny quail; as abbyr r’ee, Vel eh dy mie mayrt? vel dty heshey dy mie? vel dty lhiannoo dy mie? As dreggyr ee, Myr shen. 27As tra v’ee er jeet gys y dooinney dy Yee er y chronk, huitt ee sheese ec e chassyn: agh haink Gehazi er-gerrey dy choyrt voish ee. As dooyrt y dooinney dy Yee, Faag ee: ta’n annym eck seaghnit cheu-sthie j’ee; as ta’n Chiarn er cheiltyn shoh voym’s, as cha vel eh er n’insh dou. 28Eisht dooyrt ee, Ren mish mac y yeearree jeh my hiarn? nagh dooyrt mee, Ny jean m’y volley? 29Eisht dooyrt eh rish Gehazi, Kiangle seose dty veeghyn, as gow my lorg ayns dty laue, as immee royd: my veeitys oo dooinney erbee, ny loayr rish; as my nee dooinney erbee, ny loayr rish; as my nee dooinney erbee loayrt rhyt’s, ny fuirree dy choyrt ansoor da: as lhie my lorg er eddin y lhiannoo. 30As dooyrt moir y lhiannoo, Myr ta’n Chiarn bio, as myr ta dt’annym’s bio, cha vaag-yms oo As hrog eh er, as deiyr eh urree. 31As hie Gehazi er e hoshiaght rhymboo, as lhie eh yn lorg er eddin y lhiannoo; agh cha row coraa, ny clashtyn: shen-y-fa hyndaa eh dy gholl ny whail, as dinsh eh da, gra, Cha vel y lhiannoo er ghoostey. 32As tra va Elisha er jeet stiagh ’sy thie, cur-my-ner, va’n lhiannoo marroo, as ny lhie er e lhiabbee. 33Hie eh stiagh, er-y-fa shen, as yeigh eh yn dorrys orroo hene ny-neesht, as ghuee eh gys y Chiarn. 34As hie eh seose, as lhie eh er y lhiannoo, as hug eh e veeal er beeal y lhiannoo, as e hooillyn er ny sooillyn echey, as heeyn eh eh-hene er y lhiannoo; as haink chiass ayns feill y lhiannoo. 35Eisht hyndaa eh, as huill eh noon as noal ayns y thie; as hie eh seose, as heeyn eh eh-hene er: as ren y lhiannoo streghernee shiaght keayrtyn, as doshil y lhiannoo e hooillyn. 36As deïe eh er Gehazi, as dooyrt eh, Eïe er y Shunammite shoh. Myr shen deïe eh urree. As tra v’ee er jeet stiagh huggey, dooyrt eh, Trog seose dty vac. 37Eisht hie ee stiagh, as huitt ee ec e chassyn, as chroym ee ee-hene gys y thalloo, as ghow ee seose e mac, as hie ee magh.

38As haink Elisha reesht gys Gilgal, as va genney ’sy cheer, as va mec ny phadeyryn nyn soie kiongoyrt rish: as dooyrt eh rish e harvaant, Soie’n pot mooar er yn aile, as jean poddash y aarlaghey son mec ny phadeyryn. 39As hie fer magh ’sy vagher dy hymsaghey lossreeyn, as hooar eh [myr heill eh] billey-feeyney feïe, as heigh eh jeh slane skyrtlagh dy ghourdyn feïe, as haink eh, as yiare eh ad dy myn ’sy phot phoddash: son cha row fys oc cre v’ad. 40Myr shen gheayrt ad magh son ny deiney dy ee: as haink eh gy-kione, myr v’ad gee jeh’n phoddash, dy deïe ad magh, as dooyrt ad, O uss ghooinney dy Yee, ta baase ’sy phot: as cha voddagh ad gee jeh. 41Agh dooyrt eh, Eisht cur-jee lhieu meinn, as ceau-jee eh ayns y phot: as dooyrt eh, Deayrt magh da’n pobble, dy vod ad gee. As cha row skielley ’sy phot.

42As haink dooinney veih Baal-shalisha, as hug eh lesh arran gys y dooinney dy Yee jeh ny chied-vessyn, feed bwilleen oarn, as jeeassyn creen dy arroo ayns poagey. As dooyrt eh, Cur da’n phobble, dy vod ad gee. 43As dooyrt e hirveishagh, Cre ta shoh dy hoiaghey roish keead dooinney? Dreggyr eshyn reesht, Cur da’n pobble, dy vod ad gee: son myr shoh ta’n Chiarn dy ghra, Nee ad gee, as faagys ad fooilliagh jeh. 44Myr shen hoie eh rhymboo eh, as ren ad gee, as va fooilliagh oc jeh, cordail rish raa’n Chiarn.