CAB. V

1Nish va Naaman, captan sheshaght-caggee ree Syria, ny ghooinney ooasle kiongoyrt rish e vainshtyr, as onnoroil; er-yn-oyr dy row’n Chiarn liorishyn er choyrt barriaght da Syria: v’eh myrgeddin ny ghooinney niartal ayns caggey; agh v’eh ny lourane. 2As va ny Syrianee er n’gholl magh liorish sheshaghtyn, as er choyrt lhieu ersooyl ben aeg ny pryssoonagh ass cheer Israel; as v’ee tendeil er ben Naaman. 3As dooyrt ee rish e ben-ainshtyr, Dy baillish Jee dy beagh my hiarn marish y phadeyr t’ayns Samaria! son yinnagh eh lheihys eh jeh’n louraanys echey. 4As hie fer stiagh, as dinsh eh da e hiarn, gra, Shoh as myr shoh dooyrt y ven aeg ta jeh cheer Israel. 5As dooyrt ree Syria, Immee, as ver-yms screeuyn gys ree Israel. As hie eh roish, as ghow eh mârish jeih talentyn dy argid, as jeih thousane peesh dy airh, as jeih caghlaaghyn coamrey. 6As hug eh lesh y screeuyn gys ree Israel, gra, Nish tra hig y screeuyn shoh gys dty laue, cur-my-ner, ta mee lesh er choyrt hood’s Naaman my harvaant, dy vod uss eh y lheihys jeh e louraanys. 7As haink eh gy-kione, tra va ree Israel er lhaih yn screeuyn, dy raip eh e choamrey, as dooyrt eh, Nee Jee mish, dy choyrt baase ny bioys, dy vel y dooinney shoh cur chaghteraght hym’s dy lheihys dooinney jeh e louraanys? Shen-y-fa toig-jee, ta mee guee erriu, as jeeagh-jee kys t’eh shirrey oyr dy huittym magh rhym.

8Aw ve myr shen, tra va Elisha yn dooinney dy Yee er chlashtyn dy row ree Israel er raipey e choamrey, dy dug eh fys gys ree Israel, gra, Cre’n-fa t’ou er raipey dty choamrey? lhig da nish cheet hym’s, as bee fys echey dy vel phadeyr ayns Israel. 9Myr shen haink Naaman lesh e chabbil, as lesh e ainagh, as hass eh ec dorrys thie Elisha. 10As hug Elisha chaghter huggey, gra, Gow as niee ayns Jordan shiaght keayrtyn, myr shen hig dt’eill dy ve myr ve roïe, as bee oo glen. 11Agh va Naaman jymmoosagh, as hie eh roish, as dooyrt eh, Cur-my-ner, smooinee mee, Hig eh son shickyrys magh hym’s, as shassoo, as geamagh er ennym y Chiarn e Yee, as strugey e laue harrish y boayl doghanagh, as slaanaghey yn lourane. 12Nagh vel Abana as Pharpar, awinyn Damascus, ny share na ooilley ushtaghyn Israel? nagh voddym niee ayndoo as ve glen? Myr shen hyndaa eh, as jimmee eh roish ayns jiarg-eulys. 13As haink e harvaantyn er-gerrey, as loayr ad rish, as dooyrt ad, My ayr, dy beagh y phadeyr er chur royd red erbee doillee dy ve jeant, nagh beagh oo er n’yannoo eh? cre-woad sassey te eisht, tra t’eh gra rhyt, Niee, as bee oo glen? 14Eisht hie eh sheese, as ren eh thummey eh-hene shiaght keayrtyn ayns Jordan, cordail rish raa’n dooinney dy Yee: as haink yn eill echey dy ve reesht myr feill lhiannoo aeg, as v’eh glen.

15As hyndaa eh gys y dooinney dy Yee, eshyn as ooilley e heshaght, as haink eh, as hass eh kiongoyrt rish: as dooyrt eh, Cur-my-ner, ta fys aym nish nagh vel Jee erbee ayns ooilley’n seihll agh ayns Israel: nish er-y-fa shen, ta mee guee ort, gow bannaght veih dty harvaant. 16Agh dooyrt eh, Myr ta’n Chiarn bio, ayns e enish ta mee my 5:16 Shirveish. hassoo, cha jean-ym veg y ghoaill. As hionn eh er dy ghoaill eh; agh dob eh. 17As dooyrt Naaman, Nagh bee eisht, ta mee guee ort, er ny choyrt da dty harvaant laad daa vule dy ooir? son cha jean dty harvaant maghey shoh chebbal oural-losht ny oural erbee gys jeeghyn elley, agh gys y Chiarn. 18Ayns y red shoh dy leih’n Chiarn da dty harvaant, tra hig my vainshtyr gys thie Rimmon, dy choyrt ooashley ayns shen, as my laue’s gymmyrkey lesh, as mee-hene croymmey ayns thie Rimmon; tra chroym mee sheese mee-hene ayns thie Rimmon, dy jean y Chiarn dty harvaant y phardooney ’sy chooish shoh. 19As dooyrt eh rish, Immee royd ayns shee. Myr shen hie eh voish tammylt dy raad.

20Agh dooyrt Gehazi, sharvaant Elisha yn dooinney dy Yee, Cur-my-ner, ta my vainshtyr er lhiggey lesh Naaman yn Syrian shoh, ayns nagh ghow eh veih e laue shen hug eh lesh: agh myr ta’n Chiarn bio, roie-yms geiyrt er, as goyms kuse ennagh veih. 21Myr shen deiyr Gehazi er Naaman: as tra honnick Naaman eh roie geiyrt er, harlheim eh veih’n ainagh dy gholl ny whail, as dooyrt eh, Vel ooilley dy mie? 22As dooyrt eh, Ta ooilley dy mie. Ta my vainshtyr er m’y choyrt, gra, Cur-my-ner, eer ec y traa shoh t’er jeet hym’s veih slieau Ephraim daa ghooinney aegey jeh mec ny phadeyryn: cur daue, ta mee guee ort, talent dy argid, as daa chaghlaa coamrey. 23As dooyrt Naaman, Ny abbyr arragh, gow daa halent. As hionn eh er, as chiangle eh yn daa halent ayns daa vag, marish daa chaghlaa coamrey, as hug eh ad er jees jeh e harvaantyn; as hug ad lhieu ad roish. 24As tra haink ad gys y toor, ghow eh ad veih nyn laue, as dollee eh ad ’sy thie: as lhig eh yn raad da ny deiney, as jimmee ad rhymboo. 25As hie eh-hene stiagh, as hass eh fenish e vainshtyr. As dooyrt Elisha rish, Cre veih t’ou er jeet, Gehazi? As dooyrt eh, Cha jagh dty harvaant raad erbee. 26As dooyrt eh rish, Nagh row my chree er dt’eiyrt’s, tra hyndaa’n dooinney reesht veih’n ainagh echey dy heet dty whail? Nee shoh traa dy ghoaill argid, as coamraghyn, as garaghyn-olive, as garaghyn-feeyney, as kirree, as dew, as fir-vooinjerey, as sharvaantyn? 27Nee louraanys Naaman er-y-fa shen lhiantyn dhyt’s, as da dty luight son dy bragh. As hie eh magh ass e enish ny lourane cha gial as sniaghtey.