CAB. VI

1AS dooyrt mec ny phadeyryn rish Elisha, Cur-my-ner nish, ta’n ynnyd raad ta shin cummal mayrt’s ro choon er nyn son. 2Lhig dooin goll, ta shin guee ort, gys Jordan, dy chooilley ghooinney j’in dy gheddyn fuygh veih shen, as ayns shen lhig dooin thie fondagh y hroggal dooin hene dy chummal ayn. As dreggyr eh, Immee-jee. 3As dooyrt fer jeu, Lhig da ve dt’aigney, ta mee guee ort, dy gholl marish dty harvaantyn. As dooyrt eh, Neem’s goll. 4Er shoh hie eh mâroo. As tra v’ad er jeet gys Jordan, yiare ad sheese fuygh. 5Agh myr va fer lhieggal sheese billey, huitt kione y teigh ayns yn ushtey: as deïe eh, as dooyrt eh, Ah treih, vainshtyr! son ve eeasit. 6As dooyrt y dooinney dy Yee, Cre’n raad huitt eh? As yeeagh eh da yn ynnyd. As yiare eh sheese banglane, as cheau eh ayns shen eh; as haink yn yiarn er yn eaghtyr. 7Eisht dooyrt eh, Gow hood eh. As heeyn eh magh e laue, as hrog eh eh.

8Eisht ren ree Syria caggey noi Israel, as ghow eh coyrle marish ny fir-oik echey, gra, Ayns lheid as lheid yn ynnyd vees my champ. 9As hug yn dooinney dy Yee fys gys ree Israel, gra, Bee er dty hwoaie nagh gow shaghey lheid y boayl shen; son shen y raad ta ny Syrianee nyn lhie cooyl-chlea. 10As hug ree Israel scrialtee gys yn ynnyd mychione va’n dooinney dy Yee er n’insh as er chur raaue da, as haue eh eh-hene liorish nagh jagh eh ayns shen, keayrt as keayrt. 11Shen-y-fa va cree ree Syria dy mooar seaghnit mysh y chooish shoh, as deïe eh er ny fir-oik echey, as dooyrt eh roo, Nagh n’insh shiu dou, quoi ny mast’ ain t’er vrah shin gys ree Israel? 12As dooyrt fer jeh e offishearyn, Cha vel unnane, my hiarn, O ree: agh ta Elisha, yn phadeyr t’ayns Israel, ginsh da ree Israel ny goan t’ou uss dy loayrt ayns dty hiamyr-lhiabbagh.

13As dooyrt eh, Immee-jee, as fow-jee magh e oayll, dy voddym’s deiney ’choyrt dy ghoaill eh. As ve inshit da, gra, cur-my-ner, t’eh ayns Dothan. 14Shen-y-fa hug eh gys shen cabbil, as fainee, as sheshaght mooar caggee: as haink ad ’syn oie, as chruinnee ad yn ard-valley ooilley mygeayrt. 15As tra va sharvaant yn dooinney dy Yee er n’irree dy moghey, as er n’gholl magh, cur-my-ner, va sheshaght-caggee er chruinnaghey yn ard-valley, chammah lesh cabbil, as fainee: as dooyrt e harvaant rish, Ah treih, my vainshtyr! cre’n erree hig orrin? 16As dreggyr eh, Ny bee aggle ort; son t’adsyn ta mârin ny s’troshey na adsyn ta mâroosyn. 17As ghow Elisha padjer, as dooyrt eh, Hiarn, ta mee guee ort, foshil ny sooillyn echey dy vod eh fakin. As doshil y Chiarn sooillyn y dooinney aeg, as honnick eh; as cur-my-ner, va’n slieau lane dy chabbil as dy ainee aile ooilley mygeayrt Elisha. 18As tra haink ad neose huggey, ghow Elisha padjer gys y Chiarn, as dooyrt eh, Cur shaghrynys, ta mee guee ort, er soilshey yn pobble shoh. As woaill eh ad lesh dellid, cordail rish goo Elisha.

19As dooyrt Elisha roo, Cha nee shoh’n raad, chamoo she shoh’n ard-valley; eiyr-jee orrym’s, as ver-ym lhiam shiu gys y dooinney ta shiu dy hirrey. Agh leeid eh ad gys Samaria. 20As haink eh gy-kione tra v’ad er jeet gys Samaria, dy dooyrt Elisha, Hiarn, foshil sooillyn ny deiney shoh dy vod ad fakin. As doshil yn Chiarn ny sooillyn oc, as honnick ad; as cur-my-ner, v’adsyn ayns mean Samaria. 21As dooyrt ree Israel rish Elisha, tra honnick eh ad, My ayr, bwoaill-ym ad? jean-ym ad y woalley? 22As dreggyr eh, Cha der oo dty laue orroo: jinnagh oo adsyn y yiarey jeh t’ou dy ghoaill nyn gappee lesh dty chliwe as lesh dty vhow? Soie arran as ushtey roue, dy vod ad gee as giu, as goll gys nyn mainshtyr. 23As doardee eh dy aarlaghey palchey beaghey er nyn son: as tra v’ad er n’ee as er n’iu, lhig eh yn raad daue, as hie ad gys nyn mainshtyr. Myr shen cha daink spooilleyderyn ny Syrianee arragh gys cheer Israel.

24Agh haink eh gy-kione, lurg shoh, dy haggil Ben-hadad ree Syria yn slane sheshaght-caggee echey, as hie eh seose, as ren eh caggey noi Samaria. 25As va gortey vooar ayns Samaria: as cur-my-ner, chruinnee ad eh cha chion shen, dy row kione assyl er ny chreck son kiare-feed peesh dy argid, as mysh punt dy arroo greddanit son queig peeshyn dy argid. 26As myr va ree Israel goll shaghey er y voalley, deïe ben huggey gra, Cooin lhiam, my hiarn, O ree. 27As dooyrt eh, Mannagh gooin y Chiarn lhiat, kys oddym’s cooney lhiat? nee veih laare y toalt, ny ass y doagh-feeyney? 28As dooyrt y ree, Cre ta jannoo ort? As dooyrt ee, Dooyrt y ven shoh rhym, Cur dooin dty vac, dy vod mayd gee eh jiu; as nee mayd gee my vac’s mairagh. 29Er shoh vroie shin my vac, as d’ee shin eh: as dooyrt mee r’ee yn laa er-giyn, Cur dooin dty vac, dy vod mayd gee eh; as t’ee er cheiltyn y mac eck.

30As haink eh gy-kione, tra cheayll y ree goan y ven, dy raip eh e choamrey, as hie eh shaghey er y voalley; as yeeagh ’y pobble, as cur-my-ner, va aanrit-sack er, by-niessey da e chorp. 31Eisht dooyrt eh, Myr shen as ny smoo dy jean Jee rhym’s, my vees kione Elisha mac Shaphat faagit shassoo er y laa jiu. 32Agh va Elisha soie ayns e hie, (as y chanstyr nyn soie mârish:) as hug y ree dooinney voish hene, agh roish my rosh y chaghter huggey, dooyrt eh rish y chanstyr, Vaik-jee kys ta mac y dunver shoh er choyrt dy ghoaill y chione jee’m? jeeagh-jee, tra hig y chaghter, jeigh-jee yn dorrys, as cum-jee eh dy shickyr ec y dorrys; nagh vel sheean cassyn e vainshtyr ec e voynyn? 33As choud as v’eh foast taggloo roo, cur-my-ner haink y chaghter neose huggey: as dooyrt y ree, Cur-my-ner, ta’n olk shoh veih’n Chiarn; cre’n-fa yinnin farkiagh son cooney veih’n Chiarn ny-sodjey?