CAB. VII

1Eisht dooyrt Elisha, Clasht-jee rish goo’n Chiarn; Myr shoh ta’n Chiarn dy ghra, Mairagh mysh y traa shoh, bee towse dy reih flooyr er ny chreck son shekel, as daa howse dy oarn son shekel, ayns giat Samaria. 2Eisht dreggyr chiarn, va fo laue’n ree, yn dooinney dy Yee, as dooyrt eh, cur-my-ner, dy jinnagh y Chiarn uinniagyn ayns niau, vod lheid y red y ve? As dooyrt eh, Cur-my-ner, nee oo fakin eh lesh dty hooillyn, agh cha jean oo gee jeh.

3As va kiare louraanee cheu-mooie jeh giat yn ard-valley: as dooyrt ad yn derrey yeh rish y jeh elley, Cre’n-fa ta shin nyn soie ayns shoh farkiagh er y baase? 4My jir mayd, Hem mayd stiagh ’syn ard-valley, eisht ta’n gortey ’syn ard-valley, as yiow mayd baase ayns shen: as dy hoie raad ta shin, yiow mayd baase myrgeddin: nish er-y-fa shen, tar-jee, as lhig dooin tuittym gys sheshaght-caggee ny Syrianee: my ver ad nyn mioys dooin, bee mayd bio; as my ver ad gy-baase shin, cha bee mayd agh marroo. 5As hrog ad orroo ayns y cho-leayrtys, dy gholl gys camp ny Syrianee: as tra v’ad er jeet gys yn ayrn sodjey magh jeh camp Syria, cur-my-ner, cha row dooinney ayns shen. 6Son va’n Chiarn er chur er sheshaght-caggee ny Syrianee dy chlashtyn feiyr agglagh fainee, as feiyr cabbil, eer sheean sheshaght vooar caggee; as dooyrt ad y derrey yeh rish y jeh elley, Cur-my-ner, ta ree Israel er vailley reeaghyn ny Hittiteyn, as reeaghyn ny Egyptianee, dy heet orrin. 7Shen-y-fa hrog ad orroo, as chossyn ad ersooyl ec y cho-leayrtys, as daag ad nyn gabbaneyn, as nyn gabbil, as ny assylyn oc, eer y champ myr ve, as ren ad chea son nyn mioys. 8As tra haink ny louraanee shoh gys yn ayrn sodjey magh jeh’n champ, hie ad stiagh ayns unnane jeh ny cabbaneyn, (as ren ad gee as giu,) as hug ad lhieu veih shen argid as airh, as coamrey, as hie ad; as dollee ad eh; as haink ad reesht, as hie ad stiagh ayns cabbane elley, as hug ad lhieu veih shen neesht, as dollee ad eh. 9Eisht dooyrt ad y derrey yeh rish y jeh elley, Cha vel shin jannoo dy mie: ta’n laa jiu laa dy naightyn mie as ta shin nyn dhost: my uirrys mayd gys soilshey’n laa, hig olk ennagh orrin: nish er-y-fa shen tar-jee, as lhig dooin goll as ginsh shoh da lught-thie’n ree. 10Er shoh haink ad, as deïe ad gys porter yn ard-valley; as dinsh ad, gra, Hie shin gys camp ny Syrianee, as cur-my-ner, cha row dooinney ayns shen, ny coraa dooinney, agh cabbil kianlt, as assylyn kianlt, as ny cabbaneyn nyn shassoo. 11As dyllee eh er ny porteryn, as dinsh ad eh cheu-sthie ayns lught-thie yn ree.

12As dirree’n ree ’syn oie, as dooyrt eh rish ny fir-choyrlee echey, Soilshee-ym’s diu nish cre ta ny Syrianee er n’yannoo rooin: ta fys oc dy vel shin accryssagh, Shen-y-fa t’ad er gholl magh ass y champ, dy cheiltyn ad-hene ’sy vagher, gra, Tra hig ad magh ass yn ard-valley, nee mayd goaill ad bio, as yiow mayd stiagh ’syn ard-valley. 13As dreggyr fer jeh e ard-gheiney, as dooyrt eh, Lhig da paart, ta mee guee ort, goaill queig jeh ny cabbil t’er-mayrn, ta faagit ’syn ard-valley (cur-my-ner, t’adsyn myr y chooid elley jeh earroo Israel t’er-mayrn; cur-my-ner, ta mee gra T’ad eer myr ymmodee elley ayns Israel t’er n’gholl naardey,) lhig dooin ad y choyrt, as hee mayd. 14Ghow ad er-y-fa shen daa chabbil fainagh; as hug y ree ad geiyrt er sheshaght-caggee ny Syrianee, gra, Immee-jee as jeeagh-jee. 15As hie ad geiyrt orroo gys Jordan; as cur-my-ner, va ooilley’n raad lane dy gharmadyn as greinyn-caggee, va ny Syrianee er cheau ersooyl ayns nyn siyr: as hyndaa ny chaghteryn, as dinsh ad da’n ree. 16As hie’n pobble magh, as spooill ad cabbaneyn ny Syrianee. Myr shen va towse dy flooyr meein creckit son shekel, as daa howse dy oarn son shekel, cordail rish goo’n Chiarn.

17As doardee yn ree da’n chiarn va fo e laue dy ghoaill er currym y yiat: as stamp y pobble er ’sy yiat, as hooar eh baase, myr va’n dooinney dy Yee er ghra, ren loayrt tra hie’n ree sheese huggey. 18As shoh myr haghyr eh da, cordail rish raa’n dooinney dy Yee rish y ree, gra, Bee daa howse dy oarn son shekel, as towse dy flooyr meein son shekel, mysh y traa shoh mairagh, ayns giat Samaria: 19As dreggyr y chiarn cheddin yn dooinney dy Yee, as dooyrt eh, Nish cur-my-ner, dy jinnagh y Chiarn uinniagyn ayns niau, voddagh lheid y red shoh y ve? As dooyrt eh, Cur-my-ner, hee oo eh lesh dty hooillyn, agh cha jean uss gee jeh. 20As myr shen haghyr eh da: son stamp y pobble er ayns y yiat, dy dooar eh baase.