CAB. VIII

1Eisht loayr Elisha rish y ven (yn mac eck v’eh er aa-vioghey), gra Trog ort, as gow uss as lught dty hie, as cum-jee’n raad share oddys shiu beaghey: son ta’n Chiarn er harey gortey; as hig eh myrgeddin er y cheer son shiaght bleeaney. 2As hrog y ven urree, as ren ee cordail rish raa yn dooinney dy Yee; as hie ee lesh y lught-thie eck, as chum ad ayns cheer ny Philistinee shiaght bleeaney. 3As myr shen ve, ec kione ny shiaght bleeaney, dy daink y ven thie reesht veih cheer ny Philistinee: as hie ee magh dy yannoo accan gys y ree, son y thie, as son y thalloo eck. 4As loayr y ree rish Gehazi, sharvaant yn dooinney dy Yee, gra, Insh dou, ta mee guee ort, jeh ooilley ny obbraghyn mooarey ta Elisha er n’yannoo. 5As haink eh gy-kione, myr v’eh ginsh da’n ree kys v’eh er vioghey corp marroo, cur-my-ner, haink y ven, yn mac eck v’eh er vioghey, dy yannoo accan gys y ree son y thie, as son y thalloo eck. As dooyrt Gehazi, My hiarn, O ree, shoh’n ven, as shoh’n mac eck ren Elisha y vioghey. 6As tra dênee’n ree jeh’n ven, dinsh ee da. Er shoh doardee’n ree fer-oik dy row, gra, Cur-jee ooilley ny v’eck roïe, marish slane vondeish y thalloo, er-dyn laa daag ee yn cheer, eer derrey nish.

7As haink Elisha gys Damascus; as va Ben-hadad ree Syria ching: as ve inshit da, gra, Ta’n dooinney dy Yee er jeet gys shoh. 8As dooyrt y ree rish Hazael, Gow gioot ayns dty laue, as immee gys yn dooinney dy Yee, as jean briaght jeh’n Chiarn liorishyn, gra, Jig-yms trooid y doghan shoh? 9Myr shen hie Hazael ny whail, as ghow eh’n cowrey mârish, eer jeh dy chooilley nhee mie v’ayns Damascus, laad da-eed camel, as haink eh, as hass eh ny enish, as dooyrt eh, Ta dty vac Ben-hadad ree Syria er my choyrt hood’s, gra, Jig-yms trooid y doghan shoh? 10As dooyrt Elisha rish, Immee, as abbyr rish, Foddee oo cheet ny hrooid: agh ny-yeih, ta’n Chiarn er hoilshaghey dou son shickyrys dy vow eh baase. 11As yeeagh eh cha gyere ’syn eddin echey, derrey ren eh jiargaghey: as cheayn y dooinney dy Yee. 12As dooyrt Hazael, Cre’n-fa, ta my hiarn keayney? As dreggyr eh, Er-yn-oyr dy vel fys aym cre’n olk ver uss lhiat er cloan Israel: ny ynnydyn lajer oc nee uss y lostey, as ny deiney aegey oc nee uss y varroo lesh y chliwe, as yn chloan oc nee uss y vransey, as giarey seose nyn mraane torragh. 13As dooyrt Hazael, Ny lhig eh Jee: vel oo goaill dty harvaant dy ve moddey, mee dy yannoo lheid yn olk mooar shoh? As dreggyr Elisha, Ta’n Chiarn er hoilshaghey dooys dy bee uss dty ree harrish Syria. 14Myr shen hie eh roish veih Elisha, as haink eh gys e vainshtyr, dênee jeh, Cre dooyrt Elisha rhyt? As dreggyr eh, Dinsh eh dou son shickyrys dy vod oo cheet trooid. 15As haink eh gy-kione laa-ny-vairagh, dy ghow eh peesh dy eaddagh chiu, as ren eh thummey eh ayns ushtey, as skeayley er e eddin eh, myr shen dy dooar eh baase; as ren Hazael reill ’syn ynnyd echey.

16As ayns y wheiggoo vleïn jeh Joram, mac Ahab ree Israel, as Jehoshaphat ec y traa shen ree er Judah, ghow Jehoram mac Jehoshaphat ree Yudah toshiaght dy reill. 17Daa vleïn jeig as feed dy eash v’eh tra ghow eh toshiaght dy reill; as ren eh reill hoght bleeaney ayns Jerusalem. 18As deiyr eh er raaidyn reeaghyn Israel, myr ren thie Ahab; son inneen Ahah va’n ven echey: as ren eh ny va olk ayns shilley’n Chiarn. 19Cha jinnagh y Chiarn foast Judah y stroie er graih Ghavid e harvaant, myr v’eh er yialdyn dy choyrt soilshey kinjagh da hene, as da e chloan.

20Rish y lhing echeysyn, ren Edom girree-magh noi reill Yudah, as ren ad ree daue hene. 21Er shoh hie Joram harrish gys Zair, as ooilley ny fainee mârish: as hrog eh er ’syn oie, as woaill eh ny Edomiteyn ren cruinnaghey mygeayrt eh-hene: as ren captanyn ny fainee, as ren pobble Edom, chea gys ny cabbaneyn oc. 22Agh ny-yeih, ren Edom shassoo magh noi laue Yudah gys y laa t’ayn jiu. Eisht ren Libnah girree-magh ec y traa cheddin. 23As y chooid elley jeh obbraghyn Joram, as ooilley ny ren eh, nagh vel ad scruit ayns lioar recortyssyn reeaghyn Yudah. 24As chaddil Joram marish e ayraghyn, as v’eh oanluckit marish e ayraghyn ayns ard-valley Ghavid: as ren Ahaziah e vac reill ’syn ynnyd echey.

25Ayns y nah vleïn jeig jeh Joram mac Ahab ree Israel, ren Ahaziah, mac Jehoram ree Yudah, toshiaght dy reill. 26As va Ahaziah daa vleïn as feed dy eash tra ghow eh toshiaght dy reill, as reill eh un vleïn ayns Jerusalem: as va ennym e voir Athaliah, inneen Omri ree Israel. 27As deiyr eh er raaidyn thie Ahab, as ren eh olk ayns shilley’n Chiarn, myr ren thie Ahab: son v’eh cleuin da thie Ahab.

28As hie eh marish Joram mac Ahab dy chaggey noi Hazael ree Syria ayns Ramoth-gilead; as ren my Syrianee lhottey Joram. 29As hyndaa ree Joram dy v’er ny lheihys ayns Jezreel jeh ny lhottyn va ny Syrianee er chur da ec Ramah, ayns y chaggey noi Hazael ree Syria. As hie Ahaziah, mac Jehoram ree Yudah, sheese dy yeeaghyn Joram mac Ahab ayns Jezreel, son dy row eh ching.