CAB. IX

1As deïe Elisha er fer jeh cloan ny phadeyryn, as dooyrt eh rish, Cryss seose dty gharmad mysh dty veeghyn, as gow yn box shoh dy ooil ayns dty laue, as immee gys Ramoth-gilead. 2As tra roshys oo gys shen, fow magh ayns shen Jehu, mac Jehoshaphat, mac Nimshi, as immee stiagh, as shir er girree veih mastey e vraaraghyn, as cur lhiat eh gys shamyr sodjey stiagh ’sy thie: 3Eisht gow’n box dy ooil, as deayrt eh er e chione, as abbyr, Myr shoh ta’n Chiarn dy ghra, Ta mee er dty ooilaghey dy ve dty ree harrish Israel: eisht foshil y dorrys, as cosne royd, as ny fuirree.

4Er shoh hie’n dooinney aeg, eer yn dooinney aeg y phadeyr, gys Ramoth-gilead. 5As tra haink eh, cur-my-ner, va captanyn y cheshaght-chaggee nyn soie: as dooyrt eh, Ta chaghteraght aym’s hood’s, O chaptan. As dooyrt Jehu rish, Quoi j’in ooilley? As dooyrt eh, Hood’s, O chaptan. 6As dirree eh, as hie eh stiagh mârish; as gheayrt eh yn ooil er e chione, as dooyrt eh rish, Myr shoh ta’n Chiarn Jee Israel dy ghra, Ta mish er dty ooilaghey dy ve ny ree harrish pobble y Chiarn, eer harrish Israel. 7As nee oo stroie thie Ahab dty vainshtyr, dy voddym cooilleeney ’ghoaill son fuill my harvaantyn ny phadeyryn, as fuill ooilley sharvaantyn y Chiarn, ec laue Jezebel. 8Son nee slane thie Ahab cherraghtyn; as giare-yms jeh veih Ahab ooilley deiney e hie, rass as cass, marish ooilley e luight t’er-mayrn ny faagit ayns Israel. 9As neem’s rish thie Ahab myr ta mee er n’yannoo rish thie Yeroboam mac Nebat, as rish thie Vaasha mac Ahijah: 10As nee ny moddee gee Jezebel ayns magher Jezreel, as cha bee unnane dy oanluckey ee. As doshil eh yn dorrys, as chossyn eh roish.

11Eisht haink Jehu magh gys sharvaantyn e hiarn, as dooyrt fer jeu rish, Vel ooilley dy mie? cre’n-fa haink y fer baanrit shoh hood’s? As dooyrt eh roo, Shione diu yn dooinney, as e eilkin. 12As dooyrt ad, Te gyn-yss dooinyn: insh dooin nish. As dooyrt eh, Shoh as myr shoh loayr eh rhym’s, gra, Myr shoh ta’n Chiarn dy ghra, Ta mee er dty ooilaghey dy ve dty ree harrish Israel. 13Eisht ren ad siyr, as ghow dy chooilley ghooinney e gharmad, dy chur ad fo e chassyn er mullagh ny greeshyn, as heid ad lesh trumpetyn, gra, Ta Jehu yn ree. 14Eisht ren Jehu, mac Jehoshaphat, mac Nimshi, as adsyn va mârish, coyrt nyn goyrle dy cheilley noi Joram. (Nish va Joram er niartaghey Ramoth-gilead, eh-hene as ooilley Israel, noi Hazael ree Syria. 15Agh va ree Joram er jyndaa gys Jezreel dy v’er ny lheihys jeh ny lhottyn va ny Syrianee er choyrt da tra v’eh caggey rish Hazael ree Syria.) As dooyrt Jehu, My she yn aigney eu eh, ny sur-jee dooinney erbee dy gholl magh, ny dy chosney magh ass yn ard-valley, er-chee dy insh eh ayns Jezreel. 16Myr shen varkee Jehu ayns fainagh, as hie eh gys Jezreel: (shen y raad va Joram ny lhie.) As va Ahaziah ree Yudah er jeet neose dy yeeaghyn Joram. 17As hass arreyder er y toor ayns Jezreel, as honnick eh sheshaght Jehu myr v’ad er y raad, as dooyrt eh, Ta mee fakin sheshaght. As dooyrt Joram, Lhig da markiaght goll magh nyn guail, as lhig da gra, Vel ooilley ayns shee? 18Myr shen hie markiaght magh nyn guail, as dooyrt eh, Myr shoh ta’n ree dy ghra, Vel ooilley ayns shee? As dooyrt Jehu, Cre t’ayd’s dy yannoo rish shee? chyndaa my chooyl. As dinsh yn arreyder, gra, Haink yn chaghter huc, agh cha vel eh cheet reesht. 19Er shen hug eh magh markiaght elley, haink seose huc, as dooyrt, Shoh myr ta’n ree dy ghra, Vel ooilley ayns shee? As dreggyr Jehu, Cre t’ayd’s dy yannoo rish shee? chyndaa uss my chooyl. 20As dinsh yn arreyder, gra, Haink eh eer seose huc, as cha vel eh cheet reesht: as ta’n imman echey goll-rish imman Jehu mac Nimshi; son t’eh gimman er-finnue. 21As dooyrt Joram, Fow-jee aarloo. As va’n fainagh echey er ny gheddyn aarloo. As hie Joram ree Israel, as Ahaziah ree Yudah, magh, dagh dooinney ayns e ainagh, as hie ad magh quail Jehu, as veeit ad eh ayns magher Naboth yn Jezreelite. 22As haink eh gy-kione, tra honnick Joram Jehu, dy dooyrt eh, Vel ooilley ayns shee, Yehu? As dreggyr eh, Cre’n shee, choud’s ta streebeeys [spyrrydoil] dty voir Jezebel, as y vuitcheraght eck, wheesh er vishaghey? 23As hyndaa Joram e laue, as ren eh chea, as dooyrt eh rish Ahaziah, Ta traitoorys ayn, O Ahaziah! 24As hayrn Jehu bow lesh ooilley e niart as woaill eh Joram eddyr e gheayltyn, dy jagh y tide trooid e chree, as huitt eh sheese ’syn ainagh. 25Eisht dooyrt Jehu rish Bidkar e chaptan, Trog seose eh, as harrish lesh ayns magher-eiraght Naboth yn Jezreelite: son cooinee, tra va uss as mish markiagh cooidjagh geiyrt er Ahab e ayr, dy doardee’n Chiarn yn kerraghey shoh er. 26Son shickyrys honnick mee jea fuill Naboth, as fuill e vec, ta’n Chiarn dy ghra; as goym cooilleeney ort ayns y vagher shoh, va raa’n Chiarn. Nish er-y-fa shen, gow as ceau eh ayns y vagher cheddin, cordail rish raa’n Chiarn.

27Agh tra honnick Ahaziah ree Yudah shoh, ren eh chea rish raad thie’n gharey: as deiyr Jehu er, as dooyrt eh, Bwoaill eh myrgeddin ’syn ainagh. As ren ad shen, er y raad seose gys Gur, ta liorish Ibleam. As chossyn eh gys Megiddo, as hooar eh baase ayns shen. 28As hug e harvaantyn lhieu eh ayns fainagh gys Jerusalem, as doanluck ad eh ayns e lhiaght hene marish e ayraghyn, ayns ard-valley Ghavid. 29Ayns yn un vleïn jeig jeh Joram mac Ahab, ghow Ahaziah toshiaght dy reill harrish Judah.

30As tra va Jehu er jeet gys Jezreel, cheayll Jezebel jeh; as hug ee paint er e eddin, as vreid ee e kione, as yeeagh ee magh er uinniag. 31As myr hie Jehu stiagh er y yiat, dooyrt ee, Row shee ec Zimri, ren dunverys e vainshtyr? 32As yeeagh eh seose gys yn uinniag, as dooyrt eh, Quoi t’er y cheu aym’s? quoi? As ren ghaa ny three jeh ny fir-oik jeeaghyn magh. 33As dooyrt eh, Ceau-jee sheese ee. Er shoh hilg ad sheese ee: as va paart jeh’n uill eck spreiht er y voalley, as er ny cabbil: as stamp ad ee fo-chosh. 34As tra v’eh er jeet stiagh, ren eh gee as giu, as dooyrt eh, Gow-jee, as jeeagh-jee lurg y ven chustey shoh, as lhig-jee ve oanluckit: son t’ee inneen ree. 35As hie ad dy oanluckey ee; agh cha dooar ad ny smoo jee na’n chlaigin, as ny cassyn, as bassyn ny laueyn eck. 36Shen-y-fa haink ad reesht, as dinsh ad da. As dooyrt eh, Shoh goo’n Chiarn, loayr eh liorish e harvaant Elijah yn Tishbite, gra, Ayns magher-eiraght Jezreel nee ny moddee gee feill Jezebel: 37As bee callin Jezebel myr eoylley er eaghtyr y thallooin, ayns magher Jezreel; myr shen nagh vod ad gra, She shoh Jezebel.