CAB. II

1Agh va myrgeddin phadeyryn foalsey mastey’n pobble, eer myr vees fir-ynsee foalsey ny mast’ euish, ver lhieu stiagh dy follit shaghrynys custey veih’n chredjue, dy jarroo gobbal yn Chiarn ren ad y chionnaghey, as tayrn orroo hene toyrt-mow er mullagh ching. 2As eiyree ymmodee da ny raaidyn mollaghtagh oc, kyndagh roosyn bee raad yn irriney er ny oltooaney. 3As trooid saynt nee ad lesh goan cluicagh jannoo merchantys jiu: yn kerraghey oc cha vel nish foddey jeh, as cha vel y deyrey oc saveenagh. 4Son mannagh ren Jee sparail ny ainleyn ren peccah, agh hilg eh ad sheese gys niurin, as livrey eh ad gys geulaghyn dy ghorraghys, dy ve freilt cour briwnys; 5As nagh ren sparail y chenn seihll, agh haue eh Noah yn hoghtoo phersoon, preachoor dy chairys, coyrt lesh y thooilley er y seihll dy vee-chrauee; 6As lostey gys leoie ard-valjyn Sodom as Gomorrha, ren eh ad y gheyrey gys toyrt-mow bollagh, jannoo sampleyr jeu dauesyn yinnagh ny lurg shen baghey dy mee-chrauee; 7As livrey eh Lot yn dooinney cairagh, seaghnit lesh ymmyrkey-bea feohdagh ny mee-chrauee: 8(Son y dooinney cairagh shen baghey ny-vud oc, liorish fakin as clashtyn, va’n annym ynrick echey er ny heaghney veih laa dy laa lesh nyn obbraghyn neu-ghooghyssagh.) 9Ec y Chiarn ta fys kys dy livrey yn sleih crauee ass seaghyn, as dy reayll ny mee-chrauee gys laa ny briwnys dy ve er nyn gerraghey: 10As erskyn ooilley adsyn ta gimmeeaght lurg yn eill, ’sy taynt dy neu-ghlennid, as soiaghey beg jeh reiltys: daaney t’ad, creoi-wannallagh, cha vel aggle orroo dy loayrt dy olk jeh ny pooaraghyn syrjey: 11Tra nagh vel ny ainleyn ta ny syrjey ayns pooar as niart, cur stiagh plaiynt oltooanagh nyn ’oï oc kiongoyrt rish y Chiarn. 12Agh ad shoh, myr beïyn feïe gyn resoon dooghyssagh, jeant dy ve shelgit as stroit, t’ad loayrt dy olk jeh ny reddyn nagh vel ad toiggal, as nee ad cherraghtyn dy bollagh ayns y neu-ghlennid oc hene: 13As yiow ad yn leagh dy vee-chairys, myr adsyn ta goaill taitnys dy eiyrt er y rouanys oc ayns soilshey yn laa: she spuitt ad as lheamyssyn, cloie rish y volteyraght oc hene, choud’s t’ad ec gien mêriu; 14Lesh sooillyn soit er brishey-poosey, as nagh vod scuirr veih peccah; molley anmeenyn lhag-chredjuagh: creeaghyn t’oc, cliaghtit er obbraghyn sayntoilagh; cloan ny mollaght: 15T’er dreigeil yn raad cair, as er n’gholl er-shaghryn, geiyrt da raad Balaam mac Bosor, hug saynt da’n leagh dy neu-ynrickys; 16Agh hooar eh oghsan son e vee-chairys; yn assyl balloo loayrt lesh coraa dooinney, ren lhiettal ommijys y phadeyr. 17T’ad shoh chibbraghyn fegooish ushtey, bodjallyn eebrit lesh dorrin, nyn gour ta’n chay dy ghorraghys freilt er son dy bragh. 18Son tra t’ad fockley magh goan mooarey follym, sheidit seose lesh fardail, t’ad cleayney trooid sayntyn ny foalley, liorish mooarane rouanys, adsyn va dy glen er scapail vouesyn ta baghey ayns shaghrynys: 19Choud’s t’ad gialdyn daue reamys, t’ad-hene nyn sharvaantyn dy neu-ghlennid: son liorishyn ta’n varriaght er ny gheddyn er dooinney, liorish yn er cheddin t’eh er ny choyrt lesh fo bondiaght. 20Son lurg daue ve er haghney broïd y theihll trooid tushtey jeh’n Chiarn as Saualtagh Yeesey Creest, my t’ad reesht goit ’sy ribbey, as yn varriaght er ny gheddyn orroo; ta’n jerrey oc ny smessey na’n toshiaght. 21Son ny bare veagh eh daue gyn tushtey er ve oc jeh raad yn ynrickys, na lurg daue v’er doiggal eh, dy hyndaa veih yn anney casherick hie er livrey daue. 22Agh te er daghyrt daue cordail rish y chenn raa firrinagh, Ta’n moddey er jyndaa reesht gys y skeeah echey hene; as y vuc va nieet, gys yn ymmylt eck ’sy laagh.