CAB. X

1As haink eh gy-kione lurg shoh, dy dooar ree cloan Ammon baase, as ren Hanun e vac reill ’syn ynnyd echey. 2Eisht dooyrt David, Neem’s my chenjallys y yeeaghyn da Hanun mac Nahash, myr hoilshee e ayr aigney-mie dooys. As hug David e harvaantyn dy gherjaghey eh son baase e ayrey. As haink sharvaantyn Ghavid gys cheer cloan Ammon. 3As dooyrt princeyn cloan Ammon rish Hanun nyn jiarn, Vel uss smooinaghtyn dy nee er graih dt’ayrey ta David er choyrt fir-gherjee hood’s? nagh nee son shoh t’eh er choyrt e harvaantyn hood, dy ghoaill baght jeh’n ard-valley, as dy scrial magh eh, er-chee dy stroie eh? 4Shen-y-fa ghow Hanun sharvaantyn Ghavid, as ren eh baarey yn derrey lieh jeh ny faasaagyn oc, as yiare eh jeu nyn goamraghyn ’sy vean, kiart rish nyn geasyn, as lhig eh’n raad daue. 5Tra dinsh ad shoh da David, hug eh chaghteryn nyn guail, er-yn-oyr dy row ny deiney fo niart nearey: as dooyrt y ree, Fuirree-jee ec Jericho derrey vees ny faasaagyn eu er n’aase, as eisht tar-jee hym’s.

6As tra dennee cloan Ammon dy row ad dy mooar er vrasnaghey David, hug ad fys as daill ad Syrianee Veth-rehob, as Syrianee Zoba, feed thousane deiney coshee, as veih ree Maacah thousane dooinney, as veih Ish-tob daa housane jeig. 7As tra cheayll David jeh, hug eh magh Joab, as ooilley sheshaght ny deiney niartal caggee. 8As haink cloan Ammon magh, as hayrn ad seose ayns order-caggee, roish giat yn ard-valley: as va Syrianee Zoba, as Rehob, as Ish-tob, as Maacah, orroo hene ’sy vagher. 9Tra honnick Joab dy row’n caggey n’oï roish as ny yeï, ghow eh ooilley reih deiney Israel, as hug eh ad ayns order-caggee noi ny Syrianee. 10As y chooid elley jeh’n pobble livrey eh fo currym Abishai e vraar, dy chur eddin da cloan Ammon. 11As dooyrt eh, My ta ny Syrianee ro lajer er my hon, eisht nee uss cooney lhiam’s; agh my ta cloan Ammon ro lajer er dty hon’s, eisht hig-yms as cooin-ym lhiat’s. 12Bee jeh cree mie, as lhig dooin caggey myr deiney son y pobble ain, as son ard-valjyn y Jee ain: as aigney-mie’n Chiarn dy row jeant. 13As hayrn Joab er-gerrey, as y pobble va mârish, gys y chaggey noi ny Syrianee; as ren ad chea kiongoyrt rish. 14As tra honnick cloan Ammon dy row ny Syrianee er choyrt cooyl, eisht ren adsyn myrgeddin chea roish Abishai, as chossyn ad stiagh ’syn ard-valley. Er shoh hyndaa Joab veih cloan Ammon, as haink eh gys Jerusalem.

15As tra honnick ny Syrianee dy row Israel er chosney orroo, v’ad er nyn jaglym cooidjagh. 16As hug Hadarezer fys, as hayrn eh magh ny Syrianee v’er cheu elley jeh’n awin: as haink ad gys Helam; as va Shobach, captan sheshaght-caggee Hadarezer, harrystoo. 17As tra cheayll David shoh, haggil eh ooilley Israel cooidjagh, as hie ad harrish Jordan, as haink ad gys Elam. As ren ny Syrianee tayrn magh noi David, as caggey rish. 18As roie ny Syrianee er-chea roish Israel; as ren David stroie shiaght cheead fainagh jeh ny Syrianee, as da-eed thousane dy varkee; as woaill eh Shobach captan y cheshaght-chaggee oc, hooar e vaase ayns shen. 19Tra honnick ooilley ny reeaghyn va cooney lesh Hadarezer, dy row ad bwoailt roish Israel, ren ad shee rish Israel, as v’ad fo keesh. Myr shoh va aggle er ny Syrianee dy chooney lesh cloan Ammon arragh.