CAB. XI

1As haink eh gy-kione ec toshiaght ny bleeaney, yn imbagh ta reeaghyn cliaghtey dy gholl magh dy chaggey, dy dug David magh Joab as e gheiney mârish, as ooilley deiney reiht Israel; as stroie ad cloan Ammon, as chruinnee ad stiagh Rabbah. Agh duirree David ec Jerusalem.

2As haink eh gy-kione er fastyr dy row, dy dirree David veih e lhiabbee, as huill eh er mullagh thie’n ree: as veih’n vullagh honnick eh ben faarkey ee-hene; as va’n ven feer aalin dy yeeaghyn urree. 3As hug David fys, as vrie eh mychione y ven: as dooyrt fer, Nagh nee shoh Bath-sheba, inneen Eliam, ben Uriah yn Hittite? 4As hug David chaghteryn, as hug ad lhieu ee, as haink ee stiagh huggey, as lhie eh mâree, (son v’ee er niee ee-hene,) as hyndaa ee thie. 5As ren y ven gientyn, as hug ee fys, as dinsh ee da David, as dooyrt ee, Ta mee er yiennaghtyn. 6As hug David fys gys Joab, gra, Cur hym’s Uriah yn Hittite. As hug Joab Uriah gys David. 7As tra va Uriah er jeet huggey, vrie David jeh, Kys va Joab, as kys va’n pobble, as kys va’n caggey goll er. 8As dooyrt David rish Uriah, Gow sheese gys dty hie, as 11:8 Jean mooar jeed hene.niee dty chassyn. As hie Uriah roish ass thie’n ree, as hug y ree lhongey dy vee geiyrt er. 9Agh ren Uriah cadley ec dorrys thie’n ree, marish ooilley sharvaantyn e hiarn, as cha jagh eh sheese gys e hie hene. 10As tra ve inshit da David, gra, Cha jagh Uriah sheese gys e hie, dooyrt David rish Uriah, Nagh vel oo er jeet veih jurnah? cre’n-fa eisht nagh jagh oo sheese gys dty hie? 11As dooyrt Uriah rish David, Ta’n arg, as Israel, as Judah fo cabbaneyn, as ta my hiarn Joab, as sharvaantyn my hiarn, nyn lhie ayns camp fud y vagheragh: jem’s eisht gys my hie dy ee as dy iu, as dy yannoo sheshaght rish my ven? myr t’ou uss bio, as myr ta dt’annym bio, cha jean-ym lheid y red. 12As dooyrt David rish Uriah, Fuirree ayns shoh jiu neesht, as mairagh lhig-yms y raad dhyt. Myr shoh duirree Uriah ayns Jerusalem, yn laa shen as laa-ny-vairagh. 13As tra va David er chuirrey eh, ren eh gee as giu ayns e enish; as ren eh er-meshtey eh: as ec yn astyr hie eh magh dy lhie er e lhiabbee marish sharvaantyn e hiarn, agh cha jagh eh sheese gys e hie.

14As haink eh gy-kione ’sy voghrey, dy dug David screeuyn gys Joab, as hug eh eh lesh laue Uriah. 15As hug eh ayns y screeuyn, gra, Soie-jee Uriah ayns eer toshiaght ny rankyn, raad s’dewilley ta’n caggey, as tayrn-jee veih, dy vod eh tuittym, as geddyn baase. 16As haink eh gy-kione, myr va Joab goaill baght jeh’n ard-valley, dy doardee eh Uriah gys boayl raad va fys echey dy row deiney dunnal soit n’oï. 17As vrish deiney’n ard-valley magh, as ren ad caggey rish Joab: as huitt paart jeh deiney Ghavid; as hooar Uriah yn Hittite e vaase myr-chaagh.

18Eisht hug Joab fys, as dinsh eh da David kys va’n caggey er n’gholl er. 19As hug eh currym er y chaghter, gra, Tra t’ou erreish ginsh ny naightyn caggee da’n ree, 20As my ennys oo dy vel jymmoose y ree troggal ayn, as dy jir eh rhyt, Cre’n-fa hayrn shiu cha faggys da’n ard-valley tra va shiu caggey? nagh row fys eu dy lhiggagh ad veih’n voalley? 21Quoi woaill Abimelech mac Jerubbesheth? nagh hilg ben peesh dy chlagh-wyllin er veih’n voalley, dy dooar eh baase ayns Thebez? cre’n-fa hie shiu cha faggys da’n voalley? Eisht abbyr uss, Ta dty harvaant Uriah yn Hittite marroo myr-chaagh. 22Myr shen hie’n chaghter, as hoilshee eh da David ooilley ny va Joab er choyrt roish. 23As dooyrt yn chaghter rish David, Son shickyrys va ny deiney cosney orrin, as haink ad magh orrin ’sy vagher, as deiyr shin ad back eer gys giat y valley. 24As lhig ny sideyryn veih’n voalley er dty harvaantyn, as ta paart jeh sharvaantyn y ree marroo, as ta dty harvaant Uriah yn Hittite marroo myrgeddin. 25Eisht dooyrt David rish y chaghter, Myr shoh nee oo gra rish Joab, Ny lhaggee dty laue son shoh; son ta’n cliwe stroie fer chammah’s fer elley: niartee dty laue ny s’troshey noi’n ard-valley, as stroie eh; as cur eh ayns cree.

26As tra cheayll ben Uriah dy row Uriah yn sheshey eck marroo, ren ee dobberan er e hon. 27As tra va laghyn y dobberan ec kione, hug David fys, as hug eh lesh ee gys e hie hene, as haink ee dy ve e ven, as rug ee mac da. Agh va’n Chiarn jymmoosagh son shen ny va David er n’yannoo.