CAB. XII

1As hug y Chiarn Nathan gys David, As haink eh huggey, as dooyrt eh rish, Va daa ghooinney ’syn un ard-valley; yn derrey yeh berchagh, as y jeh elley boght. 2Va ec y dooinney berchagh ymmodee shioltaneyn as shellooyn: 3Agh cha row monney ec y dooinney boght, er-lhimmey jeh un eayn beg bwoirryn, v’eh er chionnaghey as er hroggal; as daase ee seose marish hene, as marish e chloan: d’ee ee jeh’n greme echey hene, as diu ee ass y chappan echey hene, as lhie ee ayns e oghrish, as v’ee da myr inneen. 4As haink troailtagh raad y dooinney berchagh; as cha lhig e haynt da dy ghoaill jeh’n chioltane ny jeh’n ingan echey hene, dy aarlaghey son y troailtagh v’er jeet ny raad, agh ghow eh eayn y dooinney boght, as daarlee eh ee son y dooinney v’er jeet huggey. 5As va corree Ghavid dy mooar er ny vrasnaghey noi’n dooinney, as dooyrt eh rish Nathan, Myr ta’n Chiarn bio, yn dooinney t’er n’yannoo yn aggair shoh bee eh son shickyrys er ny choyrt gy-baase. 6As nee eh lhiasaghey kiare-filley ’yannoo son yn eayn, er-yn-oyr dy ren eh lheid y red shoh, as nagh row chymmey ’sy chree.

7As dooyrt Nathan rish David, Oo-hene y dooinney shen. Myr shoh ta’n Chiarn Jee Israel dy ghra, Ren mish uss y ooilaghey dy ve dty ree harrish Israel, as livrey mee oo veih laue Saul; 8As hug mee dhyt thie dty vainshtyr, as mraane dty vainshtyr fo dty phooar, as hug mee dhyt thie Israel as Yudah; as my veggan lhiat shen, veign’s ny sodjey er choyrt dhyt lheid as lheid ny reddyn. 9Cre’n-fa t’ou er hoiaghey beg jeh anney’n Chiarn, dy yannoo olk ayns e hilley? T’ou er varroo Uriah yn Hittite lesh y chliwe, as er ghoaill y ven echey dy ve son ben dhyt hene, as t’ou er varroo eh lesh cliwe cloan Ammon. 10Son yn oyr shoh, lhiannys y cliwe dy bragh gys dty hie; er-y-fa dy vel oo er hoiaghey beg jeem’s, as er n’ghoaill ben Uriah yn Hittite dy ve son ben dhyt hene. 11Myr shoh ta’n Chiarn gra, Cur-my-ner, neem’s olk y hroggal seose dt’oï ass dty hie hene, as goyms ersooyl dty vraane kiongoyrt rish dty hooillyn, as ver-ym ad da dty naboo, as nee eh lhie mâroo ayns shilley’n ghrian shoh. 12Son ren uss shen gy-follit: agh neem’s y red shoh y yannoo ayns fakin ooilley Israel, as ayns soilshey’n ghrian. 13As dooyrt David rish Nathan, Ta mee er n’yannoo peccah noi’n Chiarn. As dooyrt Nathan rish David, Ta’n Chiarn myrgeddin er choyrt ersooyl dty pheccah; cha vow baase. 14Agh son dy vel uss liorish y drogh obbyr shoh er choyrt ard oyr da noidyn y Chiarn dy oltooaney, yn lhiannoo myrgeddin ta ruggit dhyt’s yiow eh son shickyrys baase.

15As hie Nathan roish gys e hie. As woaill y Chiarn yn lhiannoo va ben Uriah er n’ymmyrkey da David, as v’eh feer ching. 16Ren David er-y-fa shen guee gys y Chiarn son y lhiannoo; as ren David trostey, as hie eh stiagh as lhie eh fud-ny-hoie er y thalloo. 17As haink shanstyr e hie huggey, dy hroggal eh veih’n thalloo: agh cha jinnagh eh girree, ny goaill beaghey mâroo. 18As haink eh gy-kione er y chiaghtoo laa, dy dooar y lhiannoo baase. As va aggle er sharvaantyn Ghavid dy insh da dy row’n lhiannoo marroo: son dooyrt ad, Cur-my-ner, choud’s va’n lhiannoo foast bio loayr shin rish, as cha jinnagh eh geaishtagh rooin; cre vees eisht e hrimshey my inshys mayd da, Ta dty lhiannoo marroo? 19As tra honnick David dy row e harvaantyn sonsheragh, hoig eh dy row’n lhiannoo marroo. Shen-y-fa dooyrt David rish e harvaantyn, Vel yn lhiannoo marroo? As dooyrt ad, T’eh marroo. 20Eisht dirree David veih’n thalloo, as ren eh eh-hene y oonlaghey as y ooilaghey, as hug eh caghlaa coamrey er, as haink eh gys thie’n Chiarn as hug eh ooashley; eisht haink eh gys e hie hene, as ec e yeearree hoie ad beaghey roish, as ren eh gee. 21Eisht dooyrt e harvaantyn rish, Cre shoh t’ou er n’yannoo? ren oo trostey as dobberan son y lhiannoo choud’s v’eh bio; agh tra va’n lhiannoo marroo, ren oo girree as goaill beaghey. 22As dooyrt eh, Choud’s va bioys foast ’sy lhiannoo, ren mee trostey as dobberan; son dooyrt mee, Quoi ec ta fys nagh bee Jee cha graysoil dou as dy vod y lhiannoo coural. 23Agh nish dy vel eh marroo, cre’n-fa yinnin trostey? voddym’s eshyn y choyrt lhiam back reesht? Hem’s huggeysyn, agh cha jig eshyn hym’s.

24As ren David gerjaghey Bath-sheba e ven, as chaddil eh mâree: as dymmyrk ee mac da, as denmys eh eh Solomon; as va graih ec y Chiarn er. 25As hug eh fys lesh Nathan y phadeyr; as denmys eh eh Jedidiah, son y ghraih v’ec y Chiarn er.

26As va Joab caggey noi Rabbah va jeh cloan Ammon, as ghow eh yn ard-valley reeoil. 27As hug Joab chaghteryn gys David, as dooyrt eh, Ta mee er chaggey noi Rabbah, as er yiarey jeh ny ushtaghyn veih’n ard-valley. 28Nish er-y-fa shen, tayrn cooidjagh yn chooid elley jeh’n pobble, as jean campal noi’n ard-valley, as gow eh: er-aggle dy nee mish nee’n ard-valley ’ghoaill, as dy bee eh enmyssit orrym’s. 29As haggil David ooilley’n pobble cooidjagh, as hie eh gys Rabbah, as ren eh caggey n’oï, as goaill eh. 30As ghow eh crown y ree oc jeh e chione, (beeagh talent dy airh,) marish ny claghyn costalagh as ve soit er kione Ghavid: as hug eh lesh spooilley’n ard-valley magh ayns mooarane palchey. 31As hug eh lesh magh ny cummaltee v’ayn, as hug eh ad fo obbyr chreoi, lesh saaueyn, as lesh cleïn yiarn, as lesh teighyn yiarn, as dy gholl trooid obbyr yn aiee-vreek: as myr shoh ghell eh rish ooilley ard-valjyn cloan Ammon. Er shoh hyndaa David as ooilley’n pobble reesht gys Jerusalem.