CAB. XIII

1As haink eh gy-kione lurg shoh, dy row ec Absalom mac Ghavid shuyr feer aalin, va’n ennym eck Tamar; as va Amnon mac Ghavid ayns graih r’ee. 2As va Amnon cha seaghnit shen, dy huitt eh ching er graih e huyr Tamar; son myr v’ee ny moidyn heill Amnon dy row eh red doillee da dy gheddyn e aigney urree. 3Agh va carrey ec Amnon, va’n ennym echey Jonadab, mac Shimeah, braar Ghavid: as va Jonadab dooinney feer chroutagh. 4As dooyrt eh rish, Cre’n-oyr t’ou uss, ta mac y ree, shymley myr shoh veih laa gy laa? nagh n’insh oo dou? As dooyrt Amnon rish, Ta mee ayns graih rish Tamar, shuyr my vraar Absalom. 5As dooyrt Jonadab rish, Gow dty lhiabbee, as lhig ort dy vel oo ching: as tra hig dty ayr dy dty yeeaghyn, abbyr rish, Ta mee guee ort, lhig da my huyr Tamar cheet dy chur bee dou, as dy aarlaghey eh kiongoyrt rhym, dy voddym fakin eh, as goaill eh veih’n laue eck.

6Er shoh lhie Amnon sheese, as lhig eh er dy ve ching: as tra hie’n ree dy yeeaghyn eh, dooyrt Amnon rish y ree, Ta mee guee ort, lhig da Tamar my huyr cheet, as jannoo cubbyl dy cheeakyn dou kiongoyrt rhym, dy voddym gee veih’n laue eck. 7Eisht hug David fys thie gys Tamar, gra, Gow nish gys thie dty vraar Amnon, as aarlee bee da. 8Myr shen hie Tamar gys thie e braar Amnon, (as v’eshyn er lhie sheese;) as ghow ee flooyr, as ren ee fuinney, as keeakyn y yannoo jeh, as broie ad kiongoyrt rish. 9As ghow ee pan, as hyndaa ee ass ad kiongoyrt rish; agh dob eh gee. As dooyrt Amnon, Magh-jee voym dy chooilley ghooinney j’iu: as hie ad ooilley magh. 10As dooyrt Amnon rish Tamar, Cur lhiat y bee stiagh ’sy chamyr, dy voddym gee veih dty laue. As ghow Tamar ny keeakyn v’ee er n’aarlagh, as hug ee lh’ee ad stiagh ’sy chamyr gys Amnon e braar. 11As tra hug ee lh’ee ad huggey dy ee, ghow eh greme urree, as dooyrt eh r’ee, Tar as lhie liorym, my huyr. 12As dreggyr ee eh, Cha jean, my vraar, ny gow mee er-êgin; son cha lhisagh lheid y red ve jeant ayns Israel; ny jean lheid yn ommijys. 13As er my hon’s, c’raad hem dy choodaghey my nearey? as er dty hon’s, bee oo myr fer jeh ny ommydanyn scammyltagh ayns Israel. Nish er-y-fa shen, ta mee guee ort, loayr rish y ree; son cha vreill eh mee voïd. 14Ny-yeih, cha n’eaishtagh eh rish yn aghin eck; agh myr v’eh ny s’troshey na ish, ghow eh ee er-êgin.

15Eisht hug Amnon dwoaie erskyn towse jee; myr shen dy row’n dwoaie v’echey urree ny s’troshey na ooilley’n ghraih v’echey roïe urree: as dooyrt Amnon r’ee, Irree, as immee royd. 16As dooyrt ee rish, Cha vel oyr erbee son shoh: ta’n olk scammyltagh shoh ayns chyndaa mee ersooyl ny smessey na’n aggair elley ren oo rhym. Agh cha n’eaishtagh eh r’ee. 17Eisht deïe eh er e harvaant va shirveish er, as dooyrt eh, Cur magh nish y ven shoh voym, as boult yn dorrys ny jeï. 18As va coamrey dy chaghlaaghyn daah urree: son lesh lheid ny coamraghyn va inneenyn y ree va nyn moidynyn er nyn goamrey. Eisht hyndaa e harvaant magh ee, as voult eh yn dorrys ny jeï.

19As hug Tamar leoie er e kione, as raip ee e coamrey dy chaghlaaghyn daah v’urree, as hug ee e laue er e kione, as hie ee er e toshiaght keayney. 20As dooyrt Absalom e braar r’ee, Vel Amnon dty vraar er ve mayrt? agh bee dty host nish, my huyr: she dty vraar eh; ny gow shoh rouyr gys dty chree. Myr shen duirree Tamar treih as seaghnit ayns thie e braar Absalom.

21Agh tra cheayll ree David jeh ooilley ny reddyn shoh, v’eh ayns ard yymmoose. 22As cha loayr Absalom rish e vraar Amnon edyr mie ny sie: son va dwoaie ec Absalom er Amnon, er-yn-oyr dy row eh er ghoaill e huyr Tamar er-êgin.

23As shoh myr ve, ec kione daa vleïn, dy row lommyrtee-keyrragh ec Absalom ayns Baal-hazor, ta liorish Ephraim: as ren Absalom ooilley mec y ree y chuirrey. 24As haink Absalom gys y ree, as dooyrt eh, Cur-my-ner nish, ta lommyrtee ec dty harvaant; lhig da’n ree, ta mee guee ort, as e harvaantyn, goll marish dty harvaant. 25As dooyrt y ree rish Absalom, Cha lhiass, my vac, ny lhig dooin ooilley goll nish, er-aggle dy bee mayd rouyr cost ort. As ga dy ren eh chionney er, ny-yeih cha ragh eh, agh hug eh e vannaght da. 26Eisht dooyrt Absalom, Mannagh jeu hene, ta mee guee ort, lhig da my vraar Amnon goll mârin. As dooyrt y ree rish, Cre’n-fa ragh eshyn mayrt? 27Agh lhie Absalom er, dy lhig eh da Amnon, as ooilley mec y ree, goll mârish.

28Nish va Absalom er churmal e harvaantyn, gra, Gow-jee tastey nish, tra vees cree Amnon gennal lesh feeyn, as tra jir-yms riu, Bwoaill-jee Amnon; eisht marr-jee eh; ny bee aggle erriu: nagh nee mish t’er n’oardaghey shiu? bee-jee creeoil, as prow-jee dunnal. 29As ren sharvaantyn Absalom rish Amnon myr va Absalom er harey ad. Eisht hrog ooilley mec y ree orroo, as varkee dy chooilley ghooinney e vule, as chossyn ad roue.

30As haink eh gy-kione, myr v’ad foast er y raad, dy daink naightyn gys David, gra, Ta Absalom er varroo ooilley mec y ree, as cha vel fer jeu faagit. 31Eisht dirree’n ree, as raip eh e choamraghyn, as lhie eh er y thalloo; as hass ooilley e harvaantyn liorish lesh nyn goamraghyn raipit. 32As loayr Jonadab mac Shimeah, braar Ghavid, as dooyrt eh, Ny lhig da my hiarn smooinaghtyn dy vel ad er varroo ny deiney aegey, mec y ree; son Amnon ny-lomarcan ta marroo: son va shoh ayns cree Absalom dy yannoo, er-dyn laa ghow eh e huyr Tamar er-êgin. 33Nish er-y-fa shen, ny lhig da my hiarn y ree goaill shoh gys e chree, dy smooinaghtyn dy vel ooilley mec y ree marroo; son cha vel agh Amnon hene marroo. 34Agh chossyn Absalom ass y raad. As hrog y dooinney aeg v’er y watch seose e hooillyn, as yeeagh eh, as cur-my-ner va ymmodee sleih cheet er y raad, rish slyst y chronk, cheu e chooylloo. 35As dooyrt Jonadab rish y ree, Cur-my-ner ta mec y ree cheet: myr dooyrt dty harvaant, shen myr te. 36As haink eh gy-kione, cha row eh ny sleaie er loayrt, nagh daink mec y ree, as hrog ad seose nyn goraa, as cheayn ad: as ren y ree as ooilley e harvaantyn myrgeddin keayney dy sharroo.

37Agh chossyn Absalom roish, as hie eh gys Talmai, mac Ammihud, ree Yeshur. As va David ayns trimshey son e vac dy chooilley laa. 38Myr shoh chossyn Absalom roish, as hie eh gys Geshur, as duirree eh ayns shen three bleeaney. 39As va foddeeaght er annym Ghavid dy akin Absalom: son va e hrimshey harrish son Amnon, fakin dy row eh marroo.