CAB. XIV

1Nish ghow Joab mac Zeruiah tastey dy row cree y ree meiyghey gys Absalom. 2As hug Joab fys gys Tekoah, as hug eh lesh veih shen ben chreeney, as dooyrt eh r’ee, Ta mee guee ort, lhig ort dy vel oo ayns trimshey, as cur ort nish coamrey dobberan, as ny jean oo-hene y ooilaghey, agh ymmyrk oo-hene myr ben ta er ve foddey dobberan son y varroo; 3As tar gys y ree, as loayr er yn aght shoh rish. Myr shoh hug Joab ro-ee cre yarragh ee.

4As tra loayr y ven jeh Tekoah rish y ree, chroym ee e eddin gys y thalloo, as ren ee biallys, as dooyrt ee, Cooin lhiam, O ree. 5As dooyrt y ree r’ee, Cre ta jannoo ort? As dreggyr ee, Ta mish dy jarroo my ven-treoghe as ta my heshey marroo. 6As va daa vac ec dty harvaant, as huitt ad magh ry-cheilley ’sy vagher, as cha row unnane dy scarrey ad, agh woaill y derrey yeh yn jeh elley, as varr eh eh. 7As cur-my-ner, ta’n slane kynney er n’irree noi dty harvaant, as dooyrt ad, Livrey seose eshyn woaill e vraar, dy vod mayd y vioys echeysyn ’ghoaill, son bioys e vraarey hug eh gy-baase; as ver mayd yn eirey gy-kione myrgeddin: as myr shoh moghee ad my smarage t’er-mayrn, as cha vaag ad da my heshey edyr ennym ny sluight er y thalloo. 8As dooyrt y ree rish y ven, Gow royd gys dty hie, as ver-yms order ayns dty chooish. 9As dooyrt y ven veih Tekoah rish y ree, My hiarn, O ree, orrym’s dy duitt kerraghey’n vee-chairys, as er thie m’ayrey; as lhig da’n ree as e stoyl-briwnys ve neu-chyndagh. 10As dooyrt y ree, Quoi-erbee ver eïe ort, cur lhiat hym’s eh, as cha jig lesh dy yannoo shen arragh. 11Eisht dooyrt ish, Ta mee guee ort, lhig da’n ree cooinaghtyn er y Chiarn dty Yee, nagh surr oo ny cooilleeneyderyn-folley dy gholl er nyn doshiaght, nagh stroie ad my vac. As dooyrt eh, Myr ta’n Chiarn bio, cha duitt un renaig jeh kione dty vac gys y thalloo. 12Eisht dooyrt y ven, Lhig da dty harvaant, ta mee guee ort, loayrt un ockle sodjey rish my hiarn y ree. As dooyrt eshyn, Gow lesh. 13As dooyrt y ven, Cre’n-fa eisht t’ou hene er lhiggey da lheid y smooinaght goaill raad noi pobble Yee? son ta’n briwnys shoh jannoo’n ree hene foiljagh, fakin nagh vel y ree coyrt lesh thie eshyn ta ass e heer hene. 14Son shegin dooin ooilley baase gheddyn, as ta shin myr ushtey deayrtit er y thalloo, nagh vod ve troggit reesht: chamoo ta Jee jannoo soiagh jeh persoon erbee; foast t’eh er n’oardaghey saase ’sy leigh, son coyrt lesh thie eshyn ta eiyrit magh veih e heer hene. 15Nish er-y-fa shen dy vel mee er jeet dy loayrt mychione y chooish shoh rish my hiarn y ree, te er-yn-oyr dy vel y pobble er choyrt mee ayns aggle: as dooyrt dty harvaant, Loayr-yms nish rish y ree; foddee dy gooilleen y ree aghin e harvaant. 16Son ver y ree clashtyn, dy livrey e harvaant veih laue’n dooinney baillish mish y stroie as my vac mârym ass eiraght Yee. 17Eisht dooyrt dty harvaant, Bee ansoor my hiarn y ree nish gerjoilagh: son myr ainle Yee, shen myr ta my hiarn y ree dy chur tastey dy vriwnys eddyr mie as sie; shen-y-fa bee’n Chiarn dty Yee mayrt. 18Eisht dreggyr y ree as dooyrt eh rish y ven, Ny keill voym’s, ta mee guee ort, shen nee’m fênaght jeed. As dooyrt y ven, Lhig da my hiarn y ree nish loayrt. 19As dooyrt y ree, Nagh vel laue Yoab mayrt ayns ooilley shoh? As dreggyr y ven, as dooyrt ee, Myr ta dt’annym bio, my hiarn, O ree, cha vod unnane erbee chyndaa gys y laue yesh ny gys y laue hoshtal veih nhee erbee dy vel my hiarn y ree er loayrt: son dty harvaant Joab hug orrym shoh ’yannoo, as eshyn hug ooilley ny goan shoh ayns beeal dty harvaant: 20Dy choyrt lesh mygeayrt yn aght dorraghey shoh dy ghlare ta dty harvaant Joab er n’yannoo shoh: as ta my hiarn creeney, cordail rish creenaght ainle Yee, dy hoiggal dy chooilley nhee ’sy theihll.

21As dooyrt y ree rish Joab, Cur-my-ner nish, ta mee lowal jeh dty yeearree: immee er-y-fa shen, cur lhiat yn dooinney aeg Absalom thie. 22As chroym Joab lesh e eddin gys y thalloo, as ren eh biallys, as hug eh booise da’n ree: as dooyrt Joab, Jiu ta fys ec dty harvaant, dy vel mee er gheddyn foayr ayns dty hilley, my hiarn, O ree, ayns wheesh as dy vel y ree er chooilleeney aghin e harvaant. 23Myr shoh hrog Joab er, as hie eh gys Geshur, as hug eh lesh Absalom gys Jerusalem. 24As dooyrt yn ree, Lhig eh goll gys e hie hene, as ny lhig da m’eddin’s y akin. Myr shoh hyndaa Absalom gys e hie hene, as cha ren eh fakin eddin y ree.

25Agh ayns ooilley Israel, cha row dooinney dy ve soylit rish Absalom son e aalid: veih boyn e choshey eer gys mullagh e ching cha row lheamys erbee er. 26As tra yiare eh folt e ching, (son ec kione dagh bleïn, son dy row eh trome er, shen-y-fa ghow eh jeh eh,) howse eh folt e ching ec daa cheead shekel, lurg towse y ree. 27As da Absalom va ruggit three mec, as un inneen, va’n ennym eck Tamar; ben jeh eddin aalin.

28Myr shoh chum Absalom slane daa vleïn ayns Jerusalem, fegooish fakin eddin y ree. 29Shen-y-fa hug Absalom fys er Joab, dy choyrt eh er chaghteraght gys y ree; agh cha darragh eh huggey: as tra hug eh fys reesht y nah cheayrt, dob eh cheet. 30Shen-y-fa dooyrt eh rish e harvaantyn, Jeeagh-jee, ta magher ec Joab er-gerrey da’n magher aym’s, as ta oarn echey ayn; immee-jee, as cur-jee aile ayn. As ren sharvaantyn Absalom soiaghey’n magher er aile. 31Eisht hrog Joab er, as haink eh gys Absalom gys e hie, as dooyrt eh rish, Cre’n-fa ta dty harvaantyn er hoiaghey my vagher er aile? 32As dreggyr Absalom Joab, Cur-my-ner hug mee fys ort, gra, Tar hym, dy gholl er chaghteraght dou gys y ree, as dy ghra rish, Cre’n-fa ta mee er jeet veih Geshur? veagh eh ny bare dou dy ve er vuirriaght raad va mee: nish, er-y-fa shen, lhig dou cheet fenish y ree; as my ta neu-chairys erbee aynym, lhig da goaill my vioys. 33Er shoh, hie Joab gys y ree, as dinsh eh da: as tra deïe eh er Absalom, haink eh gys y ree, as chroym eh eh-hene lesh e eddin gys y thalloo fenish y ree: as ren y ree Absalom y phaagey.