CAB. XVI

1As tra va David er n’gholl tammylt harrish mullagh y chronk, cur-my-ner, haink Ziba sharvaant Mephibosheth ny whail, lesh cubbyl dy assylyn jeeltit, as orroo daa cheead bwilleen arran, as keead dhoss dy raisinyn, as keead dy vessyn-souree, as saagh feeyney. 2As dooyrt y ree rish Ziba, Cre hon ta ooilley shoh? As dooyrt Ziba, Ta ny assylyn son lught-thie’n ree dy varkiagh orroo, as yn arran as ny messyn souree son beaghey da ny deiney aegey, as y feeyn dy ooraghey adsyn vees faiynt ’syn aasagh. 3As dooyrt y ree, As cre vel mac dty vainshtyr? As dreggyr Ziba y ree, Cur-my-ner, t’eh fuirriaght ec Jerusalem: son dooyrt eh, Jiu ver lught-thie Israel dou reesht reeriaght m’ayrey. 4Eisht dooyrt y ree rish Ziba, Cur-my-ner, lhiat’s ta ooilley ny va bentyn da Mephibosheth. As dooyrt Ziba, Shoh ta mee dy imlee guee ort, dy voddym agh foayr y gheddyn ayns dty hilley, my hiarn, O ree.

5As tra va ree David er jeet gys Bahurim, cur-my-ner, haink magh veih dooinney jeh kynney Saul, va’n ennym echey Shimei, mac Gera: haink eh magh, as gweeaghyn kinjagh myr haink eh. 6As hilg eh claghyn er David, as er ooilley sharvaantyn ree Ghavid: as va ooilley’n pobble as ooilley ny deiney caggee er e laue yesh as er e laue hoshtal. 7As myr shoh loayr Shimei myr v’eh gweeaghyn, Magh lhiat, magh ass y cheer oo, uss ghooinney folley, as uss vac Velial: 8Ta’n Chiarn e chooilleeney ort ooilley fuill thie Saul, ’syn ynnyd echey t’ou uss er reill, as ta’n Chiarn er livrey’n reeriaght gys laue Absalom dty vac: jeeagh nish, ta dty olkys hene er verraghtyn ort, son dy nee dooinney folley oo.

9Eisht dooyrt Abishai mac Zeruiah rish y ree, Cre’n-fa ghoghe yn moddey custey shoh er dy ghweeaghyn da my hiarn y ree? lhig dou goll noon, ta mee guee ort, as giarey’n kione jeh. 10As dooyrt y ree, Cre t’aym’s diuish nish dy yannoo er my hon, shiuish vec Zeruiah? Myr shen lhig da gweeaghyn, son dy vel y Chiarn er ghra rish, Gwee mollaght da David. Quoi ghoys er dy ghra, Cre hon t’ou er n’yannoo shoh? 11As dooyrt David rish Abishai, as rish ooilley e harvaantyn, Cur-my-ner, ta my vac, haink magh veih my veeghyn, shegin er my vioys: foddey sloo eisht ta’n Benjamite shoh dy ve cronnit. Faag-jee veue eh, as lhig da gweeaghyn: son ta’n Chiarn er lhiggey da. 12Foddee dy jean y Chiarn jeeaghyn er my hrimshey, as dy der y Chiarn cooilleeney mie dou son y ghweeaghyn echeysyn er y laa shoh. 13As myr hie David as e gheiney er y raad, jimmee Shimei rish lhiattee’n chronk er-nyn-skyn, as v’eh gweeaghyn myr v’eh goll, as tilgey claghyn, as ceau joan er. 14As haink y ree, as ooilley’n pobble va mârish, skee; as ren ad ooraghey ad-hene ayns shen.

15As haink Absalom, as ooilley’n pobble deiney Israel, gys Jerusalem, as Ahitophel mâroo. 16As haink eh gy-kione, tra va Hushai yn Archite, carrey Ghavid, er jeet gys Absalom, dy dooyrt Hushai rish Absalom, Dy bannee Jee yn ree, dy bannee Jee yn ree. 17As dooyrt Absalom rish Hushai, Nee shoh dt’aigney-mie da dty charrey? cre’n-fa nagh jagh oo marish dty charrey? 18As dooyrt Hushai rish Absalom, Nay; agh eshyn ta’n Chiarn, as y pobble shoh, as ooilley deiney Israel, dy reih, mârishyn beem’s, as leshyn neem’s shassoo. 19As reesht, quoi lhisin shirveish? nagh lhisin shirveish fenish e vac? Myr ta mee er hirveish fenish dt’ayrey, myr shen nee’m ayns yn enish ayd’s.

20Eisht dooyrt Absalom rish Ahitophel, Cur-jee nyn goyrle dy cheilley cre nee mayd. 21As dooyrt Ahitophel rish Absalom, Gow stiagh gys co-lhiabbee dt’ayrey, t’eh er vaagail dy ghoaill kiarail jeh’n thie; as Clynnee ooilley Israel dy vel dwoaie ec dt’ayr ort: eisht bee ny laueyn ocsyn ooilley ta mayrt er nyn niartaghey. 22Er shoh skeayl ad cabbane da Absalom er mullagh y thie; as lhie Absalom marish co-lhiabbee e ayrey, ayns shilley ooilley Israel. 23As va coyrle Ahitophel ayns ny laghyn shen, myr dy beagh eh veih beeal Yee: myr shoh va ooilley coyrle Ahitophel, chammah marish David as marish Absalom.