CAB. XIX

1As ve inshit da Joab, Cur-my-ner, ta’n ree keayney as dobberan son Absalom. 2As va’n varriaght er y laa shen er ny hyndaa gys trimshey da ooilley’n pobble: son cheayll ad er y laa shen kys va’n ree seaghnit son e vac. 3As ren y pobble sheeley ersooyl voish er y laa shen gys yn ard-valley, myr sleih dy naareydagh geid ersooyl tra t’ad chea veih’n chaggey. 4Agh choodee’n ree e eddin, as dyllee eh lesh coraa ard, O my vac Absalom! O Absalom, my vac, my vac! 5As haink Joab stiagh ’sy thie gys y ree, as dooyrt eh, T’ou er y laa jiu er naaraghey eddin ooilley dty harvaantyn, ta jiu er hauail dty vioys, as bioys dty vec, as dt’inneenyn, as bioys dty vraane, as bioys dty cho-lhiabbee; 6Ayns wheesh as dy vel oo er yeeaghyn aigney-mie da dty noidyn, as dwoaie da dty chaarjyn: son t’ou er hoilshaghey er y laa jiu, nagh vel scansh ayd jeh princeyn, ny sharvaantyn: son ta mee cur-my-ner jiu, dy beagh Absalom er ve bio, as shinyn ooilley er ve giarit jeh er y laa jiu, nagh beagh eh wheesh dy hrimshey dhyt. 7Shen-y-fa nish, irree, gow magh, as loayr dy gerjoilagh rish dty harvaantyn: son ta mee breearrey liorish y Chiarn, mannagh jed oo magh, cha bee fer nee fuirriaght mayrt’s noght: as bee shen ny smessey dhyt na dy chooilley olk t’er duittym ort veih dty aegid derrey nish. 8Eisht dirree’n ree, as hoie eh ’sy yiat. As dinsh ad da ooilley’n pobble, gra, Cur-my-ner, ta’n ree ny hoie ’sy yiat. As haink ooilley’n pobble kiongoyrt rish y ree; son va Israel er gosney ersooyl dy chooilley ghooinney gys e chummal.

9As va anvea mastey ooilley’n pobble, trooid ooilley tribeyn Israel, gra, Haue y ree shin ass laue nyn noidyn, as livrey eh shin ass laue ny Philistinee; as nish t’eh er roie’n cheer kyndagh rish Absalom. 10As Absalom, ren shin y ooilaghey harrin, t’eh marroo ’sy chaggey: nish er-y-fa shen, kys te nagh vel shiu loayrt fockle mychione coyrt lhieu back y ree?

11As hug David fys gys Zadok as gys Abiathar ny saggyrtyn, gra, Loayr-jee rish shanstyr Yudah, gra, Kys te dy vel shiuish cha liastey ayns coyrt lhieu back y ree gys e hie? (fakin dy vel glare ooilley Israel er jeet gys y ree, eer gys e hie.) 12Shiuish my vraaraghyn, shiuish my chraueyn, as my eill: cre’n-fa eisht ta shiuish yn vooinjer s’jerree dy gheddyn back y ree? 13As abbyr-jee rish Amasa, Nagh vel uss jeh my chraue, as jeh my eill? Dy jean Jee myr shen rhym’s, as ny smoo neesht, mannagh bee uss ard-chaptan y cheshaght-chaggee aym’s choud’s bio oo, ayns ynnyd Yoab. 14As hyndaa eh cree ooilley deiney Yudah, myr cree un dooinney; myr shen dy dug ad y chaghteraght shoh gys y ree, Tar hooin reesht oo-hene, as ooilley dty harvaantyn. 15Myr shen hyndaa’n ree, as haink eh gys Jordan. As haink Judah gys Gilgal, dy gholl quail y ree, dy choyrt eh harrish Jordan.

16As ren Shimei, mac Gera, ny Venjamite, va jeh Bahurim, siyr, as haink eh neose marish deiney Yudah dy gholl quail ree David. 17As va thousane dy gheiney Venjamin mârish, as Ziba sharvaant dy hie Saul, as e wheig mec jeig, as feed sharvaant mârish, as hie ad harrish Jordan roish y ree. 18As hie baatey dy choyrt lesh harrish lught-thie’n ree, as dy hendeil er. As huitt Shimei mac Gera sheese kiongoyrt rish y ree, tra v’eh er jeet harrish Jordan; 19As dooyrt eh rish y ree, Ny lhig da my hiarn cur my ghrogh-yannoo my lieh, chamoo cooinee er shen ny ren dty harvaant dy olkyssagh er y laa hie my hiarn y ree magh ass Jerusalem, dy goghe y ree eh gys e chree. 20Son ta fys ec dty harvaant dy vel mee foiljagh: shen-y-fa, cur-my-ner, ta mish yn chied er jeh ooilley thie Yoseph, t’er jeet er y laa jiu dy gholl sheese quail my hiarn y ree. 21Agh dreggyr Abishai mac Zeruiah, as dooyrt eh, Nagh bee Shimei er ny choyrt gy-baase son shoh, dy ren eh gwee mollaght er ree ooilit y Chiarn? 22As dooyrt David, Cre t’enish dy yannoo rhym’s ’sy chooish shoh, shiuish vec Zeruiah, dy ve wheesh m’oï er y laa shoh? Bee dooinney erbee er ny choyrt gy-baase er y laa jiu ayns Israel? son nagh vel fys aym dy vel mee nish my ree harrish Israel? 23Shen-y-fa dooyrt y ree rish Shimei, Cha bee oo er dty choyrt gy-baase: as ren y ree breearrey da.

24As haink Mephibosheth mac Saul neose quail y ree, as cha row eh chamoo er niee e chassyn, ny er vaarey e aasaag, ny er chaghlaa e choamrey er-dyn laa hie’n ree roish derrey’n laa haink eh reesht ayns shee. 25As haink eh gy-kione, tra v’eh er jeet gys Jerusalem dy veeiteil y ree, dy dooyrt y ree rish, Cre’n-fa nagh jagh uss mârym’s, Mephibosheth? 26As dreggyr eh, My hiarn, O ree, ren my harvaant m’y volley; son dooyrt mish dty harvaant, Cur jeelt er yn assyl dou dy varkiagh, dy gholl quail y ree, er-yn-oyr dy vel dty harvaant baccagh. 27As t’eh er luney dty harvaant gys my hiarn y ree; agh ta my hiarn y ree myr ainle Yee: shen-y-fa jean shen ta mie ayns dty hilley. 28Son cha row ooilley thie m’ayrey agh deiney marroo kiongoyrt rish my hiarn y ree: ny-yeih hoie oo dty harvaant mastey goaldee dty voayrd hene. Cre’n chairys eisht t’aym’s dy yannoo aghin sodjey gys y ree? 29As dooyrt y ree rish, Cha lhiass dhyt loayrt ny sodjey mychione dty chooishyn? ta mee er ghra, Gow uss as Ziba yn thalloo eddyr shiu. 30As dooyrt Mephibosheth rish y ree, lhig da eer y slane y ghoaill, fakin dy vel my hiarn y ree er jeet reesht ayns shee gys e hie hene.

31As haink Barzillai yn Gileadite neose veih Rogelim, as hie eh harrish Jordan marish y ree, dy akin eh harrish Jordan. 32Nish va Barzillai ny ghooinney feer shenn, eer kiare-feed bleïn dy eash, as v’eh er n’yannoo magh y ree lesh beaghey choud’s duirree eh ec Mahanaim; son v’eh dooinney feer ooasle. 33As dooyrt y ree rish Barzillai, Tar harrish mârym’s, as nee oo beaghey mârym pene ayns Jerusalem. 34As dooyrt Barzillai rish y ree, Caïd t’aym’s dy ve bio, my lheid’s dy gholl seose marish y ree, gys Jerusalem? 35Ta mish jiu kiare-feed bleïn dy eash; as voddym’s briwnys eddyr mie as sie? vod blass ve ec dty harvaant jeh ny ta mee gee, ny giu? voddym’s arragh taitnys ’ghoaill ayns bingys deiney as mraane kiaullee? cre’n-fa eisht veagh dty harvaant foast ny errey da my hiarn y ree? 36Hed dty harvaant tammylt beg sodjey harrish Jordan marish y ree; as cre’n-fa yinnagh y ree mish y chooilleeney lesh lheid y chenjallys ooasle? 37Lhig da dty harvaant, ta mee guee ort, chyndaa back reesht, dy voddym baase y gheddyn ayns my ard-valley hene, as ve oanluckit ayns oaie m’ayr as my voir: agh cur-my-ner dty harvaant Chimham, lhig dasyn goll harrish marish my hiarn y ree; as jean er e hon lurg dt’aigney hene. 38As dansoor y ree, Hed Chimham harrish mârym, as neem’s er e hon lurg dt’aigney hene: as cre-erbee nee oo geearree orrym, shen nee’m er dty hon’s. 39As hie ooilley’n pobble harrish Jordan, as tra va’n ree er gheddyn harrish, ren y ree paagey Barzillai, as vannee eh eh; as hyndaa eh gys e hie hene. 40Eisht hie’n ree er e hoshiaght gys Gilgal, as Chimham mârish; as va ooilley pobble Yudah goll marish y ree, as myrgeddin lieh jeh pobble Israel.

41As cur-my-ner, haink ooilley deiney Israel gys y ree, as dooyrt ad rish y ree, Cre’n-fa ta nyn mraaraghyn, deiney Yudah, er gheid oo ersooyl, as er choyrt lhieu yn ree, as lught e hie, as ooilley deiney Ghavid mârish, harrish Jordan? 42As dreggyr ooilley deiney Yudah deiney Israel, Er-yn-oyr dy vel y ree faggys mooinjerys dooin: cre’n-fa eisht ta shiu corree son y chooish shoh? vel shin er veaghey eddyr ec cost y ree? ny vel eh er chur dooin leagh erbee? 43As dreggyr deiney Israel deiney Yudah, as dooyrt ad, Ta jeih ayrnyn ain ayns y ree, as ta myrgeddin ny smoo dy chairys ainyn ayns David na t’euish: cre’n-fa eisht hoie shiu cha beg j’inyn, as nagh row’n choyrle ain hoshiaght er ny hirrey ayns coyrt lesh back y ree ainyn? As va goan deiney Yudah ny s’fargagh na goan deiney Israel.