CAB. II

1As haink eh gy-kione lurg shoh, dy ren David briaght jeh’n Chiarn, gra, Jem seose gys veg jeh ard-valjyn Yudah? As dooyrt y Chiarn rish, Gow seose. As dooyrt David, Quoi jeh ny ard-valjyn? As dooyrt eh, Gys Hebron. 2Er shoh hie David seose gys shen, as e ghaa ven mârish, Ahinoam yn Jezreelite, as Abigail ben Nabal yn Carmelite. 3As ny deiney va mârish hug David lesh seose, dy chooilley ghooinney lesh lught e hie: as ren ad cummal ayns ard-valjyn Hebron. 4As haink deiney Yudah, as ayns shen ren ad David y ooilaghey ny ree harrish thie Yudah. As dinsh ad da David, gra, Dy nee deiney Yabesh-gilead ren Saul y oanluckey.

5As hug David chaghteryn gys deiney Yabesh-gilead, as dooyrt eh roo, Bannit dy row shiuish jeh’n Chiarn, son y chenjallys shoh ta shiu er hoilshaghey da nyn jiarn, eer da Saul, as dy vel shiu er n’oanluckey eh. 6As nish dy jean y Chiarn kenjallys as firrinys y hoilshaghey diuish: as neem’s myrgeddin shoh nyn aigney-mie y chooilleeney, son dy vel shiu er n’yannoo yn red shoh. 7Shen-y-fa nish, lhig da nyn laueyn v’er nyn niartaghey, as bee-jee dunnal: son ta nyn mainshtyr Saul marroo, as er shoh ta thie Yudah er my ooilaghey dy ve ree harrystoo.

8Agh Abner mac Ner, captan sheshaght-caggee Saul, ghow eh Ish-bosheth mac Saul, as hug eh lesh eh harrish gys Mahanaim: 9As ren eh eh ny ree harrish Gilead, as harrish ny Ashuriteyn, as harrish Jezreel, as harrish Ephraim, as harrish Benjamin, as harrish ooilley Israel. 10Va Ish-bosheth mac Saul da-eed bleïn dy eash tra ren eh toshiaght dy reill harrish Israel, as v’eh er reill daa vleïn. Agh deiyr thie Yudah er David. 11(As y traa va David ny ree ayns Hebron harrish thie Yudah, va shiaght bleeaney as shey meeaghyn.)

12As hie Abner mac Ner, as sharvaantyn Ish-bosheth mac Saul, magh veih Mahanaim gys Gibeon. 13As hie Joab mac Zeruiah, as sharvaantyn Ghavid, magh, as haink ad dy cheilley, ec loghan Ghibeon: as ghow ad grunt, ad shoh er y cheu shoh jeh’n loghan, as ad shid er y cheu elley. 14As dooyrt Abner rish Joab, Lhig da ny deiney aegey nish girree, as cloie-caggee y yeeaghyn dooin. As dooyrt Joab, Lhig daue girree. 15Eisht hrog ad orroo, as hie ad harrish, ghaa yeig jeh Benjamin, v’er cheu Ish-bosheth mac Saul, as ghaa-yeig jeh deiney Ghavid. 16As haare ad dagh fer e heshey er y chione, as roie eh e chliwe ayns lhiattee e heshey; myr shen dy huitt ad sheese cooidjagh. Shen-y-fa va’n ynnyd shen enmyssit Helkath-hazzurim t’ayns Gibeon. 17As va magher feer dewil ayn er y laa shen: as chossyn sharvaantyn Ghavid y laa er Abner, as er deiney Israel.

18As va three jeh mec Zeruiah ayns shen, Joab, as Abishai, as Asahel: as va Asahel coshee cha skibbylt as feeaïh ’sy vagher. 19As deiyr Asahel er Abner; as ayns e immeeaght cha hyndaa eh gys y laue yesh ny gys y laue chiare veih geiyrt er. 20Eisht yeeagh Abner ny yeï, as dooyrt eh, Nee uss Asahel? As dreggyr eh, Mish eh. 21As dooyrt Abner rish, Chyndaa dy lhiattee gys y laue yesh ny gys y laue hoshtal, as glack fer jeh ny deiney aegey, as gow yn eïlley-caggee echeysyn. Agh cha jyndaagh Asahel dy lhiattee veih geiyrt er Abner. 22As dooyrt Abner reesht rish Asahel, Chyndaa dy lhiattee veih geiyrt orrym’s; nagh lhieg-yms oo gys y thalloo: kys eisht oddin’s m’eddin y yeeaghyn da Joab dty vraar? 23Ny-yeih, dob eh dy hyndaa dy lhiattee: shen-y-fa woaill Abner eh lesh kione e shleiy fo’n wheiggoo asney, dy daink yn shleiy magh trooid e ghreeym; as huitt eh sheese ayns shen, as hooar eh baase ’syn ynnyd cheddin: as shen myr ve, whilleen as haink gys y boayl raad huitt Asahel sheese, as hooar eh baase, dy hass ad. 24Hie Joab myrgeddin as Abishai er-eiyrt’s Abner: as ve mysh lhie ny greïney tra rosh ad gys cronk Ammah, ta jeeragh er Giah, lesh faasagh Gibeon. 25As hayrn cloan Venjamin ad-hene cooidjagh dy gholl er-eiyrt’s Abner, as haink ad dy ve un heshaght, as hass ad er mullagh cronk. 26Eisht deïe Abner gys Joab, as dooyrt eh, Vel yn cliwe ry-hoi stroie son dy bragh? nagh vel fys ayd dy bee’n obbyr shoh trimshey ec y jerrey? caïd eisht nee oo lhiggey shaghey dy lhiettal y pobble veih geiyrt er nyn mraaraghyn? 27As dooyrt Joab, Myr ta Jee bio, er-be dty ghoan hene ’sy voghrey, va’n pobble son shickyrys er skeayley gyn dooinney dy eiyrt er e vraar. 28Myr shen ren Joab sheidey trumpet, as hault ooilley’n pobble, as cha deiyr ad er Israel ny sodjey, as va’n caggey ec kione. 29As huill Abner as e gheiney fud-ny-hoie shen trooid y thalloo-rea, as hie ad harrish Jordan, as jimmee ad trooid ooilley Bithron, as haink ad gys Mahanaim. 30As hyndaa Joab veih geiyrt er Abner: as tra v’eh er haglym ooilley e gheiney cooidjagh, va dy laccal jeh sharvaantyn Ghavid nuy deiney jeig, as Asahel. 31Agh va sharvaantyn Ghavid er woalley as er varroo jeh Benjamin, as jeh deiney Abner, three cheead as three-feed.

32As hrog ad lhieu Asahel, as doanluck ad eh ayns oaie e ayrey, v’ayns Beth-lehem. As hie Joab as e gheiney fud-ny-hoie, as haink ad gys Hebron ec brishey’n laa.