CAB. XX

1As haghyr dooinney dy ve ayns shen, dooinney dy Velial, as yn ennym echey Sheba, mac da Bichri, ny Venjamite; as heid eh trumpet, as dooyrt eh, Cha vel ayrn erbee ainyn ayns David, chamoo ta eiraght ain ayns mac Jesse: dy chooilley ghooinney gys e hie hene, O Israel. 2Myr shen hie ooilley deiney Israel seose veih David, as deiyr ad er Sheba mac Bichri: agh lhiann deiney Yudah gys nyn ree, veih Jordan eer gys Jerusalem.

3As haink David gys e hie ayns Jerusalem, as ghow’n ree ny jeih mraane e cho-lhiabbee, v’eh er n’aagail dy reayll e hie, as yeigh eh seose ad ayns thie er-lheh, as doardee eh beaghey daue, agh cha row echey dy yannoo roo: myr shoh v’ad scarrit voish derrey laa nyn maaish, baghey myr mraane-treoghe.

4Eisht dooyrt y ree rish Amasa, Tayrn cooidjagh hym’s deiney Yudah cheu-sthie jeh three laa, as bee uss oo-hene ayns shoh kionfenish mâroo. 5Myr shen hie Amasa dy haglym deiney Yudah, agh duirree eh ny sodjey na’n traa pointit. 6As dooyrt David rish Abishai, Nish nee Sheba mac Bichri ny smoo dy aggair dooin na ren Absalom: gow uss sharvaantyn dty hiarn, as immee er e eiyrt’s, er-aggle dy vow eh stiagh ayns ard-valjyn voallit, as dy gossyn eh voïn. 7As hie magh geiyrt er, deiney Yoab, as ny Cherethiteyn, as ny Pelethiteyn, as ooilley ny deiney niartal caggee: as hie ad magh ass Jerusalem, er-eiyrt’s Sheba mac Bichri. 8Tra v’ad ec y chlagh vooar hoit t’ayns Gibeon, ren Amasa leeideil ad. As va coamrey Yoab v’eh er choyrt mysh cryssit er, as er e chryss va cliwe ayns fine kianlt er e veeghyn; as myr v’eh goll huitt y cliwe ass. 9As dooyrt Joab rish Amasa, Vel oo ayns slaynt, my vraar? As ghow Joab Amasa er e aasaag lesh e laue yesh dy choyrt paag da. 10Agh cha dug Amasa tastey da’n chliwe v’ayns laue Yoab: myr shen woaill eh eh lesh fo’n wheiggoo asney, as gheayrt eh magh e vynnagh er y thalloo, as cha woaill eh arragh; as hooar eh baase. Myr shen deiyr Joab as Abishai e vraar er Sheba mac Bichri. 11As hass fer jeh deiney Yoab liorish [Amasa], as dooyrt eh, Eshyn ta son Joab, as eshyn ta er cheu Ghavid, lhig da geiyrt er Joab. 12As va Amasa ny lhie strepey ayns e uill ayns mean y raad-vooar: as tra honnick y dooinney dy hass ooilley’n pobble raad v’eh, scugh eh Amasa ass y raad-vooar gys y vagher, as hilg eh coodagh harrish, tra honnick eh dy hass dy chooilley ghooinney haink raad v’eh. 13Tra v’eh scughit ass y raad-vooar, hie ooilley’n pobble er nyn doshiaght lurg Joab, er-eiyrt’s Sheba mac Bichri.

14As hie eh trooid ooilley tribeyn Israel gys Abel, as gys Beth-maachah, as ooilley ny Beriteyn; as v’adsyn er nyn jaglym cooidjagh, as hie ad myrgeddin mârish, 15As haink ad, as chruinnee ad stiagh eh [Sheba] ayns Abel jeh Beth-maachah, as hrog ad yrjid noi’n ard-valley, as lhieen eh yn jeeig, as chleiy ooilley’n pobble va marish Joab fo’n voalley dy lhieggal eh. 16Eisht deïe ben chreeney veih voalley’n ard-valley, Eaisht-jee, eaisht-jee; abbyr-jee, ta mee guee erriu, rish Joab, Tar gys shoh, dy voddym loayrt rhyt. 17As tra v’eh er jeet er-gerrey, dooyrt y ven, Nee uss Joab? As dreggyr eh, Mish eh Eisht dooyrt ee rish, Eaisht rish goan dty harvaant. As dreggyr eh, Ta mee geaishtagh. 18As loayr ee, gra, Bollagh ad gra ’sy chenn earish, gra, Nee ad son shickyrys coyrle y hirrey ec Abel; as myr shen ren ad reaghey ny cooishyn. 19Ta mish unnane jeusyn ta sheeoil as firrinagh ayns Israel: t’ou shirrey stroie ard-valley, as moir balley ayns Israel: cre’n-fa nee oo sluggey seose eiraght y Chiarn? 20As dreggyr Joab as dooyrt eh, Foddey dy row eh voym, shen dy row foddey voym, dy jinnin’s sluggey seose ny stroie. 21Cha nee shen myr ta’n chooish: agh ta dooinney jeh slieau Ephraim (Sheba mac Bichri e ennym,) er hroggal seose e laue noi’n ree, eer noi David: jean-jee eshyn ynrycan y livrey hym, as faag-yms yn ard-valley. As dooyrt y ven rish Joab, Cur-my-ner, bee e chione tilgit magh hood’s harrish y voalley. 22Eisht hie’n ven gys ooilley’n pobble ayns e creenaght: as yiare ad jeh kione Sheba mac Bichri, as hilg ad eh magh gys Joab. As heid eh trumpet, as hrog ad veih’n ard-valley, dy chooilley ghooinney gys e chabbane. As hyndaa Joab gys y ree ec Jerusalem.

23Nish va Joab harrish slane sheshaght-caggee Israel; as va Benaiah mac Jehoiada harrish ny Cherethiteyn, as harrish ny Pelethiteyn; 24As Adoram va harrish ny keeshyn; as Jehoshaphat mac Ahilud va cleragh ny lioaryn; 25As Sheba va’n scrudeyr; as Zadok as Abiathar va ny saggyrtyn; 26As va Ira, yn Jairite, myrgeddin ny ard-reiltagh mygeayrt David.