CAB. XXI

1Nish va gortey ayns laghyn Ghavid three bleeaney, bleïn lurg bleïn; as vrie David jeh’n Chiarn. As dreggyr y Chiarn, Te kyndagh rish Saul, as kyndagh rish e hie folley, er-yn-oyr dy dug eh gy-baase ny Gibeoniteyn. 2As deïe’n ree er ny Gibeoniteyn, as dooyrt eh roo; (nish cha row ny Gibeoniteyn jeh cloan Israel, agh jeh fooilliagh ny Amoriteyn; as va cloan Israel er vreearrey daue; as ve ayns aigney Saul dy stroie ad ayns e yeeanid da cloan Israel as Yudah;) 3Shen-y-fa dooyrt David rish ny Gibeoniteyn, Cre neem’s er ny son eu? as cre lesh nee’m lhiasaghey diu, dy vod shiu eiraght y Chiarn y vannaghey? 4As dooyrt ny Gibeoniteyn rish, Cha shir mayd argid ny airh jeh Saul, ny jeh e hie, chamoo er ny son ainyn ver oo gy-baase dooinney erbee ayns Israel. As dooyrt eh, Cre-erbee jir shiu, shen neem’s er nyn son. 5As dreggyr ad y ree, Yn dooinney va son stroie shin, as kiarail olk nyn ’oï, dy yiarey shin jeh veih cummal ayns veg jeh ardjyn Israel, 6Lhig da shiaght deiney jeh e vec ve er ny livrey hooin, as crogh mayd ad seose son lhiasaghey fenish y Chiarn, ayns Gibeah jeh Saul, ren y Chiarn y reih. As dooyrt y ree, Ver-ym diu ad. 7Agh haue y ree Mephibosheth, mac Yonathan, mac Saul, er coontey breearrey’n Chiarn va eddyr ad, eddyr David as Jonathan mac Saul. 8Agh ghow’n ree daa vac Rispah inneen Aiah, dymmyrk ee da Saul, Armoni as Mephibosheth, as queig mec Merob inneen Saul, dymmyrk ee da Adriel, mac Barzillai yn Meholathite; 9As livrey eh ad gys laue ny Gibeoniteyn, as ren ad croghey ad er y chronk kiongoyrt rish y Chiarn: as huitt ooilley’n shiaght cooidjagh, as v’ad er nyn goyrt gy-baase ayns laghyn yn ouyr, er ny chied laghyn, ayns toshiaght y fouyr-oarn.

10As ghow Rizpah inneen Aiah aanrit-sack, as skeayl ee eh er y chreg, veih toshiaght yn ouyr derrey huitt fliaghey neose orroo veih’n aer, as cha lhig ee da eeanlee’n aer dy heet orroo ’sy laa, ny beishtyn y vagher ’syn oie. 11As ve er n’insh da David cre va Rizpah inneen Aiah, co-lhiabbagh Saul, er n’yannoo.

12As doardee David, as ghow ad craueyn Saul as craueyn Yonathan e vac, veih deiney Yabesh-gilead, v’er gheid ad veih straid Beth-shan, raad chrogh ny Philistinee [ad, tra va ny Philistinee er varroo] Saul ayns Gilboa. 13As hug ad lhieu seose veih shen craueyn Saul, as craueyn Yonathan e vac; as hrog ad ny craueyn ocsyn va croghit. 14As craueyn Saul as Yonathan e vac, doanluck ad ayns cheer Venjamin ayns Zelah, ayns lhiaght Kish e ayr; as chooilleen ad ooilley ny ren y ree y harey: as ny lurg shen va Jee foayroil da’n cheer.

15Ny lurg shoh, va caggey reesht ec ny Philistinee rish Israel; as hie David sheese, as e harvaantyn mârish, as ren ad caggey noi ny Philistinee; as daase David faiynt. 16As Ishbi-benob, fer jeh mec y foawr, (va trimmid e shleiy three cheead shekel dy phrash) as lesh cliwe noa er e chryss, smooinee eh dy varroo David. 17Agh haink Abishai mac Zeruiah gys e chooney, as woaill eh yn Philistine, as varr eh eh. Eisht loo deiney Ghavid da, gra, Cha jed oo magh arragh mârin gys y chaggey, er-aggle dy bee soilshey Israel er ny vooghey. 18As haink eh gy-kione lurg shoh, dy row caggey reesht rish ny Philistinee ec Gob: raad ren Sibbechai yn Hushathite marroo Saph va jeh mec y foawr. 19As va reesht caggey elley ec Gob rish ny Philistinee, raad varr Elhanan mac Jaare-oregim, y Beth-lehemite, braar Gholiath y Gittite, lorg yn shleiy echey va myr garmin fidderagh. 20As va foast caggey elley ec Gath, raad va dooinney feer thollee, va echey er dagh laue shey meïr, as er dagh chass shey ordaagyn, kiare as feed ayns ooilley; as v’eshyn myrgeddin ruggit da’n foawr. 21As tra v’eh shoh er choyrt y-lane fo Israel, varr Jonathan, mac Shimea, braar Ghavid eh. 22Va’n chiare shoh ruggit da’n foawr ayns Gath, as huitt ad liorish laue Ghavid, as liorish laue e harvaantyn.