CAB. XXII

1As ghow David gys y Chiarn goan yn arrane-moyllee shoh, er y laa va’n Chiarn er livrey eh ass laue ooilley e noidyn, as veih laue Saul. 2As dooyrt eh, Yn Chiarn my chreg, my hoor lajer, as my er-livreyee; 3Jee my chreg; ersyn ver-ym my varrant: eshyn my scaa, as niart my haualtys, my hoor ard, as my chemmyrk, my haualtagh; t’ou sauail mee veih tranlaasee. 4Neem’s geamagh er y Chiarn, ta feeu dy ve er ny voylley: myr shen bee’m sauchey veih my noidyn. 5Tra haink tonnyn y vaaish mygeayrt-y-moom, ren thooillaghyn deiney mee-chrauee m’y agglaghey; 6Haink pianyn niurin mygeayrt-y-moom; va ribbaghyn y vaaish kiongoyrt rhym. 7Ayns my heaghyn deïe mee gys y Chiarn, as ren mee my accan gys my Yee; as cheayll eh my choraa veih e hiamble, as hie m’accan stiagh gys e chleayshyn. 8Eisht va’n thalloo er ny ghleashagh, as ren eh craa; ren undinyn niau scughey, as v’ad er-creau, ec e yymmoose. 9Hie jaagh seose veih e enish, as aile stroialtagh voish e eddin: va smarageyn er nyn voaddey lesh. 10Chroym eh ny niaughyn neesht, as haink eh neose; as fo e chassyn va dorraghys. 11As er cherub varkee eh, as ren eh getlagh: as er skianyn y gheayee v’eh er ny akin. 12As ren eh dorraghys e chabbane-reeoil mygeayrt-y-mysh, ushtaghyn dorraghey, as bodjallyn chiu yn aer. 13Trooid y sollyssid hie roish va smarageyn aile er n’oaddey. 14Hug y Chiarn taarnagh veih niau, as ren y fer syrjey coyrt magh e choraa. 15As lhig eh magh e hideyn, as skeayl eh ad; as tendreil, dy choyrt ad bun-ry-skyn. 16As va lhiabbaghyn yn aarkey er nyn vakin, as haink undinyn y theihll rish, ec oghsan y Chiarn, ec blest ennal e yymmoose. 17Hug eh cooney veih’n yrjid, ren eh m’y ghoaill; hayrn eh mee ass ymmodee ushtaghyn; 18Livrey eh mee veih my noid niartal, as vouesyn va dwoaie oc orrym: son v’ad ro lajer er my hon. 19Haink ad orrym gyn-yss ayns laa my heaghyn: agh va’n Chiarn my chemmyrk. 20Hug eh lesh mee magh neesht gys boayl dy reamys; livrey eh mee, son dy row taitnys echey aynym. 21Ren y Chiarn m’y chooilleeney lurg my ynrickys; cordail rish glennid my laueyn t’eh er my chooilleeney. 22Son ta mee er vreayll raaidyn y Chiarn, as cha vel mee dy mee-chrauee er hreigeil my Yee. 23Son va ooilley e leighyn kiongoyrt rhym: as son e lattyssyn, cha hyndaa mee voue. 24Va mee myrgeddin ynrick kiongoyrt rish, as hug mee cooyl rish my olkys hene. 25Shen-y-fa ta’n Chiarn er m’y chooilleeney lurg my ynrickys; cordail rish my ghlennid ayns shilley e hooillyn. 26Da’n dooinney myghinagh nee oo soilshaghey oo-hene myghinagh, as da’n dooinney ynrick nee oo soilshaghey oo-hene ynrick. 27Dasyn ta glen nee oo soilshaghey oo-hene glen, as noi’n roonagh soilshee oo dty roon. 28As yn vooinjer seaghnit nee oo sauail: agh ta dty hooillyn er ny mooaralee, dy injillaghey ad. 29Son she uss my chainle, O Hiarn; as chyndaa-ee’n Chiarn my ghorraghys gys soilshey. 30Son liort’s ta mee er vrishey trooid sheshaght dy gheiney-caggee: liorish my Yee ta mee er lheim harrish voalley. 31Er son Jee, ta e raad ynrick: ta goo’n Chiarn er ny phrowal: t’eh myr eïlley-caggee dauesyn ooilley ta treishteil ayn. 32Son quoi ta’n Jee, agh y Chiarn? as quoi ta’n chreg, agh y Jee ainyn? 33Ta jee my niart, as my phooar: as t’eh jannoo my raad jeeragh. 34T’eh jannoo my chassyn myr cassyn feeaih; as soiaghey mee er m’ynnydyn ardey. 35T’eh gynsaghey my laueyn dy chaggey; myr shen dy vel bow steillyn er ny vrishey liorish my roihaghyn. 36T’ou myrgeddin er choyrt dou scape dty haualtys; as ta dty chenjallys ghraihagh er my hoiaghey seose. 37T’ou er choyrt reamys da my chesmadyn; myr shen nagh ren my chassyn skyrraghtyn. 38Ta mee er n’eiyrt er my noidyn, as er stroie ad; chamoo hyndaa mee reesht derrey va mee er stroie ad. 39As ta mee er stroie ad, as er lhottey ad, nagh voddagh ad girree: dy feer, t’ad er duittym fo my chassyn. 40Son t’ou er my choamrey lesh niart son y chaggey: adsyn dirree seose m’oï t’ou er vroo fo my chassyn. 41T’ou er choyrt dou myrgeddin mwannallyn my noidyn, dy voddin stroie adsyn ta dwoaie oc orrym. 42Yeeagh ad, agh cha row fer dy hauail; eer gys y Chiarn, agh cha dug eh clashtyn daue. 43Eisht cha myn as joan y thallooin ren mee ad y woalley; myr laagh ny straidyn ren mee ad y stampey, as skeayley ad dy lhean. 44Veih anvea my phobble t’ou myrgeddin er my livrey, t’ou er my reayll dy ve kione ny ashoonyn: nee pobble nagh nione dou mish y hirveish. 45Nee joarreeyn ginjillaghey ad-hene hym: cha leah’s chlinnys ad, ver ad biallys dou. 46Nee joarreeyn lheïe ersooyl, as bee ad agglagh ayns ny ynnydyn follit oc. 47Ta’n Chiarn bio; as bannit dy row my chreg, as ard-voylley dy row er ny choyrt da Jee, creg my haualtys. 48She Jee ta goaill cooilleeney dou, as ta coyrt y pobble sheese foym, 49As ta livrey mee veih my noidyn: t’ou myrgeddin er my hroggal seose dy ard er-nyn-skyn dirree seose m’oï: t’ou er my livrey veih’n dooinney tranlaasagh. 50Son yn oyr shoh, ver-yms booise dhyt, O Hiarn, mastey ny ashoonee, as goym arraneyn-moyllee gys dt’ennym. 51Eshyn yn toor dy haualtys son e ree; as t’eh soilshaghey myghin da e er-ooilit, da David, as da e luight er son dy bragh.