CAB. XXIII

1Nish ad shoh goan s’jerree Ghavid. Dooyrt David mac Jesse, as y dooinney v’er ny hroggal seose dy ard, as fer-ooilit Jee Yacob, as kiaulleyder millish Israel, dooyrt eh, 2Loayr Spyrryd y Chiarn liorym’s, as va e ghoan ayns my hengey. 3Ta Jee Israel er ghra, ta creg Israel er loayrt rhym’s, Shegin dasyn ta reill harrish deiney ve cairagh, reill ayns aggle Yee: 4As bee eh myr soilshey’n voghrey, ec irree ny greïney, eer myr moghrey gyn bodjallyn; myr y faiyr ta gaase ass y thalloo liorish bree sollys y ghrian lurg frassyn. 5Ga nagh vel my hie’s agh fardalagh roish Jee; ny-yeih t’eh er n’yannoo rhym conaant beayn, er ny oardrail dy kiart as dy shickyr ayns dy chooilley nhee: son aynsyn ta my haualtys, as ooilley my yeearree, ga nagh jig eh chelleeragh. 6As bee ooilley mec Velial tilgit dy lhiattee, myr drineyn nagh vod v’er nyn loaghtey. 7Agh y dooinney vennys roo, shegin da ve eïllit lesh yiarn, as cass shleiy; as bee ad dy bollagh er nyn lostey lesh aile, ayns yn ynnyd ta kiarit daue.

8Shoh enmyn ny deiney niartal v’ayns shirveish Ghavid: Yn Tachmonite, yn er b’yrjey soit jeh mastey ny captanyn; (yn er cheddin va Adino yn Eznite;) hrog eh seose e shleiy noi hoght cheead, ren eh y varroo ec yn un traa. 9As by-niessey dasyn va Eleazar mac Dodo yn Ahohite, fer jeh ny three treanee va marish David, tra hug ad y-lane fo ny Philistinee v’ayns shen er nyn jaglym cooidjagh gys caggey, as va cloan Israel er gosney roue: 10Hrog eh er, as woaill eh ny Philistinee, derrey va’n laue echey skee, as lhiannee e laue gys y chliwe: as dobbree’n Chiarn barriaght vooar y laa shen; as cha hyndaa’n pobble mârish, agh dy spooilley. 11As ny lurg-syn va Shammah mac Agee yn Hararite: as va ny Philistinee er nyn jaglym cooidjagh ayns sheshaght, raad va peesh dy ghrunt lane arroo; as chur y pobble cooyl rish ny Philistinee: 12Agh hass eh ayns mean y vagher, as ren eh fendeil eh, as varr eh ny Philistinee: as hug y Chiarn da slane barriaght. 13As hie three jeh ny ard-chaptanyn jeh ny jeih as feed dy gheiney reiht sheese, as haink ad gys David ayns imbagh yn ouyr gys ooig Adullam: as ren sheshaght ny Philistinee campal ayns coan Rephaim. 14As va David ec y traa shen ayns ynnyd lajer, as va garrison ny Philistinee ’sy traa cheddin ayns Beth-lehem. 15As va David miandagh, as dooyrt eh, O dy jinnagh fer erbee jough dou jeh ushtey chibbyr Veth-lehem, ta liorish y yiat! 16As vrish ny three deiney niartal trooid sheshaght ny Philistinee, as hayrn ad ushtey ass chibbyr Veth-lehem, va liorish y yiat, as ghow ad, as hug ad lhieu eh gys David: ny-yeih cha jinnagh eh giu jeh, agh gheayrt eh magh eh fenish y Chiarn. 17As dooyrt eh, Foddey dy row eh voym’s, O Hiarn, dy jinnin’s shoh: nagh nee shoh fuill ny deiney hie ayns gaue nyn mioys? shen-y-fa cha jinnagh eh giu jeh. Shoh myr ren ny three deiney niartal. 18As va Abishai, braar Yoab, mac Zeruiah, yn ard-er mastey three; as hrog eh seose e shleiy noi three cheead, as varr eh ad, as va goo echey mastey’n three shoh. 19Nagh nee eshyn va’n er s’ooasle jeh’n three? shen-y-fa, eh va’n captan oc: ny-yeih cha row eh corrym rish y chied three. 20As Benaiah, mac Jehoiada, mac dy ghooinney dunnal, jeh Kabzeel, va eh-hene dy mennick er phrowal e ghunnallys, varr eh daa Voabite, deiney myr lionyn: hie eh sheese myrgeddin, as varr eh lion ayns ooig, ayns earish sniaghtee. 21As varr eh Egyptian, va ny ghooinney thollee stoamey: as va shleiy ayns laue’n Egyptian; agh hie eh sheese huggey lesh lorg, as chass eh yn shleiy ass laue’n Egyptian, as varr eh eh lesh y shleiy echey hene. 22Ny reddyn shoh ren Benaiah mac Jehoiada, as va’n goo echey mastey ny three treanee s’jerree. 23V’eshyn onnoroil mastey’n jeih as feed, agh cha daink eh seose gys y chied three: as hoie David eh harrish y ghard echey hene. 24Va Asahel braar Yoab fer jeh’n jeih as feed; Elhanan mac Dodo veih Beth-lehem. 25Shammah yn Harodite, Elika yn Harodite, 26Helez yn Paltite, Ira mac Ikkesh yn Tekoite, 27Abiezer yn Anethothite, Mebunnai yn Hushathite, 28Zalmon yn Ahohite, Maharai yn Netophathite, 29Heleb mac Baanah, yn Netophathite; Ittai mac Ribai, ass Gibeah jeh cloan Venjamin, 30Benaiah yn Pirathonite, Hiddai jeh coanyn Ghaash, 31Abi-albon yn Arbathite, Azmaveth yn Barhumite, 32Eliahba yn Shaalbonite; jeh mec Jashen, Jonathan, 33Shammah yn Hararite, Ahiam mac Sharar yn Hararite, 34Eliphelet mac Ahasbai, mac yn Maachathite; Eliam mac Ahitophel yn Gilonite, 35Hezrai yn Carmelite, Paarai yn Arbite, 36Igal mac Nathan jeh Zobah, Bani yn Gadite, 37Zelek yn Ammonite; Naharai yn Beerothite, armyder Yoab mac Zeruiah, 38Ira yn Ithrite, Gareb yn Ithrite, 39Uriah yn Hittite; shiaght-jeig as feed ayns ooilley.