CAB. XXIV

1As reesht va corree’n Chiarn er ny vrasnaghey noi Israel, as son va [Satan] er chleayney David nyn ’oï, gra, Immee, as gow earroo Israel as Yudah. 2Son va’n ree er ghra rish Joab captan e heshaght-chaggee, va mârish, Immee nish trooid ooilley tribeyn Israel, veih Dan eer gys Beer-sheba, as gow-jee coontey’n pobble, dy vod fys ve aym cre ta’n earroo oc. 3As dooyrt Joab rish y ree, Nish dy jean y Chiarn dty Yee bishaghey yn pobble, (cre-erbee t’ad ayns earroo,) keead-filley, as dy vod sooillyn my hiarn y ree fakin eh: agh cre’n-fa ta my hiarn y ree goaill taitnys dy yannoo shoh? 4Agh son shoh as ooilley, ghow goan y ree raad noi Joab, as noi captanyn y cheshaght-chaggee: as hie Joab as captanyn y cheshaght magh veih fenish y ree, dy ghoaill earroo pobble Israel.

5As hie ad harrish Jordan, as ren ad campal ayns Aroer, er cheu yesh yn ard-valley, ta lhie ’sy choan liorish awin Ghad, as er-gerrey da Jazer. 6Eisht haink ad gys Gilead, as gys cheer Tahtim-hodshi; as haink ad gys Dan-jaan, as mygeayrt gys Zidon, 7As haink ad gys cashtal lajer Tyre, as gys ooilley ard-valjyn ny Hiviteyn, as ny Canaaniteyn: as hie ad magh my-yiass jeh Judah, eer gys Beer-sheba. 8Myr shen tra v’ad er n’gholl trooid ooilley’n cheer, haink ad gys Jerusalem ec kione nuy meeaghyn as feed laa. 9As livrey Joab stiagh slane coontey’n pobble da’n ree, as v’ayns Israel hoght cheead thousane dy gheiney-caggee va tayrn y chliwe; as va deiney Yudah queig cheead thousane.

10As woaill cree David eh lurg da v’er n’ghoaill earroo’n pobble: as dooyrt David rish y Chiarn, Ta mee kyndagh jeh peccah trome liorish shen ta mee er n’yannoo: as nish, ta mee guee ort, O Hiarn, gow ersooyl loght dty harvaant; son s’mooar ta my pheccah. 11Son tra va David er e chosh ’sy voghrey, haink goo’n Chiarn gys y phadeyr Gad, fakyder Ghavid, gra, 12Immee as abbyr rish David, Myr shoh ta’n Chiarn gra, Ta mee coyrt dhyt three chebbyn; gow dty reih jeu, dooys dy cherraghey ort. 13Er shoh haink Gad gys David, as dinsh eh da, as dooyrt eh rish, Jig shiaght bleeaney dy ghortey hood ayns dty heer? ny jean oo roie er-chea three meeaghyn roish dty noidyn, choud as t’ad er dty eiyrt’s? ny dy bee three laa jeh’n chramp ayns dty heer? Nish bee ec dty choyrle, as smooinee cre’n ansoor ver-ym lhiam huggeysyn t’er my choyrt er y chaghteraght. 14As dooyrt David rish Gad, Ta mee ayns chennid vooar: lhig dooin nish tuittym fo laue’n Chiarn, (son ta e vyghinyn mooar,) as ny lhig dou tuittym ayns laue dooinney. 15Myr shen hug y Chiarn y chramp er Israel, veih’n voghrey eer gys y laa pointit: as hooar baase jeh’n pobble, veih Dan eer gys Beer-sheba, three-feed as jeih thousaneyn. 16As tra va’n ainle er heeyney magh e laue er Jerusalem dy stroie eh, ghow’n Chiarn chymmey jeh nyn stayd treih, as dooyrt eh rish yn ainle va stroie’n pobble, S’lioar eh; lhig sheese nish dty laue. As va ainle y Chiarn liorish laare-vooie Araunah yn Jebusite. 17As loayr David rish y Chiarn, tra honnick eh yn ainle va stroie y pobble, as dooyrt eh, Cur-my-ner, mish t’er n’yannoo peccah, as s’mooar ta my loght: agh ny kirree shoh, cre t’adsyn er n’yannoo? Lhig da dty laue, ta mee guee ort, ve m’oï’s as noi thie m’ayrey.

18As haink Gad er y laa shen gys David, as dooyrt eh rish, Immee seose, trog altar da’n Chiarn ayns laare-vooie Araunah yn Jebusite. 19As hie David, cordail rish raa Ghad, seose, myr va’n Chiarn er harey. 20As yeeagh Araunah, as honnick eh yn ree, as e gheiney cheet ny whail: as hie Araunah magh, as chroym eh eh-hene kiongoyrt rish y ree, lesh e eddin gys y thalloo. 21As dooyrt Araunah, Cre t’er choyrt my hiarn y ree raad e harvaant? As dooyrt David, Dy chionnaghey yn laare-vooie voïd, dy hroggal altar gys y Chiarn, dy vod y plague v’er ny chastey veih’n pobble. 22As dooyrt Araunah rish David, Lhig da my hiarn y ree goaill as chebbal lurg e aigney-mie hene: cur-my-ner, ta dew ayns shoh son oural-losht, as jeshaghtyn-bwoallee, as greinyn elley ny dew son fuygh. 23Ooilley ny reddyn shoh, O ree, ta Araunah chebbal da’n ree: as dooyrt Araunah rish y ree, Dy jean y Chiarn dty Yee soiagh jeed. 24As dooyrt y ree rish Araunah, Cha jean shen mie; agh neem’s son shickyrys kionnaghey voïd eh son ny sheeagh eh: chamoo nee’m ourallyn-losht y hebbal da’n Chiarn my Yee jeh shen nagh chost veg dou. Myr shoh24:24 Son shey cheead shekel dy airh. 1 Recort. 21:25. chionnee David yn laare-vooie: as chionnee eh ny dew son jeih shekelyn as da-eed dy argid. 25As hrog David ayns shen altar gys y Chiarn, as heb eh ourallyn-losht, as ourallyn-shee. Er shoh va’n Chiarn chymmoil da’n cheer, as va’n plague er ny chastey veih Israel.