CAB. III

1Nish son earish foddey va caggey eddyr thie Saul as thie Ghavid: agh daase David ny s’troshey as ny s’troshey, as lheïe thie Saul ny s’lhag as ny s’lhag.

2As da David va mec ruggit ayns Hebron: as va’n fer by-hinney Amnon, rish Ahinoam yn Jezreelite; 3As yn nah er Chileab, rish Abigail va ben Nabal yn Carmelite; as yn trass Absalom, mac Maacah inneen Talmai ree Yeshur: 4As y chiarroo Adonijah, mac Haggith; as y wheiggoo Shephatiah, mac Abital; 5As yn cheyoo Ithream, rish Eglah ben Ghavid. V’ad shoh ruggit da David ayns Hebron.

6As haink eh gy-kione, choud’s va caggey eddyr thie Saul as thie Ghavid, dy hass Abner seose dy dunnal son thie Saul. 7As va co-lhiabbagh ec Saul, va’n ennym eck Rizpah inneen da Aiah: as dooyrt Ish-bosheth rish Abner, Cre’n-fa t’ou er n’ghoaill co-lhiabbagh m’ayrey. 8Eisht va Abner feer fargagh ec goan Ish-bosheth, as dooyrt eh, Vel oo dy my hoiaghey myr moddey noi Judah, mish ta er hoilshaghey kenjallys da thie Saul dt’ayr, da e vraaraghyn, as da e chaarjyn, gys y laa shoh, as cha vel mee er dty livrey seose gys laue Ghavid, dy vel oo nish cur foill my lieh mychione y ven shoh? 9Dy jean Jee myr shen rish Abner as ny smoo neesht, mannagh jean-yms son David, myr ta’n Chiarn er vreearrey da; 10Dy chaghlaa’n reeriaght veih thie Saul, as dy hoiaghey seose stoyl-reeoil Ghavid harrish Israel, as harrish Judah, veih Dan eer gys Beer-sheba. 11As cha by-lhoys da fockle d’ansoor y choyrt da Abner, son v’eh ayns aggle roish.

12As hug Abner chaghteryn gys David ass e lieh, gra, Quoi s’liesh y cheer? gra myrgeddin, Jean coardail rhym, as cur-my-ner bee my laue mayrt, dy chur lesh ooilley Israel mygeayrt hood. 13As dooyrt eh, Feer vie; neem’s conaant rhyt: agh un red ta mee shassoo er, ta shen, Nagh jean oo m’eddin y akin, mannagh der oo lhiat hoshiaght mayrt Michal inneen Saul, tra hig oo ayns m’enish. 14As hug David chaghteryn gys Ish-bosheth mac Saul, gra, Livrey hym Michal my ven, ren mee y chosney son keead crackan-chymmylt jeh ny Philistinee. 15As hug Ish-bosheth fys as ghow eh ee veih e sheshey, eer veih Phaltiel mac Laish. 16As hie e sheshey mâree keayney ny jeï choud’s Bahurim: eisht dooyrt Abner rish Immee royd thie. As hie eh roish.

17As va glare eddyr Abner as princeyn Israel, gra, Traa dy row va shiu aggindagh er David dy ve yn ree eu: 18Nish jean-jee eh: son ta’n Chiarn er loayrt mychione David, gra, Liorish laue my harvaant David neem’s my phobble Israel y hauail veih pooar ny Philistinee, as veih laue ooilley nyn noidyn. 19As loayr Abner myrgeddin ayns clashtyn Venjamin: as hie Abner myrgeddin dy hoilshaghey da David ayns Hebron ooilley aigney-mie Israel huggeysyn, as aigney-mie slane thie Venjamin. 20Er shoh haink Abner gys David gys Hebron, as feed dooinney mârish: as ren David cuirraghyn da Abner, as da ny deiney va mârish. 21As dooyrt Abner rish David, Trog-yms orrym, as hem roym, as goym ayns laue dy hayrn cooidjagh ooilley Israel gys my hiarn yn ree, dy yannoo conaant rhyt, as dy vod oo reill harrish ooilley ny ta dty chree dy yeearree. As lhig David y raad da Abner; as hie eh roish ayns shee.

22As cur-my-ner, haink deiney Ghavid as Joab veih geiyrt er sheshaght [dy noidyn], as hug ad lhieu niart spooilley mâroo: (agh cha row Abner marish David ayns Hebron; son v’eh er choyrt eh ersooyl ayns shee.) 23Tra va Joab as ooilley e heshaght-chaggee er jeet, ve inshit da Joab, gra, Haink Abner mac Ner gys y ree, as t’eh er lhiggey’n raad da, as t’eh er n’gholl ayns shee. 24Eisht haink Joab gys y ree, as dooyrt eh, Cre shoh t’ou er n’yannoo? cur-my-ner, haink Abner hood; cre’n-fa lhig oo yn raad da, as dy vel eh er chosney roish. 25Shione dhyt Abner mac Ner, dy daink eh dy dty volley, as er-chee dy yannoo stiagh rhyt, dy gheddyn magh dty choyrleyn follit. 26As tra va Joab er jeet magh veih David, hug eh chaghteryn er-eiyrt’s Abner, hug lhieu reesht eh veih chibbyr Sirah: agh ve gyn-yss da David. 27As tra va Abner er jeet back gys Hebron, ghow Joab eh dy lhiattee ’sy yiat, myr-yien dy loayrt rish dy sheeoil, as woaill eh eh ayns shen fo’n wheiggoo asney, dy dooar eh baase, er coontey fuill Asahel e vraar.

28As ny lurg shen, tra cheayll David jeh, dooyrt eh, Ta mish as my reeriaght son dy bragh seyr fenish y Chiarn veih fuill Abner mac Ner: 29Lhig da lhie er kione Yoab, as er ooilley thie e ayrey; as cha bee thie Yoab dy bragh fegooish fer lesh roie-folley, ny lourane, ny baccagh, ny fer dy huittym er e chliwe, ny fer ta feme arran. 30Myr shen ren Joab as Abishai e vraar stroie Abner, er-yn-oyr dy row eshyn er varroo nyn mraar Asahel ayns y chaggey ec Gibeon.

31As dooyrt David rish Joab, as ooilley’n pobble va mârish, Raip-jee nyn goamraghyn, as cur-jee aanrit-sack miu, as jean-jee dobberan roish Abner. As huill ree David eh-hene geiyrt er y charbyd. 32As doanluck ad Abner ayns Hebron: as hrog y ree seose e choraa, as cheayn eh ec oaie Abner; as ren ooilley’n pobble keayney. 33As ren y ree dobberan harrish Abner, as dooyrt eh, Nee myr kymmagh hooar Abner baase? 34Dty laueyn cha row kianlt, ny yiarnyn er dty chassyn: myr ta dooinney tuittym liorish deiney folley, shen myr ren uss tuittym. As cheayn ooilley’n pobble reesht harrish. 35As tra haink y pobble dy gherjaghey David, as dy ghoaill beaghey mârish er y laa cheddin, ren David breearrey, gra, Myr shen as ny smoo dy jean Jee rhym’s, my neem’s arran ny nhee erbee elley y ghoaill, roish lhie ny greïney. 36As cheayll ooilley’n pobble shoh, as by-haittin lhieu eh: son shen ny va aigney’n ree va’n pobble booiagh lesh. 37Son hoig ooilley’n pobble, as ooilley Israel, er yn laa shen, nagh nee lesh aigney’n ree ve dy row Abner mac Ner er ny choyrt gy-baase. 38As dooyrt y ree rish e harvaantyn, Nagh vel fys euish dy vel prince as ard-ghooinney er duittym er yn laa jiu ayns Israel? 39As ta mish nish faase, ga dy vel mee my ree ooilit; as ta ny deiney shoh mec Zeruiah ro chreoi er my hon: nee’n Chiarn y drogh-yantagh y chooilleeney cordail rish e olkys.