CAB. V

1Eisht haink ooilley tribeyn Israel gys David ec Hebron, as dooyrt ad, Cur-my-ner, ta shinyn dty chraue as dt’eill. 2Myrgeddin roish nish, tra va Saul ny ree harrin, uss va ard-leeideilagh Israel: as dooyrt y Chiarn rhyt’s, Bee uss bochilley er my phobble Israel, as bee uss dty ard-chaptan harrish Israel. 3Myr shoh haink ooilley shanstyr Israel stiagh gys y ree ec Hebron; as ren ree David conaant roo ayns Hebron fenish y Chiarn: as ren ad David y ooilaghey ny ree harrish Israel.

4Va David jeih bleeaney as feed dy eash tra ren eh toshiaght dy reill, as ren eh reill da-eed bleïn. 5Ayns Hebron ren eh reill harrish Judah shiaght bleeaney as shey meeaghyn; as ayns Jerusalem ren eh reill three bleeaney jeig as feed harrish ooilley Israel as Judah.

6As hie’n ree as e gheiney seose gys Jerusalem noi ny Jebusiteyn: as dooyrt cummaltee’n cheer rish David, Cha jig oo stiagh ayns shoh, son nee ny doail as ny baccee uss y reayll magh, gra, Cha jig oo stiagh ayns shoh. 7Ny-yeih ghow David cashtal lajer Zion: ta’n boayl cheddin ard-valley Ghavid. 8As dooyrt David er y laa shen, Quoi-erbee chosnys stiagh er ny gutteryn-ushtey, as woaillys ny Jebusiteyn, as ny baccee, as ny doail, ta dwoaie oc er annym Ghavid, bee eshyn ny ard-chaptan. Shen-y-fa te oc myr raa, Cre dooyrt ny doail as ny baccee rish [David]? Cha vow eh stiagh ’sy voayl shoh. 9Myr shoh ren David cummal ’sy chashtal, as ren eh genmys eh Ard-valley Ghavid: as hrog David ooilley mygeayrt, veih Millo as er cheu-sthie jeh. 10As hie David er e hoshiaght, as haink eh lesh dy mie; as va’n Chiarn Jee dy heshaght-flaunyss mârish.

11As hug Hiram ree Tyre chaghteryn gys David, as biljyn-cedar, as seyir, as masoonee; as hrog ad thie da David. 12As hoig David dy row’n Chiarn er n’yannoo eh ny ree harrish Israel, as dy row eh er niartaghey e reeriaght er graih e phobble Israel.

13As ghow David huggey t’ooilley co-lhiabbee, dy vraane ass Jerusalem, erreish da v’er jeet veih Hebron; as va t’ooilley mec as inneenyn ruggit da David. 14As shoh ny enmyn oc va ruggit da ayns Jerusalem: Shammua, as Shobab, as Nathan, as Solomon, 15Ibhar myrgeddin, as Elishua, as Nepheg, as Japhiah, 16As Elishama, as Eliada, as Eliphalet.

17Agh tra cheayll ny Philistinee dy row ad er n’ooilaghey David ny ree harrish Israel, haink ooilley ny Philistinee seose noi David; as cheayll David jeh, as hie eh sheese gys y chashtal lajer. 18Haink ny Philistinee myrgeddin, as skeayl ad ad-hene ayns coan Rephaim. 19As hir David coyrle jeh’n Chiarn, gra, Jem seose noi ny Philistinee? jean oo ad y livrey gys my laue? As dooyrt y Chiarn rish David, Gow seose; son neem’s son shickyrys ny Philistinee y livrey gys dty laue. 20As haink David gys Baal-perazim, as woaill David ad ayns shen, as dooyrt eh, Ta’n Chiarn er vrishey magh er my noidyn kiongoyrt rhym, myr brishey magh ushtaghyn. Shen-y-fa denmys eh yn ynnyd shen Baal-perazim. 21As ayns shen daag ad ny jallooyn oc, as losht David as e gheiney ad. 22As haink ny Philistinee seose reesht, as skeayl ad ad-hene ayns coan Rephaim. 23As tra va David er hirrey coyrle jeh’n Chiarn, dooyrt eh, Cha jed oo seose; agh gow combaase nyn yeï, as tar stiagh er y chooyl oc, liorish ny biljyn-mulberry. 24As tra chlinnys oo feiyr mastey ny biljyn-mulberry myr sheean sleih er march, dy jean oo eisht gleashagh oo-hene dy gastey: son eisht ta’n Chiarn goll magh royd, dy woalley sheshaght ny Philistinee. 25As myr shen ren David, myr va’n Chiarn er chur roish; as woaill eh ny Philistinee veih Geba derrey Gazer.