CAB. VI

1Lurg shoh, ren David chaglym cooidjagh ooilley deiney reiht Israel, jeih thousaneyn as feed. 2As hrog David er, as hie eh lesh ooilley’n pobble va mârish veih Baale ayns Judah, dy choyrt lhieu seose veih shen arg Yee, kiongoyrt rish t’ad geamagh er ennym y Chiarn dy heshaght-flaunyss, ta cummal eddyr ny Cherubim. 3As hoie ad arg Yee er cart noa, as hug ad lhieu eh ass thie Abinadab v’ayns Gibeah: as Uzza as Ahio, mec Abinadab, deiyr y chart noa. 4As hug ad lhieu eh ass thie Abinadab, v’ayns Gibeah, goll marish arg Yee; as jimmee Ahio roish yn arg. 5As chloie David as ooilley thie Israel fenish y Chiarn, er dy chooilley horch dy ghreïnyn-kiaullee jeant dy uys, er claasaghyn as psaltereeyn, as er timbrelyn, as er cornettyn, as er cymballyn.

6As tra rosh ad gys laare-vooie Nachon, heeyn Uzzah magh e laue gys arg Yee, as ghow eh greme er, son ve leaystey fo ny dew. 7As va corree’n Chiarn er ny vrasnaghey noi Uzzah, as woaill Jee eh ayns shen son e ghaanys, as ayns shen hooar eh baase, liorish arg Yee. 8As va David seaghnit, dy row corree’n Chiarn er vrishey magh er Uzzah: as denmys eh yn ynnyd Perez-uzzah, gys y laa t’ayn jiu. 9As va aggle er David roish y Chiarn yn laa shen, as dooyrt eh, Cre’n aght hig arg yn Chiarn hym’s? 10Myr shoh cha jinnagh David lesh arg y Chiarn gys ard-valley Ghavid: agh hie David dy lhiattee lesh gys thie Obed-edom yn Gittite. 11As va arg y Chiarn freilt ayns thie Obed-edom yn Gittite three meeaghyn: as vannee’n Chiarn Obed-edom, as ooilley lught e hie.

12As ve er n’insh da ree David, gra, Ta’n Chiarn er vannaghey thie Obed-edom, as ooilley ny va bentyn da, er coontey arg Yee. Myr shen hie David as hug eh lesh arg Yee seose, veih thie Obed-edom, gys ard-valley Ghavid, lesh ard-voggey. 13As myr shen ve, tra v’adsyn va gymmyrkey arg y Chiarn, er n’gholl shey kesmadyn, dy heb eh dew as beiyn roauyrey ayns oural. 14As ren David daunsin fenish y Chiarn lesh ooilley e niart, as va David coamrit lesh ephod aanrit. 15Myr shoh hug David as ooilley thie Israel lhieu seose arg y Chiarn, lesh kiaulleeaght as lesh feiyr y trumpet. 16As myr haink arg y Chiarn stiagh ayns ard-valley Ghavid, yeeagh Michal inneen Saul trooid uinniag, as honnick ee ree David lheimyragh as daunsin fenish y Chiarn, as hoie ee beg jeh ayns e cree.

17As hug ad lhieu arg y Chiarn stiagh, as hoie ad eh ayns e ynnyd, ayns mean y chabbane-agglish va David er hroggal er y hon: as heb David ourallyn-losht as ourallyn-shee fenish y Chiarn. 18As cha leah’s va David erreish chebbal ourallyn-losht as ourallyn-shee, vannee eh yn pobble ayns ennym y Chiarn dy heshaght-flaunyss. 19As rheynn eh er ooilley’n pobble, eer er slane sheshaght Israel, chammah mraane as deiney, da dagh unnane bwilleen arran, as peesh vie d’eill, as cappan feeyney: myr shen hie ooilley’n pobble rhymboo, dagh fer gys e hie hene.

20Eisht hyndaa David dy vannaghey lught e hie: as haink Michal inneen Saul magh quail David, as dooyrt ee, Cre cha gloyroil va ree Israel jiu, yeeagh eh hene rooisht jiu ayns fakin inneenyn-veyl e harvaantyn, myr ta’n fer gyn-nearey roostey eh hene! 21As dooyrt David rish Michal, Ve fenish y Chiarn, ren mish y reih roish dt’ayr, as roish ooilley e hie, dy phointeil mish my er-reill harrish pobble y Chiarn, harrish Israel: shen-y-fa neem’s cloie kiongoyrt rish y Chiarn. 22As nee’m foast ny sloo na shoh y hoiaghey jee’m pene, as bee’m injil ayns my hooillyn hene: as liorish ny sharvaantyn, lhieu t’ou er my oltooaney, beem’s er my ooashlaghey. 23Shen-y-fa, cha row lhiannoo ec Michal inneen Saul, choud’s v’ee bio.