CAB. VII

1As haink eh gy-kione, tra hoie’n ree ec shee ayns e hie, as dy row’n Chiarn er choyrt fea da veih ooilley e noidyn er dy chooilley heu, 2Dy dooyrt y ree rish Nathan y phadeyr, Cur-my-ner, ta mish nish baghey ayns thie cedar, agh ta arg Yee er ny reayll ayns cabbane fo curtanyn. 3As dooyrt Nathan rish y ree, Gow er dty hoshiaght, jean ooilley ny t’ayns dty chree: son ta’n Chiarn mayrt.

4As haink eh gy-kione er yn oie cheddin dy daink goo’n Chiarn gys Nathan, gra, 5Immee, as insh da my harvaant David, Myr shoh ta’n Chiarn dy ghra, Nee uss ta dy hroggal thie dooys dy chummal ayn? 6Fakin nagh vel mish er chummal ayns thie erbee, er-dyn traa hug mee lhiam seose cloan Israel ass Egypt, derrey’n eer laa t’ayn jiu, agh er n’immeeaght ayns cabbane-agglish va scughey veih boayl dy boayl? 7Ayns ooilley my immeeaght marish cloan Israel, loayr mish fockle hene rish veg jeh briwnyn Israel, daue hug mee sarey dy reill my phobble Israel, gra, Cre’n-fa nagh vel shiu troggal dooys thie cedar? 8Nish er-y-fa shen, myr shoh jir oo rish my harvaant David, Myr shoh ta’n Chiarn dy heshaght-flaunyss gra, Ghow mish oo veih ny bwoailtchyn keyrragh, veih goaill kiarail jeh ny kirree, dy ve fer-reill harrish my phobble Israel. 9As va mish mayrt, raad erbee dy jagh oo, as ta mee er yiarey jeh ooilley dty noidyn ass dty hilley, as er choyrt dhyt ennym ooasle, goll-rish enmyn ny deiney mooarey t’er y thalloo. 10(As neem’s boayl y phointeil da my phobble Israel, as ver-yms undin daue, dy vod cummal ve oc ayns ynnyd lhieu hene, as gyn scughey arragh; chamoo nee’n chloan dy olkys seaghney ad veg sodjey, myr ayns ny traaghyn t’er n’gholl shaghey, 11As er-dyn traa hug mish sarey da briwnyn ve harrish my phobble Israel, as ta mee er choyrt fea dhyt’s veih ooilley dty noidyn.) Myrgeddin ta’n Chiarn ginsh dhyt, dy jean eh dty hie y hickyraghey.

12As tra vees dty laghyn ec kione, as oo-hene cadley marish dt’ayraghyn, neem’s dty luight y hoiaghey seose dty yeï, hig magh ass dty veeghyn, as neem’s y reeriaght echeysyn y niartaghey. 13Nee eshyn thie y hroggal son my ennym, as neem’s soiaghey seose stoyl-reeoil e reeriaght dy ve foddey beayn. 14Beem’s myr ayr dasyn, as bee eshyn myr mac dooys: my nee eh peccah y yannoo, neem’s smaghtagh eh lesh slatt gheiney, as lesh buillaghyn cloan gheiney: 15Agh my vyghin cha goym voish, myr ghow mee veih Saul, eshyn ren mee scughey veih dt’eddin. 16As bee dty hie as dty reeriaght er ny niartaghey dy beayn kiongoyrt rhyt: bee’n stoyl-reeoil ayd er ny hoiaghey seose dy kinjagh. 17Cordail rish ooilley ny goan shoh, as cordail rish ooilley’n ashlish shoh, myr shoh loayr Nathan rish David,

18Eisht hie ree David stiagh, as hoie eh fenish y Chiarn, as dooyrt eh, Quoi mish, O Hiarn Yee? as cre ta my hie, dy vel oo er my hroggal gys shoh? 19As cha row shoh foast agh red fardalagh ayns dty hilley, O Hiarn Yee; son t’ou er loayrt myrgeddin jeh thie dty harvaant son earish foddey ry-heet. As vel shoh lurg cliaghtey deiney, O Hiarn Yee? 20As cre smoo oddys David gra rhyt? son t’ou uss, Hiarn Yee, toiggal cree dty harvaant. 21Er graih dty ghoan, as cordail rish dty chree hene, t’ou er n’yannoo ooilley ny reddyn mooarey shoh, dy choyrt toiggal da dty harvaant jeu. 22Shen-y-fa, s’mooar t’ou uss, O Hiarn Yee: son cha vel fer erbee casley rhyt, chamoo cheu-mooie jeed’s ta Jee erbee elley, cordail rish ooilley ny ta shin er chlashtyn lesh nyn gleayshyn. 23As cre’n ashoon shen ’sy theihll ta goll-rish dty phobble, eer goll-rish Israel, adsyn ren Jee y livrey son pobble da hene, dy yannoo da hene ennym gloyroil, as dy yannoo er ny son oc reddyn mooar as atchimagh, son y cheer ayd, roish dty phobble, t’ou er veaysley veih Egypt, veih ny ashoonyn as ny jeeghyn oc? 24Son t’ou er niartaghey dhyt hene dty phobble Israel, dy ve lhiat hene son dy bragh: as t’ou uss, Hiarn, er jeet dy ve yn Jee oc. 25As nish, O Hiarn Yee, yn goo t’ou er loayrt mychione dty harvaant, as mychione e hie, jean eh y hickyraghey son dy bragh, as jean myr t’ou er ghra. 26As lhig da dty ennym v’er ny ghloyraghey son dy bragh, gra, Yn Chiarn dy heshaghtyn niau yn Jee harrish Israel: as lhig da thie dty harvaant David v’er ny niartaghey kiongoyrt rhyt. 27Son t’ou uss, O Hiarn dy heshaghtyn niau, Yee Israel, er hoilshaghey da dty harvaant, gra, Neem’s dty hie y hroggal: shen-y-fa ta dty harvaant er ghoaill cree dy hebbal yn phadjer shoh hood. 28As nish, O Hiarn Yee, she uss yn Jee cheddin, as ta dty ghoan firrinagh, as t’ou er yialdyn yn vieys shoh da dty harvaant: 29Shen-y-fa nish, dy gooidsave lhiat dy vannaghey thie dty harvaant, dy vod eh tannaghtyn son dy bragh kiongoyrt rhyt: son t’ou uss, O Hiarn Yee, er loayrt eh; as lesh dty vannaght lhig da thie dty harvaant ve bannit son dy bragh.