CAB. I

1Paul ostyl Yeesey Creest liorish aigney Yee, cordail rish gialdyn y vea, ayns Creest Yeesey; 2Gys Timothy my vac deyr graihagh: Grayse, myghin, as shee veih Jee yn Ayr, as Creest Yeesey nyn Jiarn. 3Ta mee cur booise gys Jee, eh ta mee dy hirveish veih my henn-ayraghyn lesh cooinsheanse ghlen, dy vel mee cooinaghtyn dy kinjagh ort ayns my phadjeryn oie as laa: 4Dy jeean goaill foddiaght dy dty akin, cooinaghtyn er dty yeïr, dy voddym ve er my lhieeney lesh gerjagh: 5Tra ta mee tayrn gys cooinaghtyn yn credjue ynrick t’aynyd’s, va hoshiaght ayns dty warree Lois, as dty voir Eunice; as ta mee dy shickyr credjal dy ve aynyd’s myrgeddin. 6Shen-y-fa ta mee coyrt oo ayns cooinaghtyn, dy jean oo greesaghey seose gioot Yee, ta aynyd, liorish coyrt my laueyn ort. 7Son cha vel Jee er choyrt dooin yn spyrryd dy aggle; agh dy phooar, as dy ghraih, as dy chreenaght. 8Ny bee nearey ort er-y-fa shen jeh recortys nyn Jiarn, ny jeem’s e phryssoonagh: agh gow uss ayrn mârym’s ayns seaghyn y tushtal, cordail rish pooar Yee; 9Ta er hauail shin, as er n’eamagh orrin lesh eam casherick, cha nee cordail rish ny obbraghyn ain, agh cordail rish e chiarail hene as grayse va er ny choyrt dooin ayns Creest Yeesey, er-dy hoshiaght y theihll, 10Agh ta nish er ny hoilshaghey liorish cheet nyn Saualtagh Yeesey Creest, ta er stroie yn baase, as er choyrt lesh bea as bioys son dy bragh gys soilshey, liorish y sushtal: 11Gys ta mee er my phointeil ny phreachoor, as ny ostyl, as fer-ynsee ny Ashoonee. 12Er-yn-oyr cheddin ta mee myrgeddin surranse ny reddyn shoh, ny-yeih cha vel nearey orrym: son shione dou eshyn ayn ta mee er chredjal, as ta mee feer shickyr dy vel eh abyl dy reayll shen ny ta mee er hymney gys e chiarail gys yn laa shen. 13Cum shickyr bun ny goan slayntoil, t’ou er chlashtyn voym’s, ayns credjue as graih ta ayns Creest Yeesey. 14Yn gioal mie shen v’er ny choyrt fo dty chiarail, freill liorish y Spyrryd Noo ta baghey aynin. 15Shoh ta fys ayd, dy vel adsyn ooilley t’ayns Asia er choyrt cooyl rhym; jeu shoh ta Phygellus as Hermogenes. 16Dy der y Chiarn myghin da lught-thie Onesiphorus; son ren eh dy mennick m’y ooraghey, as cha row nearey er jeh my gheuley. 17As tra v’eh ec y Raue, ren eh briaght er my hon dy imneagh, as hooar eh magh mee. 18Dy giall y Chiarn da dy vod eh myghin y gheddyn veih’n Chiarn ’sy laa shen: as ayns cre whilleen nhee ren eh shirveish orrym ec Ephesus, ta fys ayd er dy mie.