CAB. II

1Bee uss er-y-fa shen, my vac, niartal ayns y ghrayse ta ayns Creest Yeesey. 2As ny reddyn t’ou er chlashtyn voym’s roish ymmodee feanishyn, cur uss ayns treishteil deiney firrinagh, vees fondagh dy ynsaghey feallagh elley myrgeddin. 3Jean uss er-y-fa shen creoghys y hurranse, myr sidoor dunnal dy Yeesey Creest. 4Cha vel dooinney-caggee erbee dy chiangley eh-hene gys cooishyn erbee seihltagh [elley]; dy vod eh eshyn y wooiys ta er reih eh dy ve ny hidoor. 5As my ta dooinney erbee myrgeddin gleck son y varriaght, cha vel eh ny-yeih dy gheddyn yn attey, mannagh vel eh gleck dy lowal. 6Shegin da’n eirinnagh laboragh roish my vow eh soylley ny messyn. 7Gow dy dowin gys dty chree ny ta mee gra; as dy der y Chiarn tushtey dhyt ayns dy chooilley nhee. 8Cooinee dy row Yeesey Creest jeh sluight Ghavid, troggit veih ny merriu cordail rish my hushtal: 9Er y hon ta mee gymmyrkey seaghyn myr drogh-yantagh, dy jarroo gys geulaghyn; agh cha vel goo Yee kianlt. 10Shen-y-fa ta mee surranse dy chooilley nhee er graih yn chloan reiht, dy vod adsyn neesht yn saualtys t’ayns Creest Yeesey y gheddyn, marish gloyr dy bragh beayn. 11Te raa firrinagh. Son my ta shin er ve marroo mârish, bee mayd myrgeddin bio mârish: 12My ta shin surranse, nee mayd myrgeddin reill mârish: my ta shin dy obbal eh, nee eshyn myrgeddin shinyn y obbal. 13My ta shin neu-firrinagh [dasyn], ny-yeih t’eshyn tannaghtyn firrinagh; cha vod eh eh-hene y obbal. 14Jeh ny reddyn shoh cur ad ayns cooinaghtyn, coyrt currym orroo kiongoyrt rish y Chiarn, nagh streeu ad mysh focklyn nagh vel gys veg yn ymmyd, agh dy choyrt sleih fo-my-cheilley. 15Bee uss imneagh dy phrowal oo hene firrinagh gys Jee, obbree nagh lhiass nearey ’ghoaill, rheynn dy kiart yn goo dy ynrickys. 16Agh chea veih glare mee-chrauee as fardalagh; son hed ad er nyn doshiaght gys mee-chraueeaght smoo. 17As nee’n ghlare oc gee myr cankyr: lheid shoh ta Hymeneus, as Philetus: 18Ta er n’gholl er-shaghryn veih’n irriney, gra, Dy vel yn irree-seose-reesht veih ny merriu hannah harrish; as [liorish shoh] lhaggaghey credjue paart dy leih. 19Ny-yeih, ta undin Yee shassoo shickyr, sealit lesh y cowrey shoh, Shione da’n Chiarn e vooinjer hene. As, Lhig da dy chooilley unnane ta genmys ennym Chreest chea veih mee-chraueeaght. 20Agh ayns thie mooar cha vel ny-lomarcan siyn airh, as argid, agh myrgeddin siyn fuygh, as cray; as paart son ooashley, as paart son mee-ooashley. 21My nee dooinney er-y-fa shen freayll eh-hene seyr voue shoh, bee eh ny haagh son ooashley, casherick, as cooie son ymmyd y vainshter, as aarloo cour dy chooilley obbyr vie. 22Chea myrgeddin veih yeearreeyn yn aegid: agh eiyr da ynrickys, credjue, graih, [as] shee, mâroosyn ta geamagh er y Chiarn ass cree glen. 23Agh questionyn ommijagh as giare-cheeayllagh cur voïd, myr ta fys ayd dy vel ad doostey streeu. 24As cha nhegin da sharvaant y Chiarn ve streeuagh; agh ve meen rish dy chooilley ghooinney, aarloo dy ynsaghey, surransagh, 25Ayns meenid gynsaghey adsyn ta shassoo magh; my saillish Jee arrys y chur daue gys goaill-rish yn irriney; 26As dy vod ad feaysley ad-hene ass ribbey yn drogh-spyrryd, ta goit nyn gappee liorishyn ec e aigney.