CAB. III

1Toig shoh myrgeddin, ayns ny laghyn jerrinagh dy jig traaghyn seaghnagh. 2Son bee ooilley er nyn son oc hene, sayntoilee, boggyssee, mooaralee, oltooanee, mee-viallagh gys ayraghyn as moiraghyn, neu-wooisal, mee-chrauee, 3Fegooish graih dooghyssagh, brishey conaantyn, casseyderyn foalsey, rouanagh, dewil, dwoaiagh er deiney mie, 4Traitooryn, teaymagh, ard-aignagh, ny s’graihee er eunyssyn y vea shoh na er Jee; 5Goaill orroo caslys dy chraueeaght, agh jannoo noi’n phooar [vreeoil] echey: veih nyn lheid chyndaa ersooyl. 6Son jeh’n sorch shoh t’adsyn ta dy steetagh goll stiagh ayns thieyn, as leeideil ayns cappeeys mraane eddrym laadit lesh peccaghyn, er nyn goyrt lhieu ersooyl lesh ymmodee yeearreeyn peccoil, 7Kinjagh gynsaghey, as dyn dy bragh abyl cheet gys tushtey jeh’n irriney. 8Nish myr ren Jannes as Jambres girree noi Moses, myr shen t’ad shoh neesht shassoo magh noi’n irriney: deiney jeh aignaghyn mee-chrauee, caillit gys y chredjue. 9Agh cha jed ad ny sodjey er nyn doshiaght: son bee’n vee-cheeayllid oc er ny hoilshaghey da dy chooilley ghooinney, myr va myrgeddin yn vee-cheeayllid oc shen. 10Agh t’ou uss dy slane er hoiggal my ynsagh, my aght-baghee, my chiarail, my chredjue, my hurranse-foddey, my ghraih, my veenid, 11Yn tranlaase, as y seaghyn haink orrym ec Antioch, ec Iconium, ec Lystra; cre’n tranlaase hie mee ny hrooid: agh assdoo ooilley ren y Chiarn m’y livrey. 12Dy jarroo, as shegin dauesyn ooilley ta shirrey dy vaghey dy crauee ayns Creest Yeesey, tranlaase y hurranse. 13Agh nee drogh gheiney as molteyryn gaase ny smessey as ny smessey, molley, as er nyn molley, 14Agh tannee uss ayns ny reddyn t’ou er n’ynsaghey, as er chredjal dy shickyr, toiggal quoi veih t’ou er n’ynsaghey ad; 15As neayr’s v’ou dty lhiannoo dy vel oo er ve ynsit ayns ny scriptyryn casherick, oddys oo y yannoo creeney gys saualtys, trooid credjue ayns Creest Yeesey. 16Ta ooilley’n scriptyr er ny choyrt liorish bree Spyrryd casherick Yee, as te vondeishagh son ynsagh, son oghsan, son lhiasaghey-bea, son tushtey ayns ynrickys: 17Dy vod y dooinney dy Yee ve slane schleioil, dy fondagh coamrit son dy chooilley obbyr vie.