CAB. IV

1Ta mee cur currym ort er-y-fa shen ayns fenish Yee, as y Chiarn Yeesey Creest, nee briwnys ny bio as ny merriu ec y cheet echey, as ec e reeriaght: 2Jean y goo y phreacheil, coyrlee dy jeean ec dy chooilley hraa as caa; cur oghsan, smaghtee, jeean coyrlaghey lesh dy chooilley veenid as ynsagh. 3Son hig y traa nagh n’uillee ad ynsagh slayntoil; agh lesh cleayshyn miandagh, lurg nyn yeearreeyn hene, tayrnee ad huc hene ymmodee fir-ynsee: 4As chyndaa-ee ad ny cleayshyn oc ersooyl veih’n irriney, as bee ad er nyn jyndaa gys skeeallyn ommijagh. 5Agh bee uss er dty arrey ayns dy chooilley nhee, bee surransagh fo seaghyn, cooilleen obbyr sushtallagh, cur slane prowal jeh dty oik. 6Son ta mee nish jannoo aarloo dy ve er my hebbal, as ta traa my vaaish er-gerrey. 7Ta mee er chaggey caggey mie, ta mee er chooilleeney my choorse, ta mee er vreayll yn credjue. 8Veih shoh magh ta tashtit seose my chour attey dy chairys, nee yn Chiarn yn briw cairagh y chur dooys ec y laa shen: as cha nee dooys my-lomarcan, agh dauesyn ooilley myrgeddin ta graihagh er y cheet echey. 9Jean dy chooilley hiyr dy heet hym’s dy gerrit: 10Son ta Demas er my hreigeil, er graih cosney seihltagh, as er n’gholl ersooyl gys Thessalonica; Crescens gys Galatia, Titus gys Dalmatia. 11Luke ny-lomarcan ta mârym. Gow Mark, as cur lhiat mayrt eh, son t’eh vondeishagh dooys ayns [obbyr] y chirveish. 12As Tychicus ta mee er choyrt gys Ephesus. 13Yn cloagey daag mee ec Troas marish Carpus, tra hig oo, lhiat mayrt eh, as ny lioaryn, agh erskyn ooilley ny craitnyn scruit. 14Ta Alexander yn gaaue-copper er n’yannoo dooys mooarane olk: nee’n Chiarn eh y chooilleeney cordail rish e obbraghyn. 15Jehsyn bee uss er dty hwoaie, son t’eh dy roonagh er hassoo noi ny goan ain. 16Ec y chied chlashtyn er my hrial cha hass dooinney erbee lhiam, agh ren dy chooilley ghooinney m’y hreigeil: guee-ym er Jee nagh bee eh er ny choyrt gys y lieh oc. 17Ny-yeih, hass y Chiarn lhiam, as ren eh m’y niartaghey; liorym’s dy voddagh preacheil [y tushtal] ve dy slane er ny hoiggal, as dy voddagh ooilley ny Ashoonee clashtyn: as va mee er my livrey ass beeal y lion. 18As nee’n Chiarn my livrey veih dy chooilley obbyr olk, as nee eh m’y choadey gys e reeriaght flaunyssagh; huggey dy row gloyr son dy bragh as dy bragh. Amen. 19Bea as slaynt gys Prisca as Aquila, as lught-thie Onesiphorus. 20Duirree Erastus ec Corinth: agh Trophimus ta mee er n’aagail ching ec Miletum. 21Jean dy chooilley hiyr dy heet roish y gheurey. Ta Eubulus cur bea as slaynt hood, as Pudens, as Linus, as Claudia, as ooilley ny braaraghyn. 22Dy row yn Chiarn Yeesey Creest marish dty spyrryd. Grayse dy row mêriu. Amen.