CAB. X

1Va dooinney dy row ayns Cesarea, enmyssit Cornelius, va ny centurion er y cheshaght va enmyssit yn cheshaght Italian; 2Dooinney crauee, as baghey ayns aggle Yee, eh-hene as ooilley e hie, as v’eh cur mooarane jeirk da’n pobble, as dy mennick ayns padjer gys Jee. 3Honnick eh shoh ayns ashlish dy baghtal, mysh yn nuyoo oor jeh’n laa, ainle dy Yee cheet stiagh huggey, as gra rish, Cornelius. 4As tra yeeagh eh lesh, va aggle er, as dooyrt eh, Hiarn, cre shoh? As dooyrt eh rish, Ta dty phadjeryn as dty ghiastyllys er jeet seose son imraa kiongoyrt rish Jee. 5As nish cur chaghteryn gys Joppa, as cur fys er Simon ta sliennooit Peddyr: 6T’eh goaill aaght marish Simon yn tanner, ta’n thie echey rish oirr ny marrey: inshee eshyn dhyt cre ta ort dy yannoo. 7As tra va’n ainle loayr rish Cornelius er gholl roish, deïe eh er jees jeh ny fir-vooinjerey echey as er sidoor crauee jeusyn va dy kinjagh mygeayrt-y-mysh: 8As tra v’eh er hoilshaghey dy chooilley nhee jeu shoh daue, hug eh ad gys Joppa.

9Laa-ny-vairagh myr v’ad goll er nyn yurnah, as tayrn er-gerrey da’n ard-valley, hie Peddyr seose ’syn ard-shamyr gys padjer, mysh y cheyoo oor. 10As daase eh feer accryssagh, as baillish v’er n’ee: agh choud as v’ad gaarlaghey, huitt eh neeal. 11As honnick eh niau er ny osley, as saagh dy row cheet neose huggey, myr dy beagh eh brelleein vooar, kianlt ec ny kiare binn, as lhiggit sheese er y thalloo: 12Ayn va dy chooilley vonney dy veïyn kiare-chassagh y thallooin, dy veïyn feïe, as cretooryn snauee, as eeanlee yn aer. 13As haink coraa huggey, Irree, Pheddyr; marr, as ee. 14Agh dooyrt Peddyr, Shen dy row foddey voym, Hiarn; son cha vel mish rieau er n’ee red erbee cadjin ny neu-ghlen. 15As loayr y coraa rish reesht yn nah cheayrt, Shen ta Jee er ghlenney, ny enmys uss cadjin. 16Va shoh jeant three keayrtyn: as va’n saagh goit seose reesht gys niau. 17Nish choud as va Peddyr imneagh rish hene, cre va monney yn ashlish v’eh er vakin: cur-my-ner va ny chaghteryn haink veih Cornelius er vriaght son thie Simon, as v’ad nyn shassoo ec y ghiat. 18As deïe ad, as dênee ad row Simon va sliennooit Peddyr goaill aaght ayns shen.

19Choud as va Peddyr smooinaghtyn er yn ashlish, dooyrt y Spyrryd rish, Cur-my-ner, ta three deiney briaght er dty hon. 20Irree er-y-fa shen, as immee sheese, as gow mâroo, fegooish mee-ourys erbee: son ta mish er choyrt ad. 21Eisht hie Peddyr sheese gys ny chaghteryn haink huggey veih Cornelius; as dooyrt eh, Cur-my-ner, Mish eh ta shiu dy hirrey: cre’n eilkin t’eu rhym’s dy vel shiu er jeet? 22As dooyrt adsyn, Cornelius yn centurion, dooinney cairagh, as baghey ayns aggle Yee, as jeh goo mie mastey slane ashoon ny Hewnyn, t’eh er gheddyn raaue veih Jee liorish ainle casherick, dy chur fys ort’s gys e hie, dy eaishtagh rish dty ghoan. 23Eisht deïe eh orroo stiagh, as hooar eh aaght daue. As laa-ny-vairagh jimmee Peddyr mâroo, as hie myrgeddin shiartanse jeh ny braaraghyn mârish veih Joppa. 24As yn laa er-giyn haink ad gys Cesarea: as va Cornelius fieau orroo, as v’eh er n’eamagh er e gheiney-mooinjerey cooidjagh, as e reih caarjyn. 25As myr va Peddyr cheet stiagh, hie Cornelius ny whail, as huitt eh sheese ec e chassyn, as hug eh ooashley da. 26Agh hrog Peddyr eh, gra, Shass seose; ta mish mee hene myrgeddin my ghooinney. 27As myr v’eh loayrt rish, hie eh stiagh, as hooar eh ymmodee er nyn jaglym cooidjagh. 28As dooyrt eh roo, ta fys eu dy nee red neu-lowal eh son dooinney ta ny Hew, dy reayll sheshaght rish, ny dy heet gys unnane erbee jeh ashoon elley: agh ta Jee er hoilshaghey dooys, nagh lhisin jeeaghyn er dooinney erbee dy ve cadjin ny neu-ghlen. 29As she shoh va’n oyr dy vel mee er jeet hiu dy arryltagh, cha leah as hug shiu fys orrym: baillym er-y-fa shen shiu dy insh dou cre’n-oyr hug shiu fys orrym. 30As dooyrt Cornelius, Kiare laa er-dy-henney va mish my hrostey derrey mysh y traa shoh dy laa, as ec yn nuyoo oor ghow mee padjer ayns my hie, as cur-my-ner hass dooinney kiongoyrt rhym ayns coamrey sollys. 31As dooyrt eh, Cornelius, ta dty phadjer er ny chlashtyn, as dty yeirk freilt ayns cooinaghtyn fenish Jee. 32Cur fys er-y-fa shen gys Joppa, dy eamagh er Simon ta sliennooit Peddyr; t’eh goaill aaght ayns thie Simon yn tanner, rish oirr ny marrey: as tra hig eh, loayree eh rhyt. 33Chelleeragh er-y-fa shen hug mee fys ort: as t’ou er n’yannoo dy mie dy vel oo er jeet. Nish er-y-fa shen ta shin ooilley ayns shoh kionfenish, kiongoyrt rish Jee, dy chlashtyn dy chooilley nhee ta Jee er n’oardaghey dhyt.

34Eisht doshil Peddyr e veeal, as dooyrt eh, Ayns firrinys ta mee cur tastey nagh vel Jee soiaghey jeh persoonyn: 35Agh ayns dy chooilley ashoon, eshyn ta goaill aggle roish, as gobbraghey cairys, ta soiaghey jeant jehsyn liorish. 36Yn goo hug Jee gys cloan Israel, preacheil shee liorish Yeesey Creest (eshyn y Chiarn ain ooilley) 37Yn goo shen (ta mee gra) ta fys euish dy row eh er ny hoilshaghey magh trooid ooilley Judea, as dy ghow eh toshiaght veih Galilee, lurg y bashtey ren Ean y phreacheil; 38Kys dy ren Jee Yeesey dy Nazareth y ooilaghey lesh y Spyrryd Noo, as lesh pooar; eh hie mygeayrt jannoo mie; as slaanaghey ooilley adsyn va seaghnit liorish y drogh-spyrryd: son va Jee mârish. 39As ta shinyn nyn veanishyn jeh dy chooilley nhee ren eh chammah ayns cheer ny Hewnyn, as ayns Jerusalem; eshyn hug ad dy baase er billey ny croshey: 40Eshyn ren Jee y hroggal seose yn trass laa, as hoilshee eh dy foshlit eh, 41Cha nee da ooilley yn pobble, agh da feanishyn va reiht ro-laue liorish Jee, dy jarroo dooinyn ren gee as giu mârish, erreish da v’er n’irree veih ny merriu. 42As hug eh sarey dooin dy phreacheil gys y pobble, as dy ymmyrkey feanish dy nee eshyn, liorish oardagh Yee, ta dy ve briw ny bioee as ny merriu. 43Leshyn ta ooilley ny phadeyryn gymmyrkey feanish, trooid yn ennym echey, quoi-erbee chredjys ayn, dy vow eh feaysley peccaghyn.

44Choud as va Peddyr loayrt ny goan shoh, huitt y Spyrryd Noo orroosyn ooilley va clashtyn y goo. 45As ghow mooinjer yn ghiarey-chymmylt va er chredjal, yindys mooar, whilleen as haink marish Peddyr, son er ny Ashoonee myrgeddin dy row gioot y Spyrryd Noo er ny gheayrtey magh. 46Son cheayll ad ad loayrt lesh chengaghyn [joarree] as cur ard-voylley da Jee. Eisht dreggyr Peddyr, 47Vod dooinney erbee ushtey y lhiettal, nagh bee ad shoh er nyn mastey, ta er gheddyn y Spyrryd Noo, chammah as shinyn? 48As doardee eh ad dy v’er nyn mashtey ayns ennym y Chiarn. Eisht ghuee ad er dy uirriaght shiartanse dy laghyn.