CAB. XI

1As cheayll ny ostyllyn as ny braaraghyn va ayns Judea, dy row ny Ashoonee er ghoaill rish goo Yee. 2As tra va Peddyr er jeet seose gys Jerusalem, hooar ny Hewnyn va er chredjal foill da, 3Gra, Ren oo sheshaght rish deiney chymmyltagh, as ghow oo beaghey mâroo. 4Agh hie Peddyr harrish y chooish veih’n toshiaght, soilshaghey daue dy chooilley nhee myr ve, gra, 5Va mish ec padjer ayns ard-valley Joppa; as myr va mee my-neealloo, honnick mee ayns ashlish, saagh dy row cheet neose myr dy beagh eh brelleein vooar, lhiggit neose veih niau er ny kiare binn; as haink eh er-gerrey dou. 6As tra va mee er yeeaghyn dy gyere er, as er ghoaill tastey, honnick mee beïyn kiare-chassagh y thallooin, as beïyn feïe, as cretooryn snauee, as eeanlee yn aer. 7As cheayll mee coraa gra rhym, Irree, Pheddyr; marr as ee. 8Agh dooyrt mish, Shen dy row foddey voym, Hiarn: son cha vel nhee erbee cadjin ny neu-ghlen rieau er gholl stiagh ayns my veeal. 9Agh dreggyr y coraa mee reesht veih niau, Shen ta Jee er ghlenney, ny enmys uss cadjin. 10As va shoh jeant three keayrtyn: as va ooilley tayrnit seose reesht gys niau. 11As cur-my-ner, er-y-chooyl, va three deiney hannah er jeet gys y thie raad va mee, er chaghteraght veih Cesarea hym’s. 12As doardee yn Spyrryd dou goll mâroo, fegooish mee-ourys erbee. As haink ny shey braaraghyn shoh ry-heshaght mârym, as hie shin stiagh ayns thie yn dooinney: 13As hoilshee eh dooin, kys v’eh er vakin ainle ayns e hie, hass as dooyrt rish, Cur deiney gys Joppa dy eamagh er Simon ta sliennooit Peddyr: 14Eh nee goan y hoilshaghey dhyt, lioroo bee oo hene as ooilley dty hie er nyn sauail. 15As myr ghow mee toshiaght dy loayrt, huitt y Spyrryd Noo orroosyn, myr huitt eh orrinyn ec y toshiaght. 16Eisht chooinee mee er goo yn Chiarn kys dooyrt eh, Ren Ean dy jarroo bashtey lesh ushtey; agh bee shiuish er nyn mashtey lesh y Spyrryd Noo. 17Son wheesh eisht as dy row Jee er choyrt dauesyn yn un ghioot hug eh dooinyn v’er chredjal ayns y Chiarn Yeesey Creest, quoi va mish, dy shassin magh noi Jee? 18Tra cheayll ad shoh, v’ad nyn dhost, as hug ad gloyr da Jee, gra, Eisht ta Jee da ny Ashoonee myrgeddin er ghialdyn arrys gys bea.

19Nish va’n vooinjer v’er nyn skeayley magh, kyndagh rish y tranlaase va jeant er coontey Steaon er droailt choud as Phenice, as Cyprus, as Antioch, as cha ren ad yn goo y phreacheil da unnane erbee agh ynrycan da ny Hewnyn. 20As va paart jeu deiney veih Cyprus as Cyrene, as tra v’ad er jeet gys Antioch loayr ad rish ny Grecianee, preacheil yn Chiarn Yeesey. 21As va laue yn Chiarn mâroo: as ren earroo mooar dy leih credjal as chyndaa gys y Chiarn.

22Eisht haink naightyn jeh ny reddyn shoh gys clashtyn yn agglish va ec Jerusalem: as hug ad magh Barnabas dy gholl gys Antioch. 23As tra v’eh er jeet as er vakin grayse Yee, ghow eh boggey, as choyrlee eh ad ooilley, lesh slane cree ad dy lhiantyn gys y Chiarn. 24Son v’eh ny ghooinney mie, as lane jeh’n Spyrryd Noo, as jeh credjue; as ren ymmodee sleih chyndaa gys y Chiarn. 25Eisht jimmee Barnabas gys Tarsus dy hirrey Saul. As tra v’eh er gheddyn eh, hug eh lesh eh gys Antioch. 26As haink eh gy-kione, dy duirree ad choud as bleïn ayns shen ayns sheshaght ny hagglish, as dy dynsee ad ymmodee dy leih; as va ny credjuee enmyssit Creesteenyn hoshiaght ayns Antioch.

27As ayns ny laghyn shen haink phadeyryn veih Jerusalem gys Antioch. 28As hass seose fer jeu enmyssit Agabus, as hoilshee eh liorish y Spyrryd dy beagh genney vooar er feaï-ny-cruinney; shen haink myrgeddin gy-kione rish lhing Claudius Cesar. 29Eisht ghow ny Creesteenyn ayns laue, dy chooilley ghooinney gys rere e phooar, dy chur cooney gys ny braaraghyn va baghey ayns Judea. 30As shen myr ren ad neesht, as hug ad eh gys y chanstyr liorish laueyn Barnabas as Saul.