CAB. XII

1Nish mysh y traa shen heeyn Herod yn ree magh e laueyn dy yannoo tranlaase er shiartanse jeh’n agglish. 2As varr eh Jamys braar Ean lesh y chliwe. 3As er-y-fa dy dug eh tastey dy by-haittin lesh ny Hewnyn shen, hie eh ny-sodjey er e hoshiaght dy ghoaill Peddyr neesht. (Va shen rish feailley ny Caisht). 4As tra v’eh er ghoaill eh, hug eh eh ayns pryssoon, as livrey eh eh fo currym kiare fileyn dy hidooryn dy reayll eh, kiarail lurg y Chaisht dy chur lesh eh magh gys y pobble. 5Va Peddyr er-y-fa shen er ny reayll ayns pryssoon; agh va padjer kinjagh er ny ghoaill gys Jee er e hon. 6As tra baillish Herod v’er choyrt lesh magh eh, yn oie cheddin va Peddyr ny chadley eddyr daa hidoor kianlt lesh daa gheuley; as dreill y watch ec y dorrys arrey er y phryssoon. 7As cur-my-ner, haink ainle y Chiarn huggey, as ren soilshey soilshean ayns y phryssoon: as woaill eh Peddyr er y lhiattee, as ghooisht eh eh, gra, Irree seose dy tappee. As huitt ny geulaghyn jeh e laueyn. 8As dooyrt yn ainle rish, Cur dty chryss ort, as kiangle ort dty vraagyn: As ren eh shen. As dooyrt eh rish, Cur mood dty gharmad, as eiyr orrym’s. 9As hie eh magh as deiyr eh er, as cha row fys echey dy row eh dy jarroo myr va’n ainle er n’yannoo: agh er-lesh dy nee ashlish v’eh dy akin. 10Tra v’ad er gholl shaghey yn chied as yn nah ghard, haink ad gys y ghiat yiarn ta leeideil gys yn ard-valley, as doshil eh daue jeh hene: as hie ad magh as jimmee ad trooid un straïd, as chelleeragh daag yn ainle eh. 11As tra va Peddyr er jeet huggey hene, dooyrt eh, Nish ta fys aym son shickyrys dy vel y Chiarn er choyrt e ainle dy my livrey veih laue Herod, as veih ooilley ny va kiarit m’oï liorish pobble ny Hewnyn. 12As tra v’eh er smooinaghtyn er y chooish, haink eh gys thie Voirrey moir Ean, va sliennooit Mark, raad va ymmodee er nyn jaglym cooidjagh ec padjer. 13As tra va Peddyr er chronkal ec dorrys y ghiat, haink ben-aeg va enmyssit Rhoda dy ênaght quoi v’ayn. 14As tra hug ee enney er coraa Pheddyr, cha doshil ee yn giat son boggey, agh roie ee stiagh as dinsh ee daue dy row Peddyr ny hassoo ec y ghiat. 15Dooyrt adsyn r’ee, T’ou ass dty cheeayl. Agh ren ish dy jeean shickyraghey dy row eh eer myr shen. Eisht dooyrt ad, She yn ainle echey t’ayn. 16Agh chum Peddyr cronkal ec y dorrys: as tra v’ad er vosley da, as er vakin dy nee eh v’ayn, ghow ad lane yindys. 17Agh chrie eshyn e laue orroo ad dy ve nyn dhost, as hoilshee eh daue kys va’n Chiarn er chur lesh eh ass y phryssoon. As dooyrt eh, Insh-jee ny reddyn shoh da Jamys, as da ny braaraghyn. As jimmee eh roish, as hie eh gys ynnyd elley. 18Nish cha leah as va’n laa ayn, cha nee yn beggan anvea va mastey ny sidooryn cre’n erree v’er jeet er Peddyr. 19As tra va Herod er n’yannoo briaght er, as nagh dooar eh skeeal jeh, deysht eh ny sidooryn, as doardee eh ad dy v’er ny choyrt gy-baase. As hie eh sheese veih Judea gys Cesarea, as duirree eh ayns shen.

20As va Herod ayns noidys dewil rish cummaltee Tyre as Sidon: agh haink ad lesh un aigney huggey, as hooar ad stiagh rish Blastus, shamyrder y ree, as hir ad shee; er coontey dy row yn cheer oc cummit seose liorish cheer y ree. 21As er laa pointit hug Herod er e choamrey reeoil, as hoie eh er e stoyl-reeoil, as loayr eh roo ayns glare mooar floaoil. 22As dyllee yn pobble, She coraa Yee t’ayn, as cha nee coraa dooinney. 23As chelleeragh woaill ainle y Chiarn eh, er-yn-oyr nagh dug eh yn gloyr da Jee: as v’eh eeit ec ny crooagyn, as shen myr hooar eh baase.

24Agh ren goo Yee gaase as bishaghey. 25As haink Barnabas as Saul back veih Jerusalem, tra v’ad er chooilleeney yn chirveish oc, as hug ad lhieu mâroo Ean va sliennooit Mark.