CAB. XIII

1Nish va ayns yn agglish va ec Antioch, shiartanse dy adeyryn as dy ir-ynsee; myr Barnabas, as Simeon va enmyssit Niger, as Lucius yn Cyrenian, as Manaen va troggit marish Herod yn tetrarch, as Saul. 2As myr v’ad shirveish gys y Chiarn as trostey, dooyrt y Spyrryd Noo, Reih-jee magh dooys Barnabas as Saul, son yn obbyr huggey ta mee er n’eamagh ad. 3As tra v’ad er hrostey as er ghoaill padjer, as er lhie nyn laueyn orroo, hug ad ad ersooyl.

4Myr shoh currit magh liorish y Spyrryd Noo jimmee ad gys Seleucia; as veih shen hiauill ad gys Cyprus. 5As tra haink ad gys Salamis ren ad goo Yee y phreacheil ayns kialteenyn ny Hewnyn: as va Ean oc mâroo son shirveishagh. 6As tra v’ad er n’gholl trooid yn Ellan gys Paphos, hooar ad ayns shen fer-obbee dy row, phadeyr foalsey, Hew va enmyssit Bar-jesus: 7Va marish kiannoort ny cheerey, Sergius Paulus, dooinney mie tushtagh: hug eh shoh fys er Barnabas as Saul, geearree goo Yee y chlashtyn. 8Agh Elymas (ta shen dy ghra ’sy ghlare ainyn, Yn fer-obbee) hug eh eddin daue, er-chee dy hyndaa yn kiannoort veih’n chredjue. 9Agh Saul (ta myrgeddin enmyssit Paul) lhieent lesh y Spyrryd Noo, hoie eh e hooillyn er dy gyere, 10As dooyrt eh, O uss ta lane jeh dy chooilley chialgeyrys as dy olkys, vac Noid-ny-hanmey, noid dy chooilley chairys, nagh n’aag oo jeh dy chassey raaidyn jeeragh y Chiarn? 11As nish cur-my-ner, ta laue yn Chiarn ort, as bee oo doal, cha vaik oo yn ghrian son earish. As chelleeragh huitt kay as dorraghys er; as hie eh mygeayrt rasey shirrey peccagh dy gholl ny chione. 12Tra honnick yn kiannoort eisht cre va er daghyrt, ren eh credjal, as ghow eh yindys mooar jeh goo yn Chiarn. 13Nish tra va Paul as e heshaght er hiaulley veih Paphos, haink ad gys Perga ayns Pamphylia: as daag Ean ad, as hie eh back gys Jerusalem.

14Agh tra v’ad er gholl veih Perga, haink ad gys Antioch ayns Pisidia, as hie ad stiagh ayns y synagogue er laa yn doonaght, as hoie ad sheese. 15As lurg lhaih yn leigh as ny phadeyryn, hug fir-reill yn synagogue fys huc, gra, Shiuish gheiney as vraaraghyn, my ta fockle erbee dy choyrle eu dy chur da’n pobble, loayr-jee eh. 16Eisht hass Paul seose, as troggal seose e laue, dooyrt eh, Gheiney Israel, as shiuish ta goaill aggle roish Jee, eaisht-jee. 17Ren Jee yn pobble shoh Israel ny ayraghyn ain y reih, as soiaghey mooar jeh’n pobble tra v’ad er nyn yoarreeaght ayns cheer Egypt, as lesh laue niartal hug eh lesh ad magh ass Egypt. 18As mysh da-eed bleïn dy hraa dymmyrk eh ayns yn aasagh lesh nyn ghrogh-ellyn. 19As tra v’eh er stroie shiaght ashoonyn ayns cheer Chanaan, rheynn eh yn thalloo oc orroo liorish cron. 20As ny lurg shen hug eh daue briwnyn, mysh kiare cheead as jeih bleeaney as da-eed, derrey Samuel yn phadeyr. 21As ny lurg shen yeearree ad ree: as hug Jee daue Saul mac Cis, dooinney jeh sheeloghe Benjamin, son da-eed bleïn. 22As tra v’eh er scughey eshyn, hoie eh David seose dy ve nyn ree; gymmyrkey feanish lesh myrgeddin as gra, Ta mee er gheddyn magh David mac Jesse, dooinney lurg my chree hene, nee cooilleeney ooilley my aigney. 23Jeh sluight y dooinney shoh ta Jee, cordail rish e ghialdyn, er hroggal seose da Israel Saualtagh Yeesey: 24Erreish da Ean, my daink Yeesey, [v’]er phreacheil yn bashtey dy arrys da ooilley pobble Israel. 25As myr va Ean cooilleeney e hirveish, dooyrt eh, Quoi, ta shiu smooinaghtyn mish? Cha nee mish eh. Agh cur-my-ner, ta fer cheet my yeï, braagyn e choshey cha vel mee feeu dy eaysley. 26Gheiney as vraaraghyn, cloan kynney Abraham, as quoi-erbee ta nyn mast’ euish goaill aggle roish Jee, hiuish ta goo yn taualtys shoh er ny choyrt. 27Son cummaltee Yerusalem, as ny fir-reill oc, son nagh dug ad tastey dasyn, ny foast da goo ny phadeyryn t’er nyn lhaih dy chooilley ghoonaght, t’ad er chooilleeney ad shen ayns eshyn y gheyrey. 28As ga nagh dooar ad oyr erbee baaish ayn, ny-yeih ghuee ad er Pilate e vioys y ghoaill. 29As tra v’ad er chooilleeney ooilley ny va scruit jeh, ghow ad eh neose jeh’n villey, as doanluck ad eh ayns lhiaght. 30Agh hrog Jee seose eh veih ny merriu: 31As v’eh er ny akin ymmodee laghyn lioroosyn haink seose mârish veih Galilee gys Jerusalem, va ny feanishyn echey da’n pobble. 32As ta shinyn fockley magh diu yn sushtal gherjoilagh; eer yn gialdyn va jeant da ny ayraghyn, 33Kys dy vel Jee er n’yannoo shen mie dooinyn yn chloan oc, ayns dy vel eh er hroggal seose Yeesey reesht; myr te myrgeddin scruit ayns yn nah psalm, Oo my vac, jiu ta mee er dty gheddyn. 34As mychione dy hrog eh seose eh veih ny merriu, as nagh row eh arragh dy hyndaa gys loauid, dooyrt eh er yn aght shoh, Ver-yms diu myghinyn shickyr Ghavid. 35Shen-y-fa t’eh gra myrgeddin ayns psalm elley, Cha lhig oo da dty Er-casherick loauid y akin. 36Son erreish da David rish e lhing hene v’er hirveish aigney Yee, huitt eh ny chadley, as v’eh er ny oanluckey marish e ayraghyn, as honnick eh loauid: 37Agh eshyn hrog Jee seose reesht, cha vaik eh loauid.

38Toig-jee shiuish er-y-fa shen, gheiney as vraaraghyn, dy nee ny hrooidsyn ta leih peccaghyn er ny phreacheil diu: 39As liorishyn ta ooilley ny ta credjal er ny heyrey veih dy chooilley nhee, voue nagh voddagh shiu v’er ny heyrey liorish leigh Voses. 40Cur-jee twoaie er-y-fa shen, nagh jig shen erriuish ta ny phadeyryn er loayrt, gra, 41Cur-jee my-ner, shiuish ghannidee, gow-jee yindys, as jean-jee cherraghtyn: son ta mish gobbraghey obbyr ayns ny laghyn euish, obbyr nagh jean shiu er aght erbee y chredjal, ga dy beagh eh er ny hickyraghey diu. 42As myr va ny Hewnyn goll magh ass y synagogue, ghuee ny Ashoonee dy beagh ny goan shoh er ny phreacheil daue yn nah ghoonaght. 43As erreish da’n chaglym-cooidjagh v’er skeayley, deiyr ymmodee jeh ny Hewnyn, as jeh ny proselyteyn crauee er Paul as Barnabas; as loayr ad roo, as choyrlee ad ad dy hannaghtyn ayns grayse Yee.

44As yn nah ghoonaght haink faggys yn slane ard-valley cooidjagh dy chlashtyn goo Yee. 45Agh tra honnick ny Hewnyn lheid y chaglym dy leih, daase ad feer jymmoosagh, as loayr ad noi ny reddyn va Paul dy livrey, cur eddin da, as oltooaney eh. 46Eisht daase Paul as Barnabas dunnal, as dooyrt ad, Ve ymmyrchagh goo Yee dy ve hoshiaght er ny phreacheil diuish: agh fakin dy vel shiu cur cooyl rish, as briwnys shiu hene neu-feeu jeh’n vea veayn, cur-my-ner ta shinyn chyndaa gys ny Ashoonee. 47Son shen myr ta’n Chiarn er chur sarey dooin, gra, Ta mee er hoiaghey oo seose dy ve dty hoilshey da ny Ashoonee, as dy ve son saualtys gys ardjyn sodjey magh y thallooin. 48As tra cheayll ny Ashoonee shoh ghow ad boggey, as ren ad goo yn Chiarn y ghloyraghey: as whilleen as va feeu as aarloo son y vea veayn ren ad credjal. 49As va goo yn Chiarn er ny ockley magh trooid ooilley yn cheer. 50Agh ghreinnee ny Hewnyn ny mraane seyrey va jeh’n chredjue oc, as deiney ooasle yn ard-valley nyn ’oï oc, as dirree ad seose noi Paul as Barnabas, as deiyr ad ad ass ny ardjyn oc. 51Agh chrie adsyn yn joan jeh nyn gassyn nyn ’oï oc, as haink ad gys Iconium. 52As va ny Creesteenyn lhieent lesh boggey as y Spyrryd Noo.