CAB. XV

1As dynsee shiartanse dy gheiney haink neose veih Judea ny braaraghyn, gra, Mannagh bee shiu er nyn ghiarey-chymmylt lurg cliaghtey Voses, cha vod shiu v’er nyn sauail. 2Tra va streeu er-y-fa shen as resooney nagh nee beggan er ve ec Paul as Barnabas roo, ghow ad ayns laue dy ragh Paul as Barnabas as shiartanse elley mâroo, seose gys Jerusalem gys ny ostyllyn as y chanstyr mychione y question shoh. 3As hie yn agglish magh mâroo dy chur ad er nyn doshiaght er nyn yurnah, as jimmee ad trooid Phenice as Samaria, soilshaghey chyndaa ny Hashoonee gys y chredjue: as va shoh oyr boggey mooar da ooilley ny braaraghyn. 4As tra v’ad er jeet gys Jerusalem, ghow yn agglish dy arryltagh roo, myr ren ny ostyllyn as y chanstyr, as hug ad coontey jeh dy chooilley nhee va Jee er n’yannoo lhieu. 5As hrog seose shiartanse jeh ny Phariseeyn v’er jyndaa gys y chredjue, as dooyrt ad, Dy row eh ymmyrchagh ad y ghiarey-chymmylt, as ad ve sarit dy reayll leigh Voses.

6As haink ny ostyllyn as y chanstyr cooidjagh dy reaghey yn chooish shoh. 7As erreish daue v’er ve foddey resooney, dirree Peddyr seose, as dooyrt eh roo, Gheiney as vraaraghyn, ta fys eu foddey er-dy-henney, dy ren Jee reih y yannoo nyn mast’ ain, dy row ny Ashoonee veih my veeal’s dy chlashtyn goo yn tushtal, as dy chredjal. 8Agh dymmyrk Jee, fer-fysseree ny creeaghyn, feanish lhieu, as hug eh daue yn Spyrryd Noo, myr hug eh dooinyn. 9As cha dug eh liettrimys erbee eddyr adsyn as shinyn, casherickey ny creeaghyn oc liorish credjue. 10Kys er-y-fa shen dy vel shiu nish brasnaghey Jee, liorish quing y choyrt er mwannal ny Creesteenyn, nagh row ec ny ayraghyn ain, ny ain hene yn niart dy ymmyrkey? 11Agh ta shin credjal trooid grayse nyn Jiarn Yeesey Creest, dy bee mayd er nyn sauail, er yn un aght roosyn.

12Eisht va ooilley yn cheshaght nyn dhost, as deaisht ad rish Barnabas as Paul, soilshaghey cre ny mirrilyn as ny yindyssyn va Jee er n’obbraghey mastey ny Ashoonee lioroosyn.

13As erreish daue loayrt, dreggyr Jamys, gra, Gheiney as vraaraghyn, eaisht-jee rhym’s. 14Ta Simeon er hoilshaghey kys ren Jee ec y toshiaght jeeaghyn er ny Ashoonee dy ghoaill assdoo pobble son e ennym hene. 15As rish shoh ta coardail goan ny phadeyryn; myr te scruit, 16Ny lurg shoh hig-yms reesht, as trog-ym ass-y-noa cabbane-agglish Ghavid, ta er duittym: as trog-ym eh reesht erreish da v’er gholl naardey, as soie-ym eh seose: 17Dy vod y Chiarn v’er ny hirrey magh liorish y chooid elley jeh deiney [Israel] as liorish ooilley ny Ashoonee, ta enmyssit orrym, ta’n Chiarn gra, ta jannoo dy chooilley nhee jeu shoh. 18Ec Jee ta fys er ooilley e obbraghyn hene, er-dy hoshiaght y theihll. 19Shen-y-fa my vriwnys eh, gyn shin dy voirey adsyn ta veih mastey ny Ashoonee er jyndaa gys Jee: 20Agh shin dy scrieu huc, ad dy reayll ad-hene veih eajeeys jallooyn, as veih maarderys, as veih [gee] reddyn toghtit, as veih fuill. 21Son ta ec Moses er-dyn chenn earish, ayns dy chooilley ard-valley adsyn ta dy phreacheil eh, as t’eh er ny lhaih ayns ny kialteenyn dy chooilley ghoonaght. 22Eisht yeeagh ny ostyllyn as y chanstyr, as y slane agglish er dy ve ymmyrchagh dy chur deiney reiht jeh’n cheshaght oc hene gys Antioch, marish Paul as Barnabas, ta shen dy ghra, Judas sliennooit Barsabas, as Silas, ard-gheiney mastey ny braaraghyn: 23As hug ad screeuyn lhieu er yn aght shoh, Ta ny ostyllyn, as y chanstyr, as ny braaraghyn cur bannaght gys ny braaraghyn ta jeh ny Ashoonee ayns Antioch, as Syria as Cilicia. 24Son wheesh as dy vel shin er chlashtyn, dy vel shiartanse hie magh voïnyn er voirey shiu lesh goan, cur shaghrynys er nyn anmeenyn, as gra, dy nhegin diu v’er nyn ghiarey-chymmylt, as y leigh y reayll; daue cha dug shinyn lheid y sarey: 25Ta shinyn (lesh un aigney er nyn jaglym cooidjagh) er vakin eh mie, dy chur deiney reiht hiuish, marish nyn mraaraghyn graihagh Barnabas as Paul; 26Deiney ta er ve ayns gaue baaish son ennym nyn Jiarn Yeesey Creest. 27Ta shin er-y-fa shen er chur hiu Judas as Silas, nee ny reddyn cheddin y insh diu ass nyn meeal hene. 28Son ta chammah yn Spyrryd Noo, as shinyn, er vakin eh mie, gyn errey smoo y chur erriu na ny reddyn ymmyrchagh shoh; 29Shiu dy reayll shiu hene veih bee chebbit gys jallooyn, as veih fuill, as veih reddyn toghtit, as veih maarderys: voue shoh my reaillys shiu shiu-hene, nee shiu dy mie. Slane lhieu. 30Myr shen tra v’ad er lhiggey yn raad daue, haink ad gys Antioch: as cha leah as va’n cheshaght er nyn jaglym cooidjagh, livrey ad ny screeuyn. 31As lhaih ad ee lesh boggey as gerjagh mooar. 32As myr va Judas as Silas nyn vadeyryn ad-hene, choyrlee ad ny braaraghyn lesh ymmodee goan, as hickyree ad [ad ayns nyn gredjue]. 33As erreish daue v’er vuirriaght ayns shen son earish, lhig ny braaraghyn y raad daue gys ny ostyllyn ayns shee. 34Ny-yeih she aigney Silas ve dy uirriaght ayns shen. 35Duirree Paul myrgeddin as Barnabas ayns Antioch, gynsaghey as preacheil goo yn Chiarn, marish ymmodee elley.

36As laghyn ny lurg shen dooyrt Paul rish Barnabas, Lhig dooin goll reesht dy yeeaghyn nyn mraaraghyn ayns dy chooilley ard-valley, raad ta shin er phreacheil goo yn Chiarn, dy yeeaghyn kys t’ad. 37As va Barnabas aggindagh er Ean y chur lhieu mâroo, va sliennooit Mark. 38Agh dob Paul nagh ragh eh mâroo, son dy daag eh ad ec Pamphylia, as nagh jagh eh mâroo gys yn obbyr. 39As dirree lheid y streeu shen eddyr ad, dy scarr ad ry-cheilley: as hug Barnabas lesh Mark, as ghow eh lhuingys gys Cyprus. 40As reih Paul Silas, as jimmee eh roish, erreish da v’er ny hymney gys grayse Yee liorish ny braaraghyn. 41As huill eh trooid Syria as Cilicia, niartaghey ny kialteenyn ayns nyn gredjue.