CAB. XVI

1Eisht haink eh gys Derbe as Lystra: as cur-my-ner, va dooinney dy row jeh’n chredjue ayns shen, va enmyssit Timothy, mac ben dy row v’er ve ny Hew, as ren chyndaa gys y chredjue; agh va’n Ayr echey ny Ashoonagh: 2Va goo mie ec Timothy shoh veih ny braaraghyn va ec Lystra as Iconium. 3As eshyn baillish Paul dy gholl magh mârish, as ghow eh as ren eh eh y ghiarey-chymmylt, kyndagh rish ny Hewnyn v’ayns ny ardjyn shen: son va fys oc ooilley dy row e ayr ny Ashoonagh. 4As myr v’ad goll trooid ny ard-valjyn, livrey ad daue ny oardaghyn dy reayll, va sarit liorish ny ostyllyn as y chanstyr va ec Jerusalem. 5As shen myr va ny kialteenyn er nyn niartaghey ayns y chredjue, as er nyn mishaghey ayns earroo gagh laa. 6Nish tra v’ad er gholl trooid Phrygia, as cheer Ghalatia, v’ad er nyn lhiettal liorish y Spyrryd Noo dy phreacheil y goo ayns Asia, 7As erreish daue v’er jeet gys Mysia, chiare ad dy gholl er nyn doshiaght gys Bithynia: agh cha lhig y Spyrryd daue. 8Myr shen hie ad shaghey Mysia, as haink ad neose gys Troas. 9As honnick Paul ashlish ayns yn oie; Hass dooinney jeh Macedonia liorish, as ghuee eh er, gra, Tar noon gys Macedonia, as cooin lhien. 10As erreish da v’er vakin yn ashlish, ghow shin ayns laue dy gholl jeeragh gys Macedonia, toiggal son shickyrys dy row yn Chiarn er n’eamagh orrin dy phreacheil y sushtal daue. 11Shen-y-fa ghow shin lhuingys veih Troas, as haink shin lesh coorse jeeragh gys Samothracia, as yn nah laa gys Neapolis; 12As veih shen gys Philippi, yn reih ard-valley v’ayns yn ayrn shen jeh Macedonia, as bentyn gys y Raue: as duirree shin ayns yn ard-valley shen shiartanse dy laghyn. 13As er laa yn doonaght hie shin magh ass y valley, gys boayl va lowit son padjer, rish oirr ny hawin; as hoie shin sheese, as loayr shin rish ny mraane v’er nyn jaglym cooidjagh.

14As va ben dy row va enmyssit Lydia, jeh ard-valley Thyatira, as dellal ayns purple, v’ee shoh cur ooashley da Jee, as deaisht ee rooin: as doshil yn Chiarn y cree eck, dy choyrt geill da ny goan va Paul dy loayrt. 15As tra v’ee hene as lught e thie er nyn mashtey, ghuee ee orrin, gra, My ta shiu er vriwnys mish dy ve firrinagh gys y Chiarn, tar-jee stiagh gys my hie, as gow-jee aaght mârym. As cha goghe ee obbal voïn.

16As haink eh gy-kione, myr va shin er y raad goll gys padjer, dy daink ben aeg dy row nyn guail, aynjee va spyrryd faishnee, as v’ee tayrn ymmodee cosney da ny mainshteryn eck, liorish e hobbeeys. 17Deiyr ee shoh er Paul as orrinyn, gyllagh as gra, Ny deiney shoh sharvaantyn y Jee smoo ard, ta soilshaghey dooin raad y taualtys. 18As shoh ren ee ry ymmodee laghyn. Agh Paul seaghnit ec shoh, hyndaa eh, as dooyrt eh rish y spyrryd, Ta mee dy dty harey ayns ennym Yeesey Creest oo dy heet magh ass-jee. As haink eh magh yn oor cheddin. 19As tra honnick ny mainshteryn eck dy row ooilley jerkal nyn gosney ec kione, haare ad Paul as Silas, as hayrn ad ad gys y whuaiyl, fenish fir-reill yn ard-valley, 20Eisht hug ad lhieu ad gys ny fir-reill, gra, Ta ny deiney shoh er ghoostey ymmodee anvea ayns yn ard-valley ain, liorish dy nee Hewnyn ad, 21As dy vel ad gynsaghey cliaghtaghyn nagh vel lowal dooinyn, ta fo reill yn Raue, dy ghoaill orrin ny dy reayll. 22As dirree yn pobble magh nyn ’oï: as raip ny fir-reill nyn eaddagh jeu, as doardee ad ad dy ve scuitchit. 23As tra v’ad er woalley ad dy dewil, hilg ad ad ayns pryssoon, as doardee ad yn wardoor dy reayll ad dy sauchey. 24As myr va lheid y currym chion currit er, hilg eh ad ayns y phryssoon b’odjey stiagh, as ren eh ny cassyn oc shickyr ayns ny stockyn.

25Agh ec main-oie ghow Paul as Silas padjer as arraneyn-moyllee gys Jee: as cheayll ny pryssoonee ad. 26As ayns y tullogh va craa mooar thallooin ayn, myr shen dy row undinyn y phryssoon er nyn graa: as chelleeragh va ooilley ny dorryssyn er nyn vosley, as geulaghyn dy chooilley unnane er nyn veaysley. 27As ghooisht arreyder y phryssoon ass e chadley, as tra honnick eh dorryssyn y phryssoon foshlit, hayrn eh e chliwe, as baillish v’er varroo eh-hene, goaill ayns laue dy row ny pryssoonee er chosney roue. 28Agh deïe Paul lesh ard-choraa, gra, Ny jean aggair erbee dhyt hene; son ta shin ooilley ayns shoh. 29Eisht deïe eh son soilshey, as lheim eh stiagh, as huitt eh sheese er-creau kiongoyrt rish Paul as Silas; 30As hug eh lesh ad magh, as dooyrt eh, Gheiney vie, cre t’orrym dy yannoo dy chosney saualtys? 31As dooyrt ad, Jean credjal ayns y Chiarn Yeesey Creest, as bee oo hene as dty hie er nyn sauail. 32As loayr ad goo yn Chiarn rishyn, as rish ooilley e hie. 33As ghow eh ad yn oor cheddin jeh’n oie, as niee eh ny lhottyn oc; as v’eh hene as ooilley lught e hie er nyn mashtey chelleeragh. 34As tra v’eh er chur lesh ad stiagh ayns e hie, hoie eh bee rhymboo, as ghow eh-hene as ooilley e hie boggey, as chred ad ayns Jee. 35As tra va’n laa rish, hug ny fir-reill fys lesh ny sidooryn, gra, Lhig ny deiney shen magh. 36As dinsh arreyder yn phryssoon yn order shoh da Paul, Ta ny fir-reill er chur fys dy lhiggey yn raad diu: gow-jee nish er-y-fa shen magh, as immee-jee reue ayns shee. 37Agh dooyrt Paul roo, T’ad er nyn mwoalley dy foshlit ga dy nee Romanee shin, as neu-chyndagh, as er hilgey shin ayns pryssoon; as vel ad nish dyn eiyrt shin magh dy follit? shen red nagh jean; agh lhig daue hene cheet as shin y chur lhieu magh. 38As dinsh ny sidooryn shoh da ny fir-reill: as va aggle orroo tra cheayll ad dy nee gys rheam y Raue v’ad bentyn. 39Eisht haink ad as ghuee ad orroo, as hug ad lhieu magh ad, guee orroo dy gholl roue ass yn ard-valley. 40As tra v’adsyn er jeet ass y phryssoon, hie ad stiagh ayns thie Lydia: as erreish daue v’er vakin ny braaraghyn, ren ad y gherjaghey ad, as jimmee ad rhymboo.