CAB. XVIII

1Lurg ny reddyn shoh jimmee Paul veih Athens, as haink eh gys Corinth: 2Raad hooar eh Hew dy row enmyssit Aquila, ruggyr ayns Pontus, va er ny laghyn shen er jeet veih Italy, as e ven Priscilla mârish (er-yn-oyr dy row Claudius er harey ooilley ny Hewnyn dy gholl ass y Raue) as ghow eh aaght mâroo. 3As er-yn-oyr dy row eh jeh’n un cheird roo, duirree eh as dobbree eh mâroo (son jannoo cabbaneyn va’n cheird oc). 4As v’eh resooney ayns y synagogue dy chooilley ghoonaght, as coyrlaghey ny Hewnyn as ny Greekyn. 5As tra va Silas as Timothy er jeet veih Macedonia, va Paul er ny ghreinnaghey ayns e spyrryd, as dymmyrk eh feanish gys ny Hewnyn dy nee Yeesey va yn Creest. 6Agh son wheesh as dy dirree ad magh n’oï, as dy loayr ad dy lunagh, chrie eh e choamrey, as dooyrt eh roo, Yn uill eu dy row er ny king eu hene; ta mish neu-chyndagh: veih shoh magh hem roym gys ny Ashoonee.

7As jimmee eh veih shen, as hie eh stiagh ayns thie dooinney dy row va ooashlaghey Jee, enmyssit Justus, yn thie echey va er-gerrey da’n synagogue. 8As ren Crispus ard-fer-reill yn synagogue, credjal ayns y Chiarn, as ooilley e lught-thie: as va ymmodee jeh ny Corinthianee ren clashtyn as credjal, er nyn mashtey. 9Eisht loayr y Chiarn ayns ashlish rish Paul ayns yn oie, Ny bee aggle ort, agh loayr magh, as ny bee dty host: 10Son ta mish mayrt, as cha soie-ee dooinney erbee ort dy yannoo aggair dhyt: son ta mooarane sleih aym’s ’syn ard-valley shoh. 11As duirree eh ayns shen three bleeaney as lieh vleïn, gynsaghey goo Yee nyn mast’ oc.

12As tra va Gallio ny chiannoort er Achaia, dirree ny Hewnyn magh lesh un aigney noi Paul, as hayrn ad lhieu eh gys stoyl y vriwnys, 13Gra, Ta’n fer shoh coyrlaghey sleih dy ooashlaghey Jee noi yn leigh. 14As nish myr va Paul mysh loayrt, dooyrt Gallio rish ny Hewnyn, Dy beagh eh cooish dy aggair, ny obbyr scammyltagh erbee, cha beagh eh agh resoonagh dooys, O Hewnyn, dy ymmyrkey lhieu: 15Agh mannagh vel eh agh argane ny-vud eu hene mychione focklyn as enmyn, as y leigh eu hene, jeeagh-jee hene da; son cha beem’s my vriw ayns lheid ny cooishyn. 16As deiyr eh ad veih stoyl y vriwnys. 17Eisht ghow ooilley ny Greekyn Sosthenes, ard-fer-ynsee yn synagogue, as woaill ad eh kiongoyrt rish stoyl y vriwnys: as cha ren Gallio soiaghey scansh erbee jeh veg jeh ny reddyn shen.

18As duirree Paul ayns shen ymmodee laghyn, as eisht daag eh bannaght ec ny braaraghyn, as hiauill eh veih shen gys Syria, as mârish Priscilla as Aquila, v’er vaarey e chione ec Cenchrea; son v’eh fo breearrey. 19As haink eh gys Ephesus, as daag eh adsyn ayns shen: agh hie eh-hene stiagh ayns y synagogue, as resoon eh rish ny Hewnyn. 20Myr v’ad geearree er dy uirriaght traa sodjey mâroo, cha n’eaishtagh eh roo: 21Agh daag eh bannaght oc, gra, Shegin dooys er dy chooilley chor yn feailley shoh ta er-gerrey y reayll ec Jerusalem: agh hig-ym back reesht hiuish, lesh cooney Yee. As hiauill eh veih Ephesus. 22As tra v’eh er jeet er thalloo ec Cesarea, as er gholl seose, as er vannaghey da’n agglish, hie eh sheese gys Antioch. 23As erreish da v’er vaarail tammylt dy hraa ayns shen, jimmee eh roish, as hie eh harrish cheer Ghalatia as Phrygia ayns order, niartaghey ooilley ny Creesteenyn ayns nyn gredjue.

24As haink Hew dy row gys Ephesus, va enmyssit Apollos, ruggyr ec Alexandria, dooinney dy ghlare floaoil, as fondagh ayns ny scriptyryn. 25Va ec y dooinney shoh ynsaghey ayns raad y Chiarn; as lesh jeeanid ayns y spyrryd loayr eh as dynsee eh dy imneagh ny reddyn va bentyn rish y Chiarn, toiggal ynrycan bashtey Ean. 26As ren eh toshiaght dy loayrt lesh dunnallys ayns y synagogue. Agh tra va Aquila as Priscilla er chlashtyn eh, ghow ad stiagh eh, as hug ad ynsaghey sodjey as s’diuney da ayns raad Yee. 27As tra v’eh kiarit dy gholl er e hoshiaght gys Achaia, scrieu ny braaraghyn lesh coyrlaghey da ny Creesteenyn dy yannoo soiaghey mooar jeh: as erreish da v’er jeet, hug eh dy mie er nyn doshiaght adsyn v’er chredjal trooid grayse. 28Son hug eh slane prowal da ny Hewnyn, as shen dy foshlit, soilshaghey liorish ny scriptyryn, dy nee Yeesey va’n Creest.