CAB. XIX

1As haink eh gy-kione choud as va Apollos ec Corinth, dy jagh Paul trooid ny ardjyn syrjey, derrey haink eh gys Ephesus: raad hooar eh Creesteenyn dy row, 2As dooyrt eh roo, Vel shiu er gheddyn yn Spyrryd Noo neayr as ren shiu credjal? Dooyrt adsyn rish, Cha vel shin wheesh as er chlashtyn dy vel Spyrryd Noo ayn. 3As dooyrt eh roo, Cre gys eisht va shiu er nyn mashtey? Dooyrt adsyn, Gys bashtey Ean. 4Eisht dooyrt Paul, Ren Ean dy firrinagh shirveish yn bashtey dy arrys, coyrlaghey yn pobble, Ad dy chredjal aynsyn harragh ny yeï, ta shen, ayns Creest Yeesey. 5Tra cheayll ad shen, v’ad er nyn mashtey ayns ennym y Chiarn Yeesey. 6As tra va Paul er lhie e laueyn orroo, haink y Spyrryd Noo orroo; as loayr ad lesh chengaghyn, as ren ad phadeyrys. 7As va ooilley ny deiney mysh ghaa-yeig. 8As hie eh stiagh ayns y synagogue, as loayr eh lesh dunnallys choud as three meeaghyn, resooney as coyrlaghey ny reddyn va bentyn rish reeriaght Yee. 9Agh tra daase shiartanse jeu roonagh, as mee-chredjuagh, loayrt dy lunagh noi yn credjue shen kiongoyrt rish y pobble, hug eh cooyl roo, as scarrey ny Creesteenyn voue, dynsee eh gagh laa ayns schoill fer va enmyssit Tyrannus. 10As shoh chum eh jannoo choud as daa vleïn; myr shen dy ren ooilley cummaltee Asia clashtyn goo yn Chiarn Yeesey; chammah ny Hewnyn as ny Ashoonee. 11As s’mooar va ny mirrilyn ren Jee y obbraghey liorish laueyn Phaul: 12Myr shen dy dug ad lhieu veih’n chorp echey gys sleih chingey, bussallyn as apronyn, as hooar ad rea rish ny doghanyn oc, as hie ny drogh-spyrrydyn magh assdoo.

13Eisht ren shiartanse jeh ny Hewnyn va goll mygeayrt castey drogh-spyrrydyn, goaill orroo dy eamagh harrish y vooinjer va drogh-spyrrydyn ayndoo, ennym y Chiarn Yeesey, gra, Ta shin cur shiu fo harey liorish Yeesey ta Paul dy phreacheil. 14As va shiaght mec da Sceva, Hew dy row, as ny ard-ghooinney ’sy taggyrtys va jannoo myr shoh. 15As dreggyr y drogh-spyrryd as dooyrt eh, Yeesey shione dou, as ta enney aym er Paul; agh quoi shiuish? 16As lheim y dooinney ayn va’n drogh-spyrryd orroo, as hooar eh yn varriaght as laue yn eaghtyr harrystoo, myr shen dy chossyn ad roue ass y thie shen rooisht as broojit. 17As hooar ooilley ny Hewnyn, as ny Ashoonee va baghey ec Ephesus fys er shoh; as haink aggle orroo ooilley, as va ard-voylley er ny choyrt da ennym y Chiarn Yeesey. 18As haink ymmodee jeusyn v’er chredjal, as ghow ad rish, as hoilshee ad magh nyn obbraghyn. 19Ren ymmodee jeusyn neesht va cur-rish obbeeys, nyn lioaryn y chur lhieu cooidjagh, as losht ad ad kiongoyrt rish dy chooilley ghooinney; as hilg ad seose y phrice oc, as hooar ad eh dy ve jeih thousaneyn as da-eed dy pheeshyn argid. 20Cha breeoil shen ren goo Yee goaill niart as bishaghey.

21Tra va ny reddyn shoh ec kione, chiare Paul ayns y Spyrryd, erreish da v’er gholl trooid Macedonia as Achaia, dy ragh eh gys Jerusalem, gra, Lurg dou ve ayns shen, shegin dou myrgeddin yn Raue y akin. 22Er shoh hug eh gys Macedonia jees jeh ny shirveishee echey, Timothy as Erastus; agh duirree eh-hene ayns Asia son earish. 23As ec y traa cheddin cha nee yn beggan boirey dirree mychione y chredjue shen. 24Son va gaaue-argid dy row, enmyssit Demetrius, va jannoo chiambyllyn argid son Diana, as cur cosney nagh nee beggan gys ny fir-cheirdey; 25Roo shoh, tra v’eh er n’eamagh orroo cooidjagh marish ny obbreeyn jeh’n cheird cheddin, dooyrt eh, Gheiney vie, ta fys eu dy nee liorish yn cheird shoh ta nyn meaghey ain: 26Marish shoh ta shiu fakin as clashtyn, dy vel Paul shoh, cha nee ynrycan ec Ephesus, agh faggys trooid ooilley Asia, er choyrlaghey as er hayrn ersooyl ymmodee sleih, gra, nagh nee Jeeghyn ad ta jeant lesh laueyn: 27Myr shen dy vel, cha nee ny-lomarcan yn cheird shoh ain ayns dangeyr dy ve mee-lowit; agh myrgeddin chiamble yn ven-jee vooar Diana dy ve beg soit jeh, as yn ard-ooashley eck dy ve er ny stroie, jeeish ta ooilley Asia as y seihll cur ooashley. 28Tra cheayll ad shoh, v’ad erskyn-towse jymmoosagh, as dyllee ad, gra, S’mooar ta Diana ny Ephesianee. 29As va ooilley yn ard-valley bun-ry-skyn: as erreish daue v’er ghoaill Gaius as Aristarchus, Macedonianee, sheshaghyn troailtee Phaul, ying ad stiagh ooilley dy cheilley ayns y theater. 30As tra baillish Paul goll stiagh gys y pobble, cha lhiggagh ny Creesteenyn da. 31As hug shiartanse jeh ard-gheiney Asia, va ny caarjyn echey, fys huggey, geearree gyn eh dy hreishteil eh-hene ayns y theater. 32Deïe paart er-y-fa shen un red, as paart red elley: son va’n chaglym bun-ry-skyn, as cha row fys ec yn ayrn smoo jeu cre’n-fa v’ad er nyn jaglym cooidjagh. 33As hayrn ad Alexander magh ass y cheshaght, ny Hewnyn cur eh er e hoshiaght. As chrie Alexander lesh e laue, as baillish v’er loayrt ass e lieh hene rish y pobble. 34Agh tra hooar ad fys dy nee Hew v’eh, dyllee ad ooilley lesh un choraa choud as daa oor, S’mooar ta Diana ny Ephesianee. 35As tra va cleragh y valley er chur y pobble gys fea, dooyrt eh, Gheiney Ephesus, quoi yn dooinney nagh vel fys echey dy vel ard-valley ny Ephesianee dy ooashlaghey yn ven-jee vooar Diana, as yn jalloo huitt neose veih Jupiter? 36Fakin eisht nagh vod ny reddyn shoh ve loayrit n’oï, lhisagh shiu ve feagh, as gyn nhee erbee y yannoo er vullagh ching. 37Son ta shiu er chur lhieu kionfenish ny deiney shoh, nagh vel edyr roosteyryn dy hiambyllyn, ny foast er loayrt goan mollaghtagh noi yn ven-jee eu. 38Shen-y-fa my ta ec Demetrius, as ny fir-cheirdee ta mârish, plaiynt noi dooinney erbee, ta ny quaiylyn nyn soie, as briwnyn ayndoo, [ry-hoi reaghey y chur daue] lhig daue nyn gooish y phleadeil noi-ry-hoi. 39Agh my ta cooish erbee elley eu dy chur stiagh, yiow shiu reaghey ayns y whuaiyl lowal. 40Son ta shin ayns dangeyr dy bee irree-magh er ny choyrt nyn lieh son obbyr y laa jiu; fakin nagh vel oyr erbee ain dy chur stiagh son lheid y chaglym mooar dy leih. 41As tra v’eh er ghra shoh, lhig eh yn raad da’n pobble.