CAB. XXIII

1As yeeagh Paul dy gyere er y choonceil as dooyrt eh, Gheiney as vraaraghyn, Ta mee er n’ymmyrkey mee-hene fenish Jee lesh cooinsheanse slane ynrick gys y laa t’ayn jiu. 2As doardee Ananias yn ard-saggyrt adsyn va nyn shassoo liorish, dy woalley eh er y veeal. 3Eisht dooyrt Paul rish, Nee Jee uss y woalley, O voalley ghiallit: son vel uss soie dy my vriwnys cordail rish y leigh, as goardaghey mee dy ve bwoailt noi yn leigh? 4As dooyrt y vooinjer va nyn shassoo kionfenish rish, Vel uss goltooaney ard-saggyrt Yee? 5Eisht dooyrt Paul, Cha smooinee mee, vraaraghyn, dy nee yn ard-saggyrt v’eh: son te scruit, Cha loayr oo dy olk jeh fer-reill dty phobble. 6As tra dennee Paul dy row yn derrey ayrn jeu nyn Sadduceeyn, as yn ayrn elley nyn Phariseeyn, deïe eh ayns y choonceil, Gheiney as vraaraghyn, ta mish my Pharisee, my vac da Pharisee: son y treishteil as irree-seose-reesht ny merriu ta mee er my vriwnys. 7As tra v’eh er ghra shoh, dirree streeu eddyr ny Phariseeyn as ny Sadduceeyn, as va’n chaglym noi-ry-hoi. 8Son ta ny Sadduceeyn gobbal yn irree-seose-reesht veih ny merriu, as nagh vel ayn edyr ainle ny spyrryd: agh ta ny Phariseeyn goaill roo ny-neesht. 9As va argane mooar er ny ghoostey: as dirree ny scrudeyryn va er paart ny Phariseeyn, as streeu ad, gra, Cha vel shinyn geddyn foill erbee ayns y dooinney shoh: agh my ta spyrryd ny ainle er loayrt rish, ny lhig dooin caggey noi Jee. 10As myr va’n streeu mooadaghey, va’n ard-chaptan agglagh dy raipagh ad Paul ayns peeshyn, as doardee eh sidooryn dy gholl sheese, as dy ghoaill eh er niart veih nyn mast’ oc, as dy chur lhieu eh stiagh ayns y chashtal. 11As yn oie er-giyn hass y Chiarn liorish, as dooyrt eh, Bee dy yien mie, Phaul: son myr t’ou er n’ymmyrkey feanish jeem’s ayns Jerusalem, myr shen neesht shegin dhyt feanish y ymmyrkey ec y Raue. 12As tra va’n laa rish, haggil shiartanse jeh ny Hewnyn cooidjagh, as chiangle ad ad-hene fo mollaght, gra, nagh n’ee-agh ad as nagh n’iu-agh ad derrey veagh ad er varroo Paul. 13As va erskyn da-eed jeu fo yn cho-vollaght shoh. 14As haink ad gys ny ard-saggyrtyn as y chanstyr, as dooyrt ad, Ta shin er chiangley shin hene fo mollaght trome, nagh n’ee mayd veg derrey vees shin er varroo Paul. 15Nish er-y-fa shen jean-jee shiuish as y choonceil fys y chur gys yn ard-chaptan, eh dy chur lesh eh fenish euish mairagh, myr dy beagh red ennagh eu dy gheddyn toiggal sodjey jeh mychione echey: as bee mainyn aarloo dy ghoaill e vioys my jig eh nyn vaare. 16As tra cheayll mac shayrey Phaul jeh’n lhie farkiaght oc, jimmee eh roish, as hie eh stiagh ayns y chashtal, as dinsh eh ooilley da Paul. 17Eisht deïe Paul er fer jeh ny centurionyn huggey, as dooyrt eh, Cur lhiat yn dooinney aeg shoh gys yn ard-chaptan; son ta red ennagh echey dy insh da. 18Myr shen ghow eh eh, as hug eh lesh eh gys yn ard-chaptan, as dooyrt eh, Deïe Paul yn pryssoonagh orrym huggey, as ghuee eh orrym mee dy chur lhiam yn dooinney aeg shoh hood’s, son dy vel red ennagh echey dy insh dhyt. 19Eisht ghow yn ard-chaptan eh er y laue, as hie eh mârish dy lhiattee gys boayl er-lheh, as dênee eh jeh, Cre shen t’ayd dy insh dooys? 20As dooyrt eh, Ta ny Hewnyn er choardail dy hirrey ort’s, oo dy chur Paul sheese mairagh gys y choonceil, myr dy beagh red ennagh sodjey oc dy gheddyn toiggal jeh veih. 21Agh ny jean uss er y raa oc: son ta aarloo dy ghoaill eh erskyn da-eed dooinney jeu, t’er chiangley ad-hene fo mollaght, nagh jean ad gee ny giu derrey vees ad er varroo eh: as nish t’ad aarloo, jerkal rish gialdyn y gheddyn voïd’s. 22Myr shen lhig yn ard-chaptan yn raad da’n dooinney aeg, as hug eh currym er, Jeeagh nagh n’insh oo da dooinney erbee dy vel oo er hoilshaghey ny reddyn shoh dooys. 23As deïe eh er daa centurion huggey, gra, Fow-jee aarloo daa cheead sidoor dy gholl gys Cesarea, as markee three-feed as jeih, as deiney-shleiy daa cheead, ec y trass oor jeh’n oie. 24As kiare-jee beïyn daue, dy vod Paul markiagh, as dy vod ad y chur lhieu eh dy sauchey gys y kiannoort Felix. 25As ren eh screeuyn er yn aght shoh: 26Bea as slaynt veih Claudius Lysias, gys y kiannoort smoo ooasle Felix. 27Va’n dooinney shoh goit ec ny Hewnyn, as myr v’ad er-chee dy varroo eh, haink mish lesh sheshaght dy hidooryn, as haue mee eh voue, tra hoig mee dy nee Romanagh v’eh. 28As liorish dy row mee booiagh fys y gheddyn er-yn-oyr v’oc dy phlaiynt er, hug mee lhiam eh fenish y whuaiyl oc: 29As dennee mee dy row eh er ny chassid mychione cooishyn jeh’n leigh oc hene; agh nagh row nhee erbee currit gys e lieh toilchin baase ny geulaghyn. 30As tra ve inshit dou dy row ny Hewnyn lhie cooyl-chlea son bioys y dooinney, hug mee fys chelleeragh hood’s, as doardee mee e phlaiyntee dy chur stiagh kiongoyrt rhyt’s cre-erbee v’oc dy lhiassaghey n’oï. Slane lhiat. 31Eisht ghow ny sidooryn Paul myr v’ad oardrit, as hug ad lhieu eh ayns yn oie gys Antipatris. 32Laa-ny-vairagh daag ad ny markee dy gholl mârish, as hie ad back gys y chashtal. 33As tra haink ny markee gys Cesarea, livrey ad ny screeuyn gys y chiannoort, as hoie ad Paul myrgeddin kiongoyrt rish. 34As tra va’n kiannoort er lhaih yn screeuyn, dênee eh cre’n cheer v’eh jeh. As tra hoig eh dy row eh jeh Cilicia; 35Ver-ym clashtyn dhyt, as eshyn, tra vees dty phlaiyntee myrgeddin er jeet. As doardee eh eh dy ve freilt ayns halley briwnys Herod.