CAB. XXV

1Nish tra va Festus er jeet gys y rheam, ec kione three laa hie eh seose veih Cesarea gys Jerusalem. 2Eisht haink yn ard-saggyrt, as reiltee ny Hewnyn kionfenish, as ghuee ad er clashtyn y choyrt daue noi Paul. 3As geearree er yn foayr shoh n’oï, Eh dy chur fys er gys Jerusalem, kiarail ad-hene lhie cooyl-chlea er yn raad, dy ghoaill e vioys. 4Agh dreggyr Festus, dy beagh Paul freilt ec Cesarea, as dy ragh eh-hene gys shen dy gerrit. 5Lhig dauesyn er-y-fa shen, as eshyn, ta er y hon ny mast’ eu, goll sheese mârym’s, as plaiynt y chur stiagh noi yn dooinney shoh son loght erbee dy vel ayn. 6As tra v’eh er vuirriaght ny mast’ oc mysh jeih laa, hie eh sheese gys Cesarea; as laa-ny-vairagh hoie eh er stoyl y vriwnys, as doardee eh Paul dy heet kionfenish. 7As tra v’eh er jeet, hass ny Hewnyn haink veih Jerusalem mygeayrt, as hug ad stiagh ymmodee foiljyn tromey gys lieh Phaul, nagh voddagh ad prowal; 8Choud’s v’eshyn lhiassaghey ass e lieh hene, Chamoo noi leigh ny Hewnyn, chamoo noi yn chiamble, ny foast noi Cesar, ta mee er n’yannoo foill erbee. 9Agh Festus, liorish dy row eh aggindagh ny Hewnyn y wooiys, dreggyr eh Paul as dooyrt eh, Nailt’s goll seose gys Jerusalem, ayns shen dy ve er dty vriwnys son ny reddyn shoh kiongoyrt rhym’s? 10Eisht dooyrt Paul, Ta mee my hassoo ec stoyl-briwnys Cesar, raad s’cair dou ve er my vriwnys: da ny Hewnyn cha vel mee er n’yannoo aggair erbee, myr s’mie ta fys ayd hene. 11Son my ta mee my ghrogh-yantagh, ny my ta mee er n’yannoo nhee erbee dy hoilchin baase, cha vel mee gobbal baase y hurranse: agh mannagh vel yn irriney ayns nhee erbee t’ad shoh dy choyrt my lieh, cha vod dooinney erbee mish y livrey seose huc. Ta mee scughey yn chooish gys Cesar. 12Eisht loayr Festus rish y choonceil, as dooyrt eh, Vel oo er scughey yn chooish gys Cesar? gys Cesar shegin dhyt goll. 13As ec kione laghyn dy row, haink ree Agrippa as Bernice gys Cesarea dy yeeaghyn Festus. 14As erreish daue v’er ve ayns shen ymmodee laghyn, hoilshee Festus cooish Phaul da’n ree, gra, Ta dooinney ayns shoh va faagit ny phryssoonagh liorish Felix: 15Mychione echey, tra va mee ec Jerusalem, ren ny ard-saggyrtyn as shanstyr ny Hewnyn aghin hym, geearree briwnys n’oï. 16Dansoor mish ad, Nagh nee cliaghtey yn vooinjer va bentyn rish y Raue ve dy livrey dooinney erbee seose gys baase, derrey ta’n kimmagh as e chassidee noi-ry-hoi, as kied echey loayrt er e hon hene mychione yn oill veagh currit ass e lieh. 17Shen-y-fa tra v’ad er jeet ayns shoh, fegooish lhiggey shaghey hoie mee laa-ny-vairagh er stoyl y vriwnys, as doardee mee yn dooinney dy ve currit kionfenish. 18N’oï tra va e phlaiyntee er hassoo seose, cha dug ad nhee erbee gys e lieh jeh ny reddyn va mish dy smooinaghtyn: 19Agh va shiartanse dy whestionyn oc n’oï, mychione y chredjue oc hene, as mychione fer enmyssit Yeesey va marroo, agh va Paul shassoo er dy row eh bio. 20As son dy row mee ouryssagh jeh lheid ny questionyn, dênee mee jeh, baillish goll seose gys Jerusalem, ayns shen dy ve er ny vriwnys mychione ny cooishyn shoh. 21Agh tra va Paul er scughey yn chooish gys clashtyn Augustus, doardee mee eh dy ve er ny reayll derrey oddin eh y choyrt gys Cesar. 22Eisht dooyrt Agrippa rish Festus, Veign’s mee hene booiagh yn dooinney y chlashtyn. Mairagh, as eshyn, nee oo clashtyn eh. 23As laa-ny-vairagh, tra va Agrippa er jeet, as Bernice ayns stayd vooar, as er gholl stiagh ayns thie ny quaallagh, marish ny ard-chaptanyn, as ard-gheiney yn ard-valley, ec sarey Festus va Paul er ny choyrt kionfenish. 24As dooyrt Festus, Ree Agrippa, as dy chooilley ghooinney t’ayns shoh kionfenish mârin, hee shiu yn dooinney shoh, mychione ta ooilley ny Hewnyn er phlaiynt hym’s, chammah ec Jerusalem, as ayns shoh geamagh nagh lhisagh eh ve ny sodjey bio. 25Agh tra hoig mish, nagh row eh er n’yannoo nhee erbee dy hoilchin baase, as dy row eh-hene er scughey yn chooish gys Augustus, ta mee kiarit dy choyrt eh. 26As er-y-fa nagh vel shickyrys aym jeh nhee erbee oddym y scrieu gys my hiarn, ta mee er choyrt lhiam eh magh kiongoyrt riu, agh erskyn ooilley kiongoyrt rhyt’s, ree Agrippa, erreish da ve feyshtit, dy vod red ennagh ve aym dy scrieu. 27Son er-lhiam pene dy row eh red neu-resoonagh pryssoonagh y choyrt, as gyn soilshaghey ny cooishyn va lhiasit n’oï.