CAB. XXVII

1As tra ve kiarit dy row shin dy ghoaill lhuingys gys Italy, livrey ad Paul as shiartanse dy phryssoonee elley, gys fer va enmyssit Julius centurion v’ayns sheshaght-chaggee Augustus. 2As goll er-board lhong veih Adramyttium, hie shin magh son y cheayn, kiarail shiaulley rish coastyn Asia, as va Aristarchus, Macedonian veih Thessalonica mârin. 3As yn nah laa haink shin gys Sidon: as hoilshee Julius ard-chenjallys da Paul, cur kied da goll mastey e chaarjyn dy ooraghey eh-hene. 4As feaysley veih shen, hiauill shin fo Cyprus, er-y-fa dy row yn gheay nyn ’oï. 5As tra va shin er hiaulley harrish keayn Cilicia as Pamphylia, haink shin gys Myra ard-valley ayns Lycia. 6As ayns shen hooar y centurion lhong ass Alexandria son shiaulley gys Italy; as hug eh shin er-board. 7As tra va shin er hiaulley dy moal ymmodee laghyn, as s’coan va shin er roshtyn harrish noi Cnidus, son nagh row yn gheay lhien, hiauill shin fo Crete, magh veih Salome: 8As s’coan va shin er gholl shaghey, tra haink shin gys ynnyd ta enmyssit, Ny purtyn aalin, er-gerrey da ard-valley Lasea. 9Nish tra va mooarane traa baarit, as dy row shiaulley nish dangeyragh, er-yn-oyr dy row imbagh yn trostey nish harrish, choyrlee Paul ad. 10As dooyrt eh roo, Gheiney vie, ta mee cur tastey dy bee yn veyge shoh lesh mooarane coayl as assee, cha nee ynrycan jeh’n lught as y lhong, agh myrgeddin jeh nyn mioys. 11Ny-yeih hug yn centurion geill smoo da mainshter as pilot ny lhuingey na da goan Phaul. 12As er-y-fa nagh row eh purt sauchey geuree dooin, choyrlee yn ayrn smoo jeh’n cheshaght ad dy eaysley veih shen, my oddagh ad er aght erbee cosney gys Phenice, as yn geurey y cheau ayns shen; ta ny phurt ayns Crete, as lhie lesh yn neear-ass as yn neear-hwoaie. 13As feaysley lesh geay meeley jiass, sheiltyn dy row oc nish nyn yoïn, hiauill ad ry-lhiattee Crete. 14Agh ayns traa gerrit dirree geay dewil dorrinagh nyn ’oï enmyssit Euroclidon. 15As tra va’n lhong er ny imman noon as noal, as nagh row ee son jannoo raad noi sooill ny geayee lhig shin jee tuittym lesh. 16As roie fo ellan dy row, ta enmyssit Clauda, s’mooar yn obbyr v’ain dy ghoaill stiagh yn baatey: 17Agh tra v’ee goit stiagh oc, ghow ad saaseyn ayns laue dy niartaghey yn lhong, kiangley mygeayrt ee lesh cablyn; as er-aggle dy duittagh ad er y gheinnagh vio, ghow ad yn shiaull neose, as myr shen lhig ad y raad jee. 18As myr va shin er nyn imman noon as noal erskyn towse lesh y dorrin, yn nah laa deddrymmee ad y lhong: 19As yn trass laa hug shin magh lesh nyn laueyn hene greïnyn ny lhuingey. 20As tra nagh row grian ny eayst ry-akin rish ymmodee laghyn, as dy row shin fo sterrym nagh nee beggan, chaill shin dy chooilley hreishteil dy hauchys. 21As erreish daue v’er ve foddey nyn drostey, hass Paul magh nyn mast’oc, as dooyrt eh, Lhisagh shiu, gheiney vie, v’er n’eaishtagh rhym’s, as gyn v’er veaysley veih Crete, dy gheddyn yn assee as y coayl shoh. 22As nish ta mee coyrlaghey shiu dy ve jeh gien mie, son cha bee coayl jeh bioys dooinney erbee nyn mast’eu, agh jeh’n lhong. 23Son hass liorym’s noght ainle Yee, quoi s’liesh mee, as eh ta mee dy hirveish, 24Gra, Ny bee aggle ort, Phaul; shegin dhyt shassoo fenish Cesar: as cur-my-ner ta Jee er ghiootal ort ooilley adsyn ta shiaulley mayrt. 25Shen-y-fa, gheiney vie, cum-jee seose nyn gree: son ta mee credjal Jee, dy bee eh eer myr ve giallit dou. 26Ny-yeih shegin dooin ve ceaut stiagh er ellan ennagh. 27Agh tra va’n chiarroo oie yeig er jeet, myr va shin eiyrit noon as noal ayns keayn Adria, mysh y vean-oie va ny marrinee gourys dy row ad tayrn er-gerrey da cheer ennagh. 28As cheau ad magh yn leoaie, as dennee ad dy row feed feiy oc: as tra v’ad er gholl red beg sodjey, hug ad magh yn leoaie reesht, as hooar ad eh queig feiyn jeig. 29Eisht er-aggle dy roieagh ad er creggyn, hilg ad kiare akeryn magh veih yn jerrey, dy jeean jeeaghyn son y laa. 30As myr va ny marrinee mysh cosney ass y lhong, as er lhiggey yn baatey sheese er yn ushtey, myr-yien dy chur magh akeryn veih toshiaght ny lhuingey. 31Dooyrt Paul rish y centurion, as rish ny sidooryn, Mannagh vuirree ad shoh ayns y lhong, cha vod shiu ve sauchey. 32Eisht ghiare ny sidooryn teddyn y vaatey, as lhig ad jee tuittym sheese. 33As myr va’n laa soilshaghey, choyrlee Paul ad ooilley dy ghoaill beaghey, gra, Jiu yn chiarroo laa yeig, ta shiu er hannaghtyn nyn drostey, gyn lhongey cooie. 34Shen-y-fa my choyrle’s eh shiu dy ghoaill beaghey; son te cour nyn slaynt: son cha duitt wheesh renaig jeh kione unnane eu. 35As tra v’eh er ghra shoh, ghow eh arran, as hug eh booise da Jee, ayns yn enish oc ooilley, as vrish eh eh, as ren eh toshiaght dy ee. 36Eisht v’ad ooilley ayns cree mie, as ghow adsyn myrgeddin beaghey. 37As va shin ayns ooilley ayns y lhong, daa cheead three-feed as shey anmeenyn jeig. 38As tra v’ad jeant magh lesh bee, deddrymmee ad y lhong, as hilg ad y churnaght harrish boayrd ’sy cheayn. 39As tra va’n laa er jeet rish, cha bione daue yn cheer: agh chronnee ad ooig dy row lesh traie, raad v’ad kiarit, my oddagh eh ve, yn lhong y roie stiagh. 40As tra v’ad er droggal ny akeryn, lhig ad ee lesh y cheayn, as feaysley coyrdyn y stiurey, hug ad seose yn shiaull-mean gys y gheay, as ren ad son y thalloo. 41As taghyrt er boayl raad va daa hidey cheet noi-ry-hoi roie ad y lhong er grunt; as va’n toshiagh eck soit cha shickyr, nagh row ee scughey, agh va’n jerrey eck brisht lesh niart ny tonnyn. 42As coyrle ny sidooryn ve dy varroo ny pryssoonee, er-aggle dy snaueagh veg jeu magh, as dy gosnagh ad roue. 43Agh yn centurion aggindagh Paul y hauail, lhiett eh ad veih shen y yannoo, as doardee eh adsyn oddagh snaue, ad dy hilgey ad-hene hoshiaght ayns y cheayn, as ad dy chosney gys y thalloo: 44As y chooid elley, paart er buird, as paart er peeshyn jeh’n lhong: as shen myr ve, dy chossyn ad ooilley dy sauchey gys y thalloo.