CAB. III

1Nish hie Peddyr as Ean seose cooidjagh gys y chiamble, ec oor y phadjer, ta shen, yn nuyoo oor. 2As va dooinney dy row va baccagh veih breïn e vayrey, er ny hroggal, as currit ny lhie gagh laa ec y ghiat shen jeh’n chiamble, ta enmyssit Aalin, dy hirrey jeirk orroosyn va goll stiagh ayns y chiamble. 3Honnick eh shoh Peddyr as Ean mysh goll stiagh ’sy chiamble, as hir eh jeirk orroo. 4As yeeagh Peddyr dy gyere er, myr ren Ean, as dooyrt eh, Jeeagh orrin. 5As ghow eh tastey jeu, jerkal rish red ennagh y gheddyn voue. 6Eisht dooyrt Peddyr, Argid as airh cha vel aym, agh lheid as t’aym ta mee dy chur dhyt: Ayns ennym Yeesey Creest dy Nazareth, irree seose as shooill. 7As ghow eh er y laue yesh eh, as hrog eh seose eh; as chelleeragh ghow ny cassyn as craueyn ny habbaneyn echey niart. 8As lheim eh seose, as hass eh, as huill eh, as hie eh stiagh ayns y chiamble mâroo, shooyl as lheimyragh, as cur moylley da Jee. 9As honnick ooilley yn pobble eh shooyl as cur moylley da Jee. 10As hug ad enney er dy nee shoh eshyn boallagh soie shirrey jeirk ec giat Aalin y chiamble: as v’ad lhieent lesh yindys as atchim ec shen ny v’er daghyrt da. 11Agh myr va’n baccagh v’er ny laanaghey cummal dy jeean gys Peddyr as Ean, roie ooilley yn pobble dy cheilley gys y phorch ta enmyssit porch Solomon, goaill lane yindys. 12As tra honnick Peddyr shoh, dansoor eh yn pobble, Gheiney Israel, cre’n-fa ta shiu gindys er shoh? ny jeeaghyn cha gyere orrinyn, myr dy beagh shin liorish y phooar ny’n chraueeaght ain hene er chur er y dooinney shoh shooyl? 13She Jee Abraham, as Isaac, as Jacob, Jee ny ayraghyn ain t’er ghloyraghey e Vac Yeesey; ren shiuish y livrey seose as y obbal ayns fenish Pilate, tra v’eh kiarit y raad y lhiggey da. 14Agh dob shiuish yn Fer-noo casherick, cairagh, as hir shiu dunver er nyn accan dy ve livreït diu, 15As ta shiu er varroo prince y vea, ren Jee y hroggal veih ny merriu; myr ta shinyn nyn veanishyn. 16As yn ennym echeysyn trooid credjue ayns yn ennym cheddin t’er chur niart da’n dooinney shoh, ta shiu dy akin, as er ta enney eu: dy jarroo, she credjue aynsyn t’er n’obbraghey yn couyr breeoil shoh ersyn ’syn enish eu ooilley. 17As nish, vraaraghyn, strooys dy nee trooid mee-hushtey ren shiu eh, myr ren myrgeddin ny fir-reill eu. 18Agh shen va Jee ro-laue er hoilshaghey liorish beeal ooilley e adeyryn, dy row Creest dy hurranse, t’eh myr shoh er chooilleeney.

19Gow-jee arrys er-y-fa shen, as chyndaa-jee, dy vod shiu v’er nyn ghlenney veih nyn beccaghyn, dy vod earishyn yn ooraghey cheet erriu veih fenish y Chiarn, 20As nee eh Yeesey Creest y choyrt, va roïe er ny phreacheil diu: 21Eshyn ta dy ve ayns niau, derrey earishyn lhiassaghey dy chooilley nhee, ta Jee er loayrt liorish beeal ooilley e adeyryn crauee, er-dy hoshiaght y theihll. 22Son dooyrt Moses dy firrinagh rish ny ayraghyn, Phadeyr, myr ta mish, nee yn Chiarn y Jee eu y hroggal seose diu, jeh nyn mraaraghyn; rishyn nee shiu geaishtagh ayns dy chooilley nhee cre-erbee nee eh y ghra riu. 23As hig eh gy-kione, dy bee dy chooilley annym nagh der geill da’n phadeyr shen, er ny stroie veih mastey yn pobble. 24As ta myrgeddin ooilley ny phadeyryn veih Samuel, dy jarroo whilleen as haink ny yeï, as ren phadeyrys, er n’insh ro-laue jeh ny laghyn shoh. 25Shiuish cloan ny phadeyryn as y chonaant, ren Jee rish nyn ayraghyn, gra rish Abraham, As ayns dty luight’s vees ooilley kynneeyn y theihll er nyn mannaghey. 26Erreish da Jee v’er hroggal seose e vac Yeesey, hug eh hiuish eh hoshiaght dy nyn mannaghey liorish chyndaa dy chooilley unnane eu veih e vee-chraueeaght.